Alkitab Mobile SABDA
[VER] : [MADURA]     [PL]  [PB] 
 <<  Kejadian 22 >> 

1Ta’ saapa abidda dhari jareya Allah nyoba’ Ibrahim. Ibrahim edikane. "Ibrahim! Ibrahim!" dhabuna. Saodda Ibrahim, "Ka’dhinto, Guste!"

2Allah adhabu, "Kassa’ ba’na entar ka tana Moriya. Giba Ishak, ana’na ba’na se pera’ settong rowa, se talebat ekaase’e bi’ ba’na. Ana’na ba’na jareya gabay kurban obbaran menangka tor-ator ka Sengko’, e settong gunong se dhaggi’ eduduwagiya bi’ Sengko’."

3Kalagguwanna gu-laggu Ibrahim thok-ngetthok kaju se epangobbara kurbanna. Kaju jareya ebuwa’ e hemarra. Ibrahim pas mangkat ka kennengngan se edhabuwagi Allah, asareng ban Ishak sarta kabulana kadhuwa.

4Saellana olle tello are, kennengngan jareya la katon ka Ibrahim.

5Ibrahim pas adhabu ka kabulana se kadhuwa gella’, "Ba’na anante’ e dhinna’ bai; hemarra reya edina’a e dhinna’ keya. Sengko’ ban tang ana’ entara dha’ essa’, abakteya ka Allah. Dhaggi’ mon la mare, sengko’ abaliya dha’ enna’."

6Kajuna bi’ Ibrahim epapekol ka Ishak, dineng salerana dibi’ abakta ladding ban mardha. Se kadhuwa pas alomampa asareng.

7Ca’na Ishak, "Pa’." Saodda Ibrahim, "Apa, Na’?" Ishak atanya, "Kaju ban mardhana ampon badha. Ka’imma budhu’na dumbana se ebadhiya kurban?"

8Saodda Ibrahim, "Allah dibi’ se nyadhiya’agiya budhu’na dumbana jareya." Se kadhuwa pas terros alomampa.

9Sanapa’na ka kennengngan se edhabuwagi Allah gella’, Ibrahim pas abadhi kennengnganna kurban. Kajuna etata e attasanna; pottrana etale’e, esaba’ e kennengnganna kurban gella’, e attasanna kajuna.

10Saellana jareya Ibrahim laju mondhut laddingnga epanyambelliya pottrana.

11Tape Ibrahim laju meyarsa sowarana malaekadda PANGERAN dhari langnge’, "Ibrahim! Ibrahim!" Saodda Ibrahim, "Ka’dhinto, Guste!"

12Dhabuna Allah kalaban parantara’anna malaekat gella’, "Ja’ pate’e kana’ jareya, ja’ pama-baramma. Sabab sateya Sengko’ tao ja’ ba’na tako’ ka Allah, ban ta’ eman massra’agi ka Sengko’ ana’na ba’na se pera’ settong tadha’ pole jareya."

13Ibrahim atole ka bara’ ka temor, ka dhaja ka lao’, laju ngoladi badha dumba lake’ settong, tandhu’na tacangke’ ka but-ombut. Ibrahim mondhut dumba jareya, laju ebadhi kurban ka Allah menangka gantena pottrana.

14Bi’ Ibrahim kennengngan jareya enyamae "PANGERAN nyadhiya’agi". Daddi sampe’ sateya oreng ngoca’, "E attassa gunongnga PANGERAN nyadhiya’agi se ekaparlo."

15Malaekadda PANGERAN aera’ ka Ibrahim sakaleyan aggi’ dhari langnge’,

16"Areya’ dhabuna PANGERAN: Sengko’ asompa’a kalaban Tang nyama dibi’, ja’ bi’ Sengko’ ba’na eberri’ana berkat se talebat rajana. Sarrena ba’na atoro’ ka Sengko’ ban ta’ berra’ ngurbannagi ana’na se pera’ settong jareya ka Sengko’,

17Sengko’ ajanji ba’na eberri’ana toronan se ce’ bannya’na, akantha bannya’na bintang e langnge’, akantha bannya’na beddhi e paseser. Na’ potona ba’na bakal mennanga ka so-mosona.

18Lantaran ba’na ban toronanna, sa-bangsa e bume bakal narema’a berkat kabbi — sabab ba’na atoro’ ka Sengko’."

19Saellana jareya Ibrahim abali ka kennengnganna kabulana se kadhuwa gella’, pas laju padha abareng mangkat ka Bersyeba. Ibrahim terros maggun alenggi e Bersyeba jareya.

20Ibrahim kaagungan kaka’ anyama Nahor. Saellana kadaddiyan e Gunong Moriya rowa Ibrahim narema kabar ja’ Milka, binena Nahor, andhi’ ana’ kaballu, iya areya:

21Us se sareyang, Bus ale’na, Kemuwel se daddi eppa’na Aram,

22Kesed, Hazo, Pildas, Yidlaf ban Betuwel.

23Betuwel jareya eppa’na Ribka. Jareya ana’na Milka se kaballu ollena ban Nahor, taretanna Ibrahim.

24Dineng sellerra Nahor se anyama Reyuma andhi’ ana’ keya, iya areya Tebah, Gaham, Tahasy ban Ma’akha.


  Share Facebook  |  Share Twitter

 <<  Kejadian 22 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel