Dual Panel1Areya’ para imam ban reng-oreng Lewi se abali dhari pambuwangan abareng ban Zerubabil ana’na Seyaltiyel sarta ban Imam Agung Yesuwa:
2Para imam: Seraya, Yeremiya, Ezra, Amarya, Malukh, Hatus, Sekhanya, Rehum, Meremot, Ido, Ginetoi, Abiya, Miyamin, Ma’aja, Bilga, Semaya, Yoyarib, Yedaya, Salu, Amok, Hilkiya ban Yedaya. Jareya mam-imam kapala e jamanna Yesuwa.
3(12:2)
4(12:2)
5(12:2)
6(12:2)
7(12:2)
8Reng-oreng Lewi: Pamimpinna nyanyeyan sokkor: Yesuwa, Binui, Kadmiyel, Serebiya, Yehuda ban Matanya.
9Anggotana padhuwa sowara se anyanyeyagi nyanyeyan jawaban: Bakbukya, Uni ban ca-kanca sakaomma.
10Areya’ garis toronanna Imam Agung Yesuwa: Yesuwa, Yoyakim, Elyasib, Yoyada,
11Yonatan, Yaduwa.
12Areya’ dhaftarra para imam kapala ban kaomma e bakto Yoyakim daddi Imam Agung: Imam ~~ Kaom; Meraya ~~ Seraya; Hananya ~~ Yeremiya; Mesulam ~~ Ezra; Yokanan ~~ Amarya; Yonatan ~~ Melikhu; Yusup ~~ Sebanya; Adna ~~ Harim; Helkai ~~ Merayot; Zakhariya ~~ Ido; Mesulam ~~ Gineton; Zikhri ~~ Abiya; … ~~ Minyamin; Piltai ~~ Mowaja; Samuwa ~~ Bilga; Yonatan ~~ Semaya; Matnai ~~ Yoyarib; Uzi ~~ Yedaya; Kalai ~~ Salai; Heber ~~ Amok; Hasabya ~~ Hilkiya; Netane’el ~~ Yedaya;
13(12:12)
14(12:12)
15(12:12)
16(12:12)
17(12:12)
18(12:12)
19(12:12)
20(12:12)
21(12:12)
22Dhaftarra la-kapala kalowargana oreng Lewi ban kalowargana para imam la ecathet e jamanna para Imam Agung se kasebbut e baba reya: Elyasib, Yoyada, Yokanan ban Yaduwa. Catheddan jareya la mare e bakto Darius jumenneng rato Persiya.
23Tape parkara la-kapala kalowargana kaom Lewi pera’ ecathet sampe’ jamanna Yonatan kompoyya Elyasib.
24E bakto epimpin Hasabya, Serebiya, Yesuwa, Binui ban Kadmiyel, reng-oreng Lewi egi-bagi epadaddi pan-barampan galumpo’. Ne-samane badha galumpo’ dhadhuwa’ se kodu moji PANGERAN ban asokkor ka Salerana kalaban cara ot-saodan, menorot atoranna Rato Daud, abdina Allah rowa.
25Para panjagana labang sakethengnga Padalemman Socce se epajaga mar-kamar pangandhuwan bahanna kakanan e seddi’na labang sakethengnga Padalemman Socce iya areya: Matanya, Bakbukya, Obaja, Mesulam, Talmon ban Akub.
26Reng-oreng jareya odhi’ e jamanna Yoyakim pottrana Yesuwa bajana Yozadak ban e jamanna Gubennor Nehemiya ban Imam Ezra, ahli Hokom rowa.
27E bakto geddhungnga kottha Yerusalim eresmeyagi, reng-oreng Lewi eolok dhari kennengnganna bang-sebang, sopaja ngennenga noro’ maramme kadaddiyan jareya ban nyanyeyan sokkorra se acem-macem sarta ban mosik gambus sarta calempong.
28Kang-tokang nyanye dhari ga-kalowarga Lewi laju padha akompol dhari kennengnganna bang-sebang; badha se dhari sabingkerra Yerusalim, badha keya se dhari tha-kottha e sabingkerra Netofa,
29dhari Bet-Gilgal, Geba ban Azmawet.
30Para imam ban reng-oreng Lewi jareya ajalannagi opacara ababerse kaangguy aba’na dibi’, saellana pas kaangguy ra’yat, bang-labang saketheng ban dhung-geddhungnga kottha.
31Sengko’ ngatore para pamimpin Yehuda ongga ka attassa geddhung kaangguy ngator reng-oreng se epadaddi dhu galumpo’ raja se epabarisa alenglenge kottha sambi anyanye pojiyan sokkor ka Allah. Galumpo’ se settong abaris e attassa geddhung, ajalan ka kangan, ka Labang Saketheng Bu-rombu.
32Hosaya ajalan e budhiyanna para tokang nyanye, etoro’ bunte’ bi’ para pamimpinna oreng Yehuda.
33Para imam e baba reya ajalan e budhiyanna reng-oreng buru sambi nope tarompet: Azarya, Ezra, Mesulam, Yehuda, Benyamin, Semaya ban Yeremiya. E budhiyanna etoro’ bunte’ bi’ Zakhariya ana’na Yonatan, kompoyya Semaya. Bangatowana e antarana iya areya: Matanya, Mikha, Zakur dhari kaom Asaf.
34(12:33)
35(12:33)
36Se ajalan e budhiyanna iya areya para anggotana kaomma, iya areya: Semaya, Azare’el, Milalai, Gilalai, Ma’ai, Netane’el, Yehuda ban Hanani. Kabbi padha ngeba pakakassa mosik, padha ban se eagem Rato Daud, abdina Allah rowa. Imam Ezra, ahli Hokomma Allah rowa alomampa e bagiyan paleng adha’.
37Sanapa’na ka Labang Saketheng Aeng Nancel, reng-oreng jareya padha abiluk pas ongga ka dhak-ondhak se nojju ka Kottha Daud, lebat e karatonna Daud, pas terros sampe’ ka geddhung e Labang Saketheng Aeng e bagiyan temorra kottha.
38Galumpo’na tokang nyanye settonganna abaris e attassa geddhung ajalan ka kacer; sengko’ noro’ bunte’ abareng ban sabagiyan dhari ra’yat. Dhari jadhiya se abaris lebat Manara Kampowan sampe’ ka Geddhung Lebar.
39Saellana jareya pas lebat e Labang Saketheng Efraim, Labang Saketheng Laju, Labang Saketheng Juko’, Manara Hanane’el ban Manara Me’a sampe’ ka Labang Saketheng Dumba. Barisan jareya ambu e seddi’na Labang Saketheng Panjaga’an e seddi’na Padalemman Socce.
40Galumpo’na tokang nyanye se dhadhuwa’ jareya pas napa’ ka seddi’anna Padalemman Socce. E dhalem tang kalompo’, salaenna para pamimpin
41badha keya mam-imam se nope tarompet, iya areya: Elyakim, Ma’aseya, Minyamin, Mikha, Elyoënai, Zakhariya ban Hananya;
42se ajalan e budhiyanna iya areya Ma’aseya, Semaya, Eleyazar, Uzi, Yokanan, Malkiya, Elam ban Ezer. Para tokang nyanye jareya anyanye epimpin Yizrahya.
43E are jareya bannya’ kurban se eatorragi ka PANGERAN. Ra’yat neng-sennengngan polana Allah apareng kasennengngan se raja. Babine’an ban na’-kana’ noro’ apesta keya. Sowarana reng-oreng jareya ce’ peragga, ekaedhing sampe’ ka jauna.
44E bakto jareya badha reng-oreng se epajaga mar-kamar pangandhuwanna bahan kakanan, kennengngan panyempennanna sombangan kaangguy Padalemman Socce, tamaso’ tor-ator parsapolowan ban hasella bume se dha’-adha’ sabban taon. Para pangawas jareya wajib makompol sombangan jareya dhari gal-teggal e sabingkerra tha-kottha. Sombangan jareya epassra’agi ka para imam ban oreng Lewi, menorot atoranna Hokom. Reng-oreng Yehuda ngargai para imam ban reng-oreng Lewi jareya,
45sabab para imam ban reng-oreng Lewi jareya se ajalannagi opacara ababerse ban ra-opacara laenna se edika’agi bi’ Allah. Para tokang maenna mosik ban panjagana labang sakethengnga Padalemman Socce ajalannagi kawajibanna keya, menorot atoranna Rato Daud ban Sulaiman, pottrana.
46Molae jamanna Rato Daud ban ahli mosik Asaf, para tokang nyanye anyanye gu-lagu pojiyan kaator ka Allah.
47E jamanna Zerubabil, bariya keya e jamanna Nehemiya, ra’yat Isra’il kabbi padha aberri’ sombangan kaangguy nyokobi kabutowanna para tokang nyanye ban panjagana labang sakethengnga Padalemman Socce re-saarena. Ra’yat ngeba tor-ator se malolo kaangguy reng-oreng Lewi; bi’ reng-oreng Lewi sabagiyan dhari tor-ator jareya ebagi ka para imam toronanna Harun, se bannya’na la etantowagi.