Alkitab Mobile SABDA
[VER] : [MADURA]     [PL]  [PB] 
 <<  Keluaran 21 >> 

1Dhabuna PANGERAN ka Mosa, "Kabala ka oreng Isra’il sopaja padha’a atoro’ ka sakabbinna atoran reya:

2Mon ba’na melle dunor bangsana dibi’, dunor jareya kodu alako ka ba’na nem taon abidda. E taon se kapeng petto’ dunor jareya kodu epabebas ban ta’ osa epentae bajaran pa-apa.

3Mon dunor jareya padhatengnga kadibi’an, gi’ ta’ abine, paondurra kodu kadibi’an keya, ta’ olle ngeba bine. Tape mon oreng jareya padhatengnga ngeba bine, binena olle giba.

4Mon lorana se mabine’e, dineng binena pas andhi’ ana’ lalake’ otaba babine’, bine ban na’-ana’na jareya daddi andhi’na lorana, ta’ olle noro’ dunor jareya e bakto ondura saellana epabebas.

5Tape mon dunor jareya ngoca’ neser ka binena, ka na’-ana’na ban ka lorana, sarta ngoca’ ta’ terro epabebasa,

6lorana kodu ngeba dunor jareya ka kennengnganna kabakteyan. E jadhiya dunor buru esoro manjeng nyandhar ka labang otabana canggana labangnga kennengnganna kabakteyan ban lorana pas kodu alobange kopengnga dunor jareya. Dunor jareya pas kodu daddi dunorra oreng jareya saomorra.

7Mon oreng ajuwal ana’ babine’na epadaddi dunor, babine’ jareya ta’ epabebas saellana olle nem taon, daddi banneyan ban dunor lalake’.

8Mon dunor babine’ jareya ejuwal ka lalake’ se terro ngabineya babine’ jareya, tape lorana ta’ lebur ka babine’ jareya, dunor jareya kodu ejuwal pole ka eppa’na. Babine’ jareya ta’ olle ejuwal ka oreng manca, sabab mon kantha jareya lorana ta’ adil ka babine’ jareya, iya areya ta’ neptebbi janjina.

9Mon oreng melle dunor babine’ egabaya binena ana’na, dunor jareya kodu epakantha ana’na dibi’.

10Mon ana’ lalake’na jareya abine pole, ana’na jareya paggun andhi’ kawajiban nanggung kakanna ban angguyya sarta tedhung apolong ban binena se nomer settong.

11Mon lalake’ jareya ta’ ajalannagi kawajiban se tatello’ jareya, binena kodu epabebas ban ta’ osa epentae bajaran pa-apa."

12"Sapa se mokol oreng sampe’ mate, kodu eokom mate.

13Tape mon se mate’e jareya ta’ etengnget, oreng jareya olle buru ka settong kennengngan se eduduwagiya bi’ Sengko’, e jadhiya oreng jareya aman.

14Tape mon oreng polana peggel pas etengnget mate’e oreng, saellana pas buru ka Tang mezba sopaja amana, oreng jareya kodu egiba dhari kennengnganna mezba jareya, pas okom mate.

15Sapa se mokol eppa’ otaba ebuna, kodu eokom mate.

16Sapa se ngeba buru oreng, kodu eokom mate, ta’ parduli apa oreng se egiba buru jareya la ejuwal otabana gi’ badha e bengkona.

17Sapa se abasto eppa’ otaba ebuna kodu eokom mate.

18Mon badha oreng atokar, se settong mokol se laen ngangguy bato otaba aguco bi’ tanangnga, tape ta’ epate’e, oreng jareya ta’ olle eokom. Mon oreng se epokol jareya sampe’ ta’ ngenneng jaga dhari katedhunganna polana se epokol jareya,

19tape pas ngenneng jaga ban ajalan pole ngangguy tongket, oreng se mokol jareya kodu arabat se epokol jareya sarta nanggung karogiyanna saabidda sake’na.

20Sapa se mokol dunor lalake’na otaba dunor babine’na sampe’ mate, kodu eokom.

21Tape mon dunor jareya ta’ mate sampe’ saare otaba dhu are, lorana ta’ olle eokom sabab dunor jareya andhi’na dibi’. Karogiyanna se etanggung polana kaelangan dunorra jareya la daddi okomanna.

22Mon badha reng-oreng lake’ atokar ban sala settong e antarana abentor babine’ se ngandhung sampe’ kalabuwan, tape ta’ nyandhang loka e bagiyan laenna, oreng jareya kodu majar dhindha se esebbuttagi bi’ lakena sarta ebendherragi ban kim-hakim.

23Tape mon babine’ jareya calaka’ sampe’ mate, okomanna kajahadan jareya iya areya nyaba majar nyaba,

24mata majar mata, gigi majar gigi, tanang majar tanang, soko majar soko,

25loka majar loka, loka ekenneng obbar majar loka ekenneng obbar, bara majar bara.

26Sapa se mokol matana dunorra sampe’ buta, kodu mabebas dunor jareya menangka tebbusanna matana.

27Mon oreng mokol dunorra sampe’ potong gigina, dunor jareya kodu epabebas menangka tebbusanna gigina."

28"Mon sape lake’ nyodhuk oreng sampe’ mate, sape jareya kodu egarujuk sampe’ mate, dagingnga ta’ olle kakan, tape orengnga se andhi’ ta’ olle eokom.

29Mon sape lake’ jareya la biyasa nyodhugan, dineng se andhi’ la epaenga’, tape ta’ ajaga keban jareya, mon sape jareya nyodhuk oreng pole sampe’ orengnga mate, keban jareya kodu egarujuk sampe’ mate, ban se andhi’ kodu eokom mate keya.

30Tape mon se andhi’ sape jareya eedine majar tebbusan, oreng jareya kodu majar barampa’a bai se epenta dhari aba’na kaangguy nebbus nyabana.

31Mon se mate polana se esodhuk sape jareya na’-kana’ lalake’ otaba babine’, atoranna padha kantha jareya keya.

32Mon se mate esodhuk sape jareya dunor lalake’ otaba babine’, se andhi’ sape jareya kodu majar tello polo pesse salaka ka oreng se andhi’ dunor, ban sape jareya kodu egarujuk sampe’ mate.

33Oreng se ngala’ totobba somor, otabana ngale somor pas ta’ etotobi, pas badha sape otaba hemar tabalusok ka dhalem somor jareya,

34se andhi’ somor jareya kodu majar karogiyan ka se andhi’, tape keban se mate jareya olle kala’.

35Mon sapena oreng nyodhuk sapena oreng laen, se kadhuwa jareya kodu ajuwal sapena se gi’ odhi’, pessena kodu ekadhuwai; dagingnga keban se mate kodu ekadhuwai keya.

36Tape mon la etemmo ja’ sape jareya andhi’ kabiyasa’an nyodhuk, dineng se andhi’ ta’ endha’ ajaga, oreng jareya kodu agante’e sape se mate bi’ sapena se gi’ odhi’, sape se mate olle kala’."


  Share Facebook  |  Share Twitter

 <<  Keluaran 21 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel