Dual Panel1Ta’ saapa abidda dhari jareya bannya’ oreng Yahudi, lalake’an ban babine’an, molae aserrowan parkara reng-oreng sabangsana.
2Badha se ngoca’ kantha reya, "Tang ana’ bannya’, buto gandum sopaja bisa’a odhi’."
3Se laen ngoca’ barinna’, "Sengko’ tapaksa magadhi teggal, kebbun anggur ban bengko, polana parlo melleya gandum me’ olle ta’ mate kalaparan."
4Badha pole se ngoca’ bariya, "Sengko’ ngenjam pesse epamajar pajek se eteptebbagi bi’ rato menangka pajegga teggal ban kebbun anggur.
5Sengko’ reya gu ta’ oreng Yahudi keya? Tang ana’ gu ta’ padha ban ana’na reng-oreng Yahudi laenna? Tape tang na’-ana’ tapaksa epadaddi dunor. La’-mala’ badha tang ana’ se paraban tapaksa ejuwal epadaddi dunor. Sengko’ ban reng-oreng laenna padha ta’ ngenneng apa-rapa sabab tang teggal ban kebbun anggur la epagadhi."
6Ngedhing serro se kantha jareya sengko’ laju ce’ peggella,
7ban sengko’ pas motossagi ja’ sengko’ ta’ ngenneng neng-enneng malolo. Daddi sengko’ laju ngoca’e para pamimpinna ra’yat. Ca’na sengko’, "Sampeyan paneka nyamana nendhes tan-taretanna dibi’!" Saellana jareya sengko’ mabadha rapat omom parlo ngorosa parkara jareya,
8laju ngoca’, "Sampeyan sareng kaula aehteyar amba’ pate nebbus tan-taretan oreng Yahudi laenna se tapaksa ajuwal aba’na ka bangsa manca. Tape samangken la’-mala’ sampeyan dibi’ se maksa tan-taretan ganeka ajuwal aba’na ka sampeyan, mangkana sampeyan oreng Yahudi jugan!" Para pamimpin Yahudi jareya ta’ bisa nyaot sakeccaba balakka’.
9Sengko’ laju ngoca’ pole, "Lalakonna sampeyan ganeka ta’ sae! Masthena sampeyan tako’ ka Allah e dhalem odhi’na. Kalaban cara se sapaneka moso se ta’ ngakone Pangeran ka’issa’ sareng sampeyan ta’ eberri’ kasempadan ya-nyeya bangsana sampeyan.
10Kaula dibi’, tan-taretan sareng ca-kanca kaula maenjam pesse ban gandum ka ra’yat. Pesse ban gandum se eenjammagi ganeka ta’ epenta pole.
11Daddi sampeyan dibi’ tore padha matadha’ otangnga ra’yat ka sampeyan ganeka, otang se aropa pesse otaba gandum otaba anggur sareng mennya’ jaitun. Duli pabali teggal, kebbun anggur sareng kebbun jaitun sarta bengkona reng-oreng ganeka!"
12Para pamimpin jareya nyaot, "Petoduna panjennengngan gapaneka sareng kaula etoro’a. Sadajana epabaliya, sarengngan pole reng-oreng gapaneka ta’ epenta’ana bajaran pa-ponapa." Sengko’ laju ngolok para imam. Pin-pamimpin gella’ bi’ sengko’ laju esoro asompa e adha’na mam-imam jareya, ja’ sabarang se la ekoca’agi gella’ pajat ejalannagiya ongguwan.
13Saellana jareya sengko’ pas mokka’ tang sabbu’ salempang, laju egebbessagi sambi ngoca’, "Moga cara’a paneka Allah ngebbessa saneyap oreng se ta’ neptebbi janjina. Oreng ganeka bakal malarada, bengkona ban dhi’-andhi’na bakal epondhuda sareng Allah!" Reng-oreng se padha akompol jareya nyaot kabbi, "Amin!" laju moji PANGERAN. Para pamimpin jareya padha neptebbi janjina.
14Sengko’ la daddi gubennor Yehuda dhubellas taon abidda, iya areya molae dhari taon se kapeng dhu polo sampe’ taon se kapeng tello polo dhuwa’ pamarenta’anna Rato Artahsasta. Saabidda jareya, sengko’ ban tang tan-taretan ta’ tao ngala’ tang tunjangan menangka gubennor.
15Nor-gubennor se sabellunna sengko’ maberra’ ra’yat sabab menta pa’polo pesse salaka saare kaangguy kakan ban anggur. La’-mala’ ba-ponggabana nendhes ra’yat keya. Tape sengko’ ta’ endha’ kantha jareya sabab sengko’ tako’ ka Allah.
16Tang kakowadan bi’ sengko’ kabbi eangguy kaangguy kaparlowan se maddek pole geddhungnga kottha reya, ban sengko’ ta’ olle tana sakone’a menangka opana, maske tang bareng padha noro’ alako kabbi abanto lalakon maddek geddhung jareya.
17Saratos saeket oreng Yahudi ban para pamimpinna bi’ sengko’ biyasa epangakan e tang bengko, gi’ ta’ kabitong moy-tamoy dhari sa-bangsa tatangga.
18Sabban are sengko’ nyadhiya’agi sape settong, dumba nem-ennem se po-lempo ban ajam sabannya’na; jareya kabbi ngangguy tang pesse dibi’. Laen dhari jareya, sabban sapolo are sengko’ nyadhiya’agi anggur sacokobba. Maske kantha jareya sengko’ ta’ endha’ menta tang tunjangan jabatan se daddi gubennor, sabab sengko’ tao ja’ tanggunganna ra’yat la cokop berra’.
19Abdidalem nyo’ona, Guste Allah, kaemodi sadaja se elakone abdidalem kaangguy bangsa ka’dhinto, ban kasokana Junandalem aberkadi abdidalem.