Dual Panel1Du’ana Daud. Peyarsa’agi du’a abdidalem, GUSTE, sareng peyarsa’agi abdidalem, sabab abdidalem mesken sareng ta’ kowat.
2Jaga’agi odhi’ abdidalem, sabab Junandalem taresna ka abdidalem, parenge salamet abdi se parcaja ka Junandalem.
3Junandalem Allah abdidalem, kaneserre abdidalem, sabab saare benteng abdidalem terros nyo’on ka Junandalem.
4Pagumbira’agi atena abdiepon Junandalem, Guste sabab ate abdidalem ngadhep ka Junandalem.
5Sabab Junandalem sae, Guste, sareng kasokan apareng sapora, oreng se adu’a ka Junandalem teptep ekaase’e sareng kataresna’an tadha’ batessa.
6Gateyagi du’a abdidalem, GUSTE, peyarsa’agi serro abdidalem se nyo’on partolongan.
7E dhalem karekongan abdidalem adu’a ka Junandalem, sabab Junandalem nyaodi abdidalem.
8Adhu Guste, tadha’ Pangeran akadi Junandalem, tadha’ se alampa’agi pa-ponapa akadi se elampa’agi Junandalem.
9Sadajana bangsa se ebadhi Junandalem bakal dhatengnga, Guste, nyemba’a ka Junandalem sareng mojiya kaagungannepon Junandalem.
10Sabab Junandalem parjuga sareng alampa’agi kaajiban-kaajiban, namong Junandalem Allah.
11Duduwagi ka abdidalem se daddi kasokannepon Junandalem, GUSTE, sareng abdidalem etoro’a kalaban esto; ajari abdidalem daddi oreng alem se ta’ nga-satengnga.
12Abdidalem asokkor ka Junandalem kantos ka dhasarra ate, Guste Allah Pangeran kaula; abdidalem badhi mojiya kamolja’annepon Junandalem salanjangnga.
13Sabab kataresna’annepon Junandalem ka abdidalem talebat rajana; Junandalem malopot nyaba abdidalem dhari lobangnga koburan.
14Ya Allah, oreng sombong jaga nyerrang abdidalem, oreng se kejjem saambalan mateyana abdidalem; reng-oreng gapaneka ta’ parduli ka Junandalem.
15Namong Junandalem, Guste, Allah se bellas sareng se ase, sabbar, talebat taresna sareng esto.
16Oladi sareng kabellasi abdidalem, pakowattagi sareng pasalamettagi abdidalem, sabab padha sareng ebu, abdidalem jugan abakte ka Junandalem.
17Parenge abdidalem tandhana kabecce’annepon Junandalem, GUSTE, sopaja oreng se baji’ ka abdidalem padha malo, manabi nengale ja’ sareng Junandalem abdidalem etolong sareng elepor.