Alkitab Mobile SABDA
[VER] : [MADURA]     [PL]  [PB] 
 <<  Rut 3 >> 

1Ta’ abit dhari jareya Na’omi ngoca’ ka Errut, "Sengko’ kodu aehteyar sopaja ba’na bisa’a ako-bengko pole sopaja ba’na bisa’a senneng odhi’na.

2Ba’na gu ta’ alako abareng ban babine’an e teggalla Bowas, ta’ iya? Bowas jareya balana sengko’ ban ba’na. Daddi, mara edhingngagi! Dhaggi’ lem-malem Bowas ngerega gandum e teggalla.

3Sateya, kassa’ mandhi, ngangguy mennya’ ro’om, angguy kalambina se paleng bagus. Pas entar ka kennengnganna Bowas agebba gandumma. Nante’ e jadhiya sampe’ Bowas mare adha’ar ban ngenom, tape ja’ sampe’ Bowas tao ja’ ba’na badha e jadhiya.

4Abassagi e dhimma kennengnganna Bowas tedhung. Mon Bowas la ngeddha, entare ka seddi’anna, bukka’ sapo’na, ba’na pas marobbu e seddi’anna sokona. Ba’na tanto pas ebalai apa se kodu elakone ba’na."

5Saodda Errut, "Enggi. Sadaja dhabuna sampeyan sareng kaula elakonana."

6Errut mangkat ka kennengnganna oreng agebba gandum; sabarang se epessennagi mattowana elakone kabbi.

7Samarena ngakan ban ngenom, Bowas arassa senneng, pas entar tedhung e seddi’anna tompo’anna gandum. Errut ta’ asa’-kasa’ nyander ka seddi’anna Bowas, mokka’ sapo’na Bowas pas marobbu e seddi’na sokona.

8E baja malem o-tao Bowas ngedhing, pas abali’. Bowas takerjat polana badha babine’ tedhung e seddi’na sokona.

9"Sapa ba’na?" ca’na patanyana. "Abdina Errut, Pa’," saodda Errut. "Panjennengngan balana mattowa abdina se kodu ngorossagi odhi’na abdina. Ngereng abdina karaji."

10"Moga-moga PANGERAN aberkadi ba’na, na’," ca’na Bowas. "Mon ebandhing ban apa se la elakone ba’na ka mattowa bine’na, se ejalannagi ba’na sateya reya noduwagi kaestowanna ba’na se araja’an pole. Ba’na bisa nyare lake se gi’ ngodha e antarana oreng se sogi otaba se mesken, tape ba’na ta’ mele jalan jareya.

11Daddi, ba’na ta’ osa kobater. Apa pamentana ba’na bi’ sengko’ etorodana; sabab oreng e kottha reya la tao kabbi ja’ ba’na reya babine’ se bagus tengkana.

12Pajat bendher, sengko’ reya se kodu ngoros odhi’na ba’na, sabab sengko’ gi’ bala rapet ka ba’na. Tape gi’ badha lalake’ laen se kodu ngoros odhi’na ba’na, sabab tamaso’ bala se gi’ arapeddan pole ka ba’na mon ebandhing ban sengko’.

13Samalem reya ba’na neng e dhinna’ bai. Lagguna gu-laggu sengko’ atanya’a ka lalake’ jareya apa endha’ otaba enja’ ajalannagi tanggung jawabba ka ba’na. Mon oreng jareya endha’, nyaman. Tape mon ta’ endha’, sengko’ asompa’a kalaban asmana Allah se odhi’, sengko’ ajalannagiya tang tanggung jawab ka ba’na. Sateya ba’na la tedhung e dhiya gallu sampe’ lagguna gu-laggu."

14Daddi Errut tedhung e seddi’na sokona Bowas e jadhiya. Kalagguwanna sabellunna are tera’, Errut la jaga tako’ etemmo oreng, sabab ca’na Bowas lebbi becce’ tadha’ oreng tao ja’ Errut badha e jadhiya samalem.

15Ca’na Bowas ka Errut, "Bukka’ salendhangnga ba’na, ampar e dhinna’." Errut mokka’ salendhangnga se pas eampar e jadhiya. Bowas notta’ gandum ra-kera dhu polo kilo ka salendhang jareya. Salendhang se aesse gandum jareya bi’ Bowas eangka’agi pas esaba’ ka bauna Errut. Saellana jareya Bowas pas entar ka kottha.

16Sanapa’na Errut ka bengkona, mattowana atanya, "Baramma daddina, na’?" Errut nyareta’agi sabarang se elakowagi Bowas ka aba’na.

17"La’-mala’ Bowas dibi’ se marenge gandum paneka," ca’na Errut pole, "sabab ca’epon Bowas kaula ta’ kengeng paleman ta’ kalaban ngeba pa-ponapa."

18Ca’na Na’omi, "Sateya ba’na pasabbar gallu, nante’ baramma daddina reya kabbi. Bowas ta’ kera neng-enneng mon orosan reya gi’ ta’ mareya are teya."


  Share Facebook  |  Share Twitter

 <<  Rut 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel