Alkitab Mobile SABDA
[VER] : [MADURA]     [PL]  [PB] 
 <<  Kejadian 31 >> 

1Yakub ngedhing na’-ana’na Laban ngoca’ kantha reya, "Yakub la ngala’ sakabbinna dhi’-andhi’na eppa’. Dhi’-andhi’na Yakub kabbi asalla dhari dhi’-andhi’na eppa’."

2Yakub nangale’e keya ja’ Laban ta’ baranca akantha dha’-adha’na ka aba’na.

3PANGERAN laju adhabu ka Yakub, "Kassa’ ba’na abali ka nagarana eppa’na ban ka la-balana ba’na. Sengko’ se abarengngana ba’na."

4Saellana jareya Yakub nyoro oreng ngolok Rahel ban Liya, esoro amon-temmon ban aba’na neng e kennengnganna embi’ ban dumbana.

5Ca’na Yakub ka se kadhuwa jareya, "Sengko’ nangale’e ja’ eppa’na ba’na la ta’ baranca pole ka sengko’, ta’ akantha ba’-lamba’na; tape Allah se esemba tang eppa’ ajaga sengko’.

6Ba’na padha tao keya ja’ sengko’ reya alako ka eppa’na ba’na amba’ pate.

7Maske kantha jareya sengko’ gi’ etepo, tang opa eoba sampe’ sapolo kale. Tape bi’ Allah eppa’na ba’na ta’ epanneng alako jahat ka sengko’.

8E bakto eppa’na ba’na adhabu, ‘Embi’ se toltol daddiya opana ba’na,’ embi’na kabbi padha abudhu’ abulu toltol. E bakto eppa’na adhabu, ‘Embi’ se lang-belling daddiya opana ba’na,’ embi’na kabbi padha abudhu’ lang-belling.

9Allah mondhut ebinna eppa’na ba’na, eparengngagi ka sengko’.

10E bakto mosemma embi’ akabin, sengko’ amempe nangale’e bi’-embi’ lake’ se teppa’na ake-sake kabbi padha lorek, toltol ban lang-belling.

11Allah kalaban ropa malaekat adhabu ka sengko’ e dhalem mempe jareya, dhabuna, ‘Yakub!’ Sengko’ nyaot, ‘Ka’dhinto.’

12Malaekat jareya adhabu pole, ‘Abas, embi’ lake’ se nyake rowa buluna lorek, toltol ban lang-belling kabbi. Jareya bi’ Sengko’ pajat epakantha jareya polana Sengko’ nangale’e baramma Laban ka ba’na.

13Sengko’ reya Allah se tao ngaton ka ba’na e Betel. E dhissa’ ba’na ngatorragi bato menangka parengeddan, se bi’ ba’na eserame mennya’ jaitun e attasanna; e jadhiya ba’na asompa ka Sengko’. Sateya mara ba’na akes-rengkes, pas nyengla dhari nagara reya, mole ka nagarana la-balana ba’na.’"

14Liya ban Rahel laju nyaot, "Dhari sadaja dhi’-andhi’na eppa’ ampon tadha’ pole bagiyanna se ekasangkola kaula.

15Kaula padha eanggep oreng manca. Kaula paneka padha ejuwal, dineng pessena se etarema ampon epatadha’ sadaja.

16Sadajana se epondhut Allah dhari eppa’ paneka sanyatana gadhuwan kaula se kadhuwa paneka, sareng gadhuwanna na’-ana’ kaula. Ngereng lampa’agi ponapa se edhabuwagi sareng Allah ka sampeyan."

17Yakub laju akes-rengkes, moleya ka eppa’na e nagara Kana’an. Ne-binena ban na’-ana’na epaongga ka ontana, embi’ ban dumbana egiba kabbi, epajalan e adha’anna, bariya keya sabarang dhi’-andhi’na se ekaolle e Mesopotamia.

18(31:17)

19E bakto jareya Laban teppa’na badha e teggal agunteng buluna ba-dumbana, ban e bakto jareya Rahel ngeco’ ca-arca andhi’na eppa’na se egabay panjagana ana’ binena.

20Yakub ngakkale Laban, se mangkat ta’ asa’-kasa’.

21Dhi’-andhi’na egiba kabbi, laju mangkat ru-kaburu. Pamangkadda alengka Songay Efrat terros nojju ka bagiyan Pagunongan Gileyad.

22Saellana olle tello are buru badha se abala ka Laban ja’ Yakub buru.

23Laban laju makompol reng-orengnga, laju areng-bareng padha nyerser Yakub sampe’ pettong are abidda, sampe’ ecapo’ e bagiyan pagunongan Gileyad.

24E baja malem Allah ngaton ka Laban e dhalem mempena, laju adhabu, "Senga’, ba’na ta’ olle ngara Yakub maske pera’ ban oca’ sakeccap."

25E bakto jareya Yakub la masang kemah e settong pagunongan, dineng Laban ban reng-orengnga maddek kemah keya neng e pagunongan Gileyad.

26Ca’na Laban ka Yakub, "Arapa ba’na me’ ngakkale sengko’, ngeba buru tang ana’ se kadhuwa, epakantha se ngeba bujungan perrang?

27Arapa ba’na me’ ngakkale sengko’, ondur ta’ asa’-kasa’, ta’ amet ka sengko’? Ja’ sakenga ba’na amet, ba’na tanto eater sambi etoro’e nyanyeyanna mosik terbang ban calempong.

28Ba’na la’-mala’ ta’ aberri’ kasempadan ka sengko’ kaangguy nyeyom tang ana’ ban tang kompoy menangka tandha se apesa’a. Tengkana ba’na jareya budhu onggu!

29Sengko’ cokop kowat kaangguy alako jahat ka ba’na, tape malemma Allah se esemba eppa’na ba’na maenga’ ka sengko’ ja’ sengko’ ta’ olle ngara ba’na.

30Sengko’ tao ja’ ba’na se ondur dhari tang bengko lantaran ba’na ce’ terrona se moleya ka bengkona, tape arapa ba’na me’ ngeco’ ca-arca se ajaga essena tang bengko?"

31Ca’na Yakub, "Kaula kan ondur ta’ asa’-kasa’ polana tako’ sampeyan ta’ marengngagi tra-pottrana ngereng kaula.

32Parkara ca-arcana sampeyan, manabi orengnga se ngeco’ sareng sampeyan epanggi, sareng kaula eokoma mate. Ngereng pareksa, ponapa barangnga sampeyan ganeka badha e ka’iya. Manabi badha, eatore pondhut. Reng-oreng se noro’ kaula me’ olle daddi saksena." Yakub ta’ tao ja’ Rahel se ngeco’ arca jareya.

33Laban laju nyaloksak kemahna Yakub. Saellana jareya laju mareksa kemahna Liya ban ka kemahna bareng babine’ se kadhuwa rowa, tape arca jarowa ta’ etemmo. Dhi-budhina laju maso’ ka kemahna Rahel.

34Tape arca jareya bi’ Rahel la ekala’, esaba’ ka dhalem kanthongnga pa-kapana ontana, dineng aba’na dibi’ toju’ e attassa pa-kapa jareya. Kemahna Rahel jareya bi’ Laban esaloksak epabalattra, tape arca jareya ta’ etemmo.

35Rahel laju mator ka eppa’na, "Sampeyan ja’ duka ka kaula, Pa’; kaula ta’ kengeng manjeng manggi’i sampeyan, polana kaula kalerressan dhateng kotorra." Laban nyare’e epatete, tape ta’ ahasel nemmo arca jareya.

36Daddi Yakub laju peggel. "Ponapa kajahadanna kaula?" patanyana epasomengnget. "Ponapa sala kaula me’ sampe’ eserser sareng sampeyan?

37Samangken, saamponna nyaloksak sadajana barang kaula, ponapa sampeyan ampon manggi barangnga sampeyan se elang ganeka? Ngereng pakalowar barang ganeka, saba’ e ka’iya, sopaja reng-oreng se noro’ kaula sareng se ngereng sampeyan kengeng nengale sareng laju oneng pasera se lerres e antarana sampeyan sareng kaula.

38Ampon dhu polo taon kaula akompol sareng sampeyan. Dumba sareng embi’na sampeyan ampon adhu’-budhu’ sabannya’na, ban kaula ta’ oneng neddha embi’ lake’na sampeyan maske settonga.

39Manabi badha se ekakan burun alas sareng kaula ta’ ebakta ka sampeyan, tape kaula dibi’ se agante’e. Se ekeco’ oreng e baja seyang otaba malem bi’ sampeyan esoro gante’e ka kaula.

40Kaula serreng kapanasan e baja seyang, sareng kacellebban e baja malem. Kaula serreng ta’ ngeddha tedhung.

41Kadi gapaneka kabadha’an kaula saabidda alako ka sampeyan, dhu polo taon abidda. Pa’ bellas taon abidda kaula alako se terro ngaandhi’a pottrana sampeyan se kadhuwa, sareng nem taon pole se alako se terro ngaandhi’a embi’ sareng dumba paneka. Saabidda dhu polo taon ganeka sampeyan ngoba opa kaula kantos sapolo kale.

42Saompamaepon kaula ta’ ekabellasi sareng Allahna bangatowana kaula, enggi paneka Allah se esemba Ibrahim sareng Ishak, tanto kaula bi’ sampeyan epakon ondur ta’ kalaban ngeba pa-ponapa. Namong Allah ngoladi kasossa’an kaula sareng lalakon kaula, sarengngan malemma Allah ampon apareng kapotosan."

43Saodda Laban ka Yakub, "Babine’ se kadhuwa jareya tang ana’; ana’na se kadhuwa jareya tang kompoy, ba-dumbana tang andhi’ keya. Sanyatana, sabarang se etangale’e ba’na e dhinna’ reya tang andhi’. Tape sengko’ ta’ ngenneng apa-rapa sopaja tang ana’ ban tang kompoy pagguna neng e dhinna’.

44Daddi mara ba’na ban sengko’ sateya agabay parjanjiyan, ban mara nyoson bato menangka tandhana parjanjiyan jareya."

45Daddi Yakub laju ngala’ bato, pas epamanjeng menangka bato parengeddan.

46Reng-orengnga laju esoro ngala’ bato, batona laju etombuk. Saellana jareya reng-oreng jareya padha ngakan e seddi’anna tombuganna bato gella’.

47Bi’ Laban tombuganna bato jareya enyamae Yegar-Sahaduta, tape bi’ Yakub enyamae Galed.

48Ca’na Laban ka Yakub, "Tombuganna bato reya daddiya parengeddan ka sengko’ ban ka ba’na." Jareya sababba kennengngan jareya laju enyamae Galed.

49Laban ngoca’ pole, "Moga-moga PANGERAN ngoladana sengko’ ban ba’na saabidda sengko’ ban ba’na apesa e jauna." Daddi kennengngan jareya laju enyamae Mizpa.

50Laban ngoca’ pole, "Mon ba’na jahat ka tang ana’ se kadhuwa jareya, otabana mon ba’na abine babine’an laen, maske sengko’ ta’ tao, kaenga’e ja’ Allah ngoladi ka sengko’ ban ka ba’na.

51Areya’ tombuganna bato, bato parengeddan e antarana sengko’ ban ba’na.

52Tombuganna bato reya, ban bato parengeddan reya, menangka sakse ka sengko’ ban ka ba’na, ja’ sengko’ ta’ olle ngalebadi tombuganna bato reya nyerrangnga ba’na, ban ba’na ta’ olle ngalebadi tombuganna bato reya otaba bato parengeddan reya kaangguy nyerrangnga sengko’.

53Allah se esemba Ibrahim ban se esemba tang eppa’ Nahor, se daddiya hakim se ngadilana sengko’ ban ba’na." Yakub laju asompa demi Allah se esemba Ishak, eppa’na, ja’ aba’na neptebbana janji jareya.

54Yakub laju nyambelli settong keban, laju eatorragi ka Allah menangka kurban e attassa gumo’ jareya. Saellana jareya reng-orengnga laju epakompol eajak ngakan areng-bareng. Samarena ngakan reng-oreng jareya padha ngenep e gumo’ jareya.

55Kalagguwanna gu-laggu Laban nyeyom ana’ ban kompoyya menangka amet, laju aberkadi na’-ana’na ban poy-kompoyya jareya, samarena pas mole ka kennengnganna dibi’.


  Share Facebook  |  Share Twitter

 <<  Kejadian 31 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel