Alkitab Mobile SABDA
[VER] : [MADURA]     [PL]  [PB] 
 <<  Kejadian 17 >> 

1E bakto yuswana Abram sangang polo sanga’ taon, PANGERAN ngaton sarta adhabu ka salerana, "Sengko’ reya Allah Se Mahakobasa. Mara ba’na pata’at ka Sengko’, ban odhi’ patadha’ calena.

2Sengko’ mabadha’a parjanjiyan ban ba’na sarta aberri’a na’ poto sabannya’na ka ba’na."

3Abram laju asojud, ban Allah adhabu,

4"Areya’ Tang parjanjiyan ka ba’na: Bi’ Sengko’ ba’na epadaddiya bangatowana bangsa sabannya’na. Nyamana ba’na sateya bi’ Sengko’ eoba’a daddi Ibrahim, banne Abram pole.

5(17:4)

6Bi’ Sengko’ ba’na eberri’ana na’ poto sabannya’na, ban e antarana na’ potona ba’na jareya badha se padha’a daddi rato. Na’ potona ba’na jareya bakal talebat bannya’na sampe’ daddi sa-bangsa.

7Sengko’ neptebbana Tang janji ka ba’na ban ka na’ potona, ron-temoron, ban parjanjiyan jareya langgeng. Sengko’ daddiya Allahna ba’na ban na’ potona.

8Sateya ba’na badha e tana reya menangka oreng manca. Tape tana jareya bi’ Sengko’ ebagiya ka ba’na ban ka na’ potona. Tana Kana’an bi’ Sengko’ epadaddiya andhi’na ba’na ban na’ potona salanjangnga, ban Sengko’ bakal daddiya Allahna na’ potona ba’na jareya."

9Allah adhabu pole ka Ibrahim, "Ba’na kodu neptebbi parjanjiyan jareya keya, banne pera’ ba’na malolo, tape ba’na ban na’ potona.

10Areya’ Tang parjanjiyan e antarana Sengko’ ban ba’na ban na’ potona ba’na se kodu eteptebbi, iya areya: ba’na ban na’ potona se lalake’ kodu asonnat.

11Molae sateya, sakabbinna babaji’ lalake’ se la aomor ballung are kodu esonnat; katantowan reya kaangguy na’ potona ba’na, ban nor-dunor se lahir e bengkona ba’na ban se ebelli ba’na dhari nagara manca. Sonnat jareya menangka tandhana parjanjiyan e antarana Sengko’ ban ba’na.

12(17:11)

13Oreng se lahir e bengkona ba’na ban se ollena melle, kabbi kodu esonnat. Jareya menangka tandha lahiriyah se noduwagi ja’ parjanjiyan e antarana Sengko’ ban ba’na jareya langgeng.

14Lalake’an se ta’ esonnat ta’ ekenneng anggep Tang ommat pole, sabab reng-oreng jareya ta’ neptebbi parjanjiyan jareya."

15Dhabuna Allah ka Ibrahim, "Molae sateya binena ba’na jareya ja’ nyamae Sarai; nyamana oba daddi Sara.

16Binena ba’na bi’ Sengko’ eberkadana, ban epaandhi’a ana’ lalake’ dhari ba’na. Bi’ Sengko’ Sara epadaddiya ebu se noronnagiya sa-bangsa; e antarana toronanna bakal badha’a se padha daddi rato."

17Ibrahim asojud ka tana, tape sambi agella’ e dhalem panggaliyanna. Ca’na panggaliyanna, "Dhu dhimma se badha’a lalake’ se la aomor saratos taon se andhi’a ana’? Ban dhimma Sara se andhi’a ana’, ja’ omorra la sangang polo taon?"

18Ibrahim mator ka Allah, "Kadi ponapa manabi Isma’il saos se epadaddi ahli waris abdidalem?"

19Tape Allah adhabu, "Enja’. Sara binena ba’na jareya bakal ngandhunga ban rembi’a lalake’. Kana’ jareya nyamae Ishak. Sengko’ mabadha’a parjanjiyan se langgeng ban kana’ jareya sarta ban na’ potona.

20Tape parnyo’onanna ba’na parkara Isma’il bi’ Sengko’ ekabbulana keya. Daddi bi’ Sengko’ Isma’il eberkadana ban eberri’ana na’ poto sabannya’na. Isma’il jareya bakal daddiya bangatowana dhubellas suku, ban na’ potona bi’ Sengko’ epadaddiya bangsa se raja.

21Tape Sengko’ neptebbana Tang parjanjiyan ban Ishak, ana’na ba’na se elahirragiya Sara, taon dhateng, ra-kera baja teya."

22Saellana mare se abu-dhabu ka Ibrahim, Allah laju adinggallagi Ibrahim.

23Saellana jareya Ibrahim alampa’agi dhabuna Allah. Pottrana, Isma’il, esonnat; bariya keya lalake’an se badha e compo’na, tamaso’ sakabbinna oreng se lahir e compo’na, ban nor-dunorra se ollena mondhut.

24E bakto asonnat, yuswana Ibrahim sangang polo sanga’ taon,

25dineng Isma’il omorra tello bellas taon.

26Ibrahim ban pottrana asonnat e dhalem settong are.

27Bariya keya nor-dunorra.


  Share Facebook  |  Share Twitter

 <<  Kejadian 17 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel