Dual Panel1"Mon ba’na entar aperrang ban so-mosona, ja’ tako’ mon nangale’e kareta perrangnga mosona ban ran-jaranna se bannya’ sarta tantarana se abannya’an dhari ba’na. GUSTE Allahna ba’na se la mabebas ba’na dhari Messer, tanto nolonge ba’na keya.
2Sabellunna molae aperrang, kodu badha settong imam se maju pas acaca kantha reya ka ba’na,
3‘Tan-taretan, ngereng peyarsa’agi! Are mangken sampeyan aperranga. Ja’ tako’, sareng ja’ kene’ ate otaba bingong.
4GUSTE Allah bakal nolongana sampeyan, aparenga kamennangan ka sampeyan.’
5Saellana jareya para parwira kodu ngoca’ kantha reya ka ba’na, ‘E antarana sampeyan ba’ badha’a se gi’ buru abadhi compo’, tape gi’ ta’ mabadha opacara paresmeyanna? Manabi badha, kengeng paleman. Manabi bunten, manabi oreng ganeka mate e paperrangan, compo’na bakal ekennengngana oreng laen.
6E antarana sampeyan ba’ badha’a se gi’ buru namenne kebbun anggurra sareng gi’ ta’ sempat molong buwana? Manabi badha, kengeng paleman. Sabab manabi bunten, manabi oreng ganeka mate e paperrangan, tanto oreng laen se ngala’ hasella.
7E antarana sampeyan ba’ badha’a se gi’ abakalan sareng bakal aneka’a? Manabi badha, kengeng paleman. Manabi bunten, manabi oreng ganeka mate e paperrangan, bakalla tanto ekabine oreng laen.’
8Para parwira jareya kodu ngoca’ kantha reya keya ka ba’na, ‘E antarana sampeyan ba’ badha’a se gupo otaba tako’? Manabi badha, kengeng paleman, sopaja ta’ marosak samangadda oreng laen.’
9Saellana para parwira la acaca ka tantarana, pas kodu pele pin-pamimpinna saneyap kasatuwan.
10Mon ba’na nyerrangnga settong kottha, oreng kottha jareya berri’i gallu kasempadan kaangguy atellok.
11Mon reng-oreng kottha jareya mokka’ bang-labang sakethengnga sarta atellok, reng-oreng jareya kabbi kodu ekadunor ba’na ban ekenneng palako paksa bi’ ba’na.
12Tape mon reng-oreng kottha jareya ta’ endha’ atellok ban asoka’an aperrang, keppong kottha jareya.
13Saellana jareya, mon GUSTE Allah la apareng jalan ka ba’na se arebbu’a kottha jareya, ba’na kodu mate’e sakabbinna oreng lalake’an e kottha jareya.
14Tape ba’na olle ngala’ babine’anna, na’-kana’na, ebinna ban apa’a bai se badha e kottha jareya. Dhi’-andhi’na mosona ba’na jareya olle angguy kabbi. Jareya kabbi la eparengngagi ka ba’na bi’ GUSTE Allahna.
15Tha-kottha se jau dhari nagara se ekennengnge ba’na jareya kodu pakantha jareya.
16Tape mon kottha jareya badha e dhalem nagara se eparengngagi GUSTE Allah ka ba’na, pandhudhu’na kodu pate’e kabbi.
17Menorot se edhabuwagi GUSTE Allahna, ba’na kodu mate’e reng-oreng Het, Amori, Kana’an, Feris, Hewi ban Yebus.
18Pate’e kabbi reng-oreng jareya sopaja ta’ sampe’a madusa ba’na ka GUSTE Allah lantaran ngajari ba’na ngalakone sabarang se majitjit, abakte ka la’-alla’anna.
19Mon ba’na merrange settong kottha ban ngeppong kottha jareya sampe’ abit, ja’ moger bungkana wa’-buwa’an e jadhiya. Kakan buwana tape ja’ parosak bungkana, sabab ka’-bungka’an jareya banne mosona ba’na.
20Ka’-bungka’an jareya olle poger mon ekagabaya pagar pangeppongan sampe’ kottha jareya atellok."