Dual Panel1Palang kottha reya se possa’ ban kalecegan ban bannya’ oreng se dujan mate’e oreng, sarta possa’ ban barang rampasan.
2Edhingngagi monyena cometthe ban monyena rodha se saleng pakarethe’, garadabba sokona jaran se berka’ sarta rontagga kareta.
3Pasukan se nompa’ jaran nyerrang ce’ samangadda, peddhangnga ban tombagga arap-galirap. Oreng mate bannya’na ta’ ekenneng bitong, mayyidda apo’-tompo’, sampe’ oreng dhung-tatandhung.
4Niniwe sondel rowa teppa’na eberri’i okoman. Karaddinanna ngapencot ate ongguwan. Bannya’ bangsa se eseher ecacae ban oca’ se lemma’ manes.
5PANGERAN Se Mahakobasa adhabu, "He, Niniwe, bi’ Sengko’ ba’na eseksa’a! Ebangkangana e adha’na sa-bangsa, sampe’ ba’na malo, aebba etangale reng-oreng jareya.
6Bi’ Sengko’ ba’na epakantha barang se majitjit ate, ekotep ban cemmer egabay gun-tenggunna oreng.
7Oreng se nangale’e ba’na bakal nyoroda sarta ngoca’ bariya, ‘Niniwe kare galuntonganna! Tadha’ se endha’ noro’ sossana, tadha’ se endha’ alepora.’"
8He, Niniwe, masa’ ba’na abecce’an dhari Tebe, ibu kotthana Messer? Tebe badha e penggir songay se ngaobi akantha geddhung. Ongguwan, Songay Nil jareya binteng partahananna.
9Tebe marenta Sudan ban Messer, kobasana tadha’ batessa; Libiya ban Put daddi sakutuna.
10Maske kantha jareya, pandhudhu’ Tebe etawan ban eangko’ ka pambuwangan. E saneyap tapadhangdhang na’-ana’na epokole sampe’ mate. Para kaom oreng agunga ekalenthong bi’ rantay pas egi-bagi e antarana reng-oreng se nawan.
11He, Niniwe, ba’na bakal kalengngerra keya polana mabu’. Ba’na bakal aehteyara keya sopaja lopoda dhari so-mosona.
12Teng-bintengnga ba’na bakal padha’a ban bungkana ara se buwana lebba’ sa’-massa’. Mon bungkana jareya eondhu, buwana tanto ngalotor ka colo’na reng-oreng se terro ngakana buwa jareya.
13Rit-parjuridda ta’ andhi’ kakowadan akantha oreng babine’ ban nagarana ba’na ta’ bisa ngadhebbi moso sakale. Lang-palangnga labang sakethengnga ba’na bakal katonona.
14Temba aeng, gabay parsadhiya’an saabidda ba’na ekeppong, pakowat teng-bintengnga! Nyek-enyek lempong kagabay bata, sadhiya’agi pajitha’anna!
15Apa’a bai se elakone ba’na, tadha’ gunana, sabab ba’na bakal katonona sampe’ tadha’ karena otabana bakal tebasa e dhalem paperrangan. Ba’na bakal mosna’a akantha hasella teggal se ekakan balang. Ba’na sateya la bannya’, ana’-rana’ akantha balang!
16Gar-sodagarra ba’na abannya’an dhari bintang e langnge’! Tape sateya kabbi la mosna, akantha balang se ababbar kalembangnga pas ngabber maelang.
17Om-kaom oreng agungnga ba’na akantha balang se ngetek e budhiyanna geddhung e bakto cellep. Tape e bakto are moncar, kabbi padha ngabber maelang; tadha’ oreng se taowa ja’ entar dha’ emma.
18He rato nagara Asyur! Para gubennorra ba’na la mate, ban para bupatina la tedhung salanjangnga. Ra’yadda ba’na asalebbudan e pagunongan, tadha’ oreng settonga se bisa’a ngeba mole pole.
19Lokana ba’na ta’ ekenneng tambai, porona ta’ ekenneng pabaras. Reng-oreng se ngedhing berta parkara ancorra ba’na padha akopa’ kaperagan. Sabab oreng la padha nanggung sangsara kabbi lantaran kajahadanna ba’na se tadha’ ambuna.