Dual Panel1Dhabuna PANGERAN ka Mosa, "Kassa’ ngetthok papan bato dhadhuwa’ papadha ban se sabbanna, bi’ Sengko’ etolesana ca’-oca’ akantha se etoles Sengko’ e bato se bi’ ba’na epalejjar rowa.
2Ba’na asiyap lagguna gu-laggu, pas ongga ka Gunong Sinay ngadhep ka Sengko’ e konco’na gunong jareya.
3Ja’ ngajak pa-sapa; ta’ olle badha oreng e dhimma’a bai e gunong reya; ta’ olle badha dumba otaba sape se ngamba e babana gunong reya."
4Daddi Mosa laju ngetthok papan bato dhadhuwa’, ban kalagguwanna gi’ laggu bato jareya ebakta ongga ka Gunong Sinay menorot se edhabuwagi PANGERAN.
5PANGERAN toron e dhalem ondhem, ngadek e seddi’na Mosa, pas nyebbuttagi asmana se socce, iya areya PANGERAN.
6Saellana jareya PANGERAN lebat e ajunanna Mosa sambi adhabu epakaja, "Sengko’ reya PANGERAN, Allah se neserran ban bellas ase, Sengko’ sabbar, neserran ban esto.
7Sengko’ taresna ban esto ka manossa sampe’ abun-ebun toronan, ban nyapora dusana manossa; tape Sengko’ ta’ loppa aberri’ okoman ka oreng se agabay dusa, ban okoman jareya bakal etanggunga keya bi’ na’ potona sampe’ toronan se kapeng tello’ otaba empa’."
8Mosa duli asojud ka tana abakte ka Pangeran,
9laju mator, "Guste, manabi Junandalem pajat kasokan ka abdidalem, ngereng Junandalem asarengnge bangsa abdidalem ka’dhinto. Lerres reng-oreng ka’dhinto cengkal, namong kasokana Junandalem nyapora dusa sareng kasala’anna abdidalem sadaja; kasokana Junandalem narema reng-oreng ka’dhinto menangka ommattepon Junandalem."
10Dhabuna PANGERAN ka Mosa, "Sateya Sengko’ mabadha’a parjanjiyan ban bangsa Isra’il. E adha’anna reng-oreng jareya Sengko’ mabadha’a kaajiban-kaajiban se gi’ ta’ tao kadaddiyan e antarana sa-bangsa se kemma’a bai e bume reya. Sa-bangsa bakal padha’a nangaleyana sakabbinna kaajiban se epabadha’a bi’ Sengko’, sabab Sengko’, PANGERAN mabadha’a sabarang se nako’e e adha’anna ba’na.
11Toro’ kom-hokom se etarema ba’na dhari Sengko’ are teya reya. Sengko’ ngojuga bangsa Amori, Kana’an, Het, Feris, Hewi ban Yebus e baktona ba’na maju.
12Senga’ te-ngate, ja’ sampe’ ba’na mabadha parjanjiyan ban reng-oreng e nagara se emaso’ana ba’na, sabab jareya bisa daddi jebbak se madhateng pate ka ba’na.
13Sabaligga, pagujur ba-mezbana bangsa jareya, paancor gu-tuguna se karamat ban ta’-tatta’ ga-canggana Asyora, brahala se esemba bangsa jareya.
14Ba’na ja’ nyemba illah laenna, sabab Sengko’ reya, PANGERAN, Allah se ta’ endha’ epapadha bi’ apa’a bai.
15Ja’ mabadha parjanjiyan bi’ bangsa e nagara jareya, sabab e bakto bangsa jareya abakte sarta ngeba kurban ka lah-illahna, ba’na tanto tagudha terro noro’a ngakan kurban se egiba ka lah-illahna jareya.
16Mon na’-ana’na ba’na abine babine’an e nagara jareya, babine’an jareya tanto nyacae ana’ lalake’anna ba’na sopaja nyemba’a ka lah-illah se esemba bangsana.
17Ja’ agabay ban ja’ nyemba lah-illah se ekagabay dhari logam.
18Raya’agi Pesta Roti Se Ta’ Eragi’i. Akantha se la eparenta’agi Sengko’, ba’na kodu ngakan roti se ta’ eragi’i pettong are abidda e dhalem bulan Abib, sabab e bulan jareya ba’na kalowar dhari Messer.
19Ana’ sareyang se lalake’ sarta budhu’na ebinna se sareyang se lalake’ daddi Tang andhi’ kabbi.
20Tape budhu’na hemar se sareyang kodu etebbus ban budhu’na dumba menangka gantena. Mon ba’na ta’ endha’ nebbus, le’erra hemar jareya kodu papotong. Ana’ sareyang se lalake’ kodu etebbus kabbi. Sapa’a bai ta’ olle ngadhep ka Sengko’ mon ta’ ngeba tor-ator.
21Ba’na bisa alalakon nem are abidda; e are se kapeng petto’ ba’na ta’ olle alalakon, maske e mosem nyalaga otaba mosem anye.
22Raya’agi Pesta Anye e bakto ba’na molae anye hasella gandumma se dha’-adha’. Bariya keya raya’agi Pesta Bengko Un-dhaunan e aher taon, e bakto ba’na molong wa’-buwa’an.
23Sataon tello kale lalake’an kodu entar abakte ka Sengko’, PANGERAN, Allah se esemba Isra’il.
24Saellana Sengko’ ngojuk sa-bangsa mosona ba’na, sarta la malebar dhaerana ba’na, ta’ kera badha pole se bangala arebbu’ nagarana ba’na e bakto ba’na entar araya’agi Pesta Roti se Ta’ Eragi’i, Pesta Anye ban Pesta Bengko Un-dhaunan.
25Mon ba’na ngeba kurban keban sambelliyan, ja’ ngeba tor-ator roti se eragi’i. Keban se egabay kurban e bakto paraya’an Paska kodu epaabi’ e malem jareya keya, ta’ olle badha karena sampe’ kalagguwanna.
26Sabban taon ba’na kodu ngeba hasella gandumma se eanye dha’-adha’ ka Padalemman Socce. Dagingnga budhu’na dumba otaba embi’ ta’ olle eola bi’ aeng sosona korbina."
27Dhabuna PANGERAN ka Mosa, "Toles Tang oca’ jareya kabbi, sabab adhasar ka ca’-oca’ jareya Sengko’ mabadha parjanjiyan ban ba’na sarta ban reng-oreng Isra’il."
28Mosa alenggi e jadhiya ban PANGERAN pa’ polo are pa’ polo malem abidda. Saabidda jareya Mosa ta’ adha’ar roti ban ta’ adha’ar aeng sakale. Ca’-oca’ se esebbuttagi e dhalem parjanjiyan gella’, iya areya Papakonna Allah se Sapolo, eserrat e papan bato se dhadhuwa’ gella’.
29E bakto Mosa toron dhari Gunong Sinay sambi abakta papan bato se aesse Papakonna Allah se Sapolo rowa, raena tera’ polana mare abu-dhabu ban PANGERAN; tape Mosa dibi’ ta’ ngagali parkara jareya.
30Harun ban reng-oreng Isra’il nangale’e raena Mosa se tera’ jareya, daddi padha tako’ se nyemma’a.
31Tape bi’ Mosa reng-oreng jareya edikane, daddi Harun ban pin-pamimpinna oreng Isra’il jareya padha nyander, Mosa pas abu-dhabu ka reng-oreng jareya.
32Saellana jareya reng-oreng Isra’il padha agaribbung e seddi’anna Mosa, ban Mosa laju manapa’ ka reng-oreng Isra’il jareya kom-hokom se etarema salerana dhari PANGERAN e Gunong Sinay.
33Samarena abu-dhabu ka bangsana jareya, Mosa pas notobi raena ban dhung-kodhung.
34Mon maso’a ka Kemah ngadhebba ka PANGERAN polana tor-matora, dhung-kodhungnga ebukka’. Mon kalowar dhari Kemah jareya Mosa pas manapa’ ka reng-oreng Isra’il pa-apa se epakonnagi PANGERAN ka salerana,
35reng-oreng Isra’il masthe nangale’e raena Mosa jareya tera’. Mosa pas notobi raena ban dhung-kodhungnga, terros sampe’ mon la napa’ baktona pole tor-matora ka PANGERAN e dhalem Kemah.