Dual Panel1Sabellunna seda, Mosa, otosanna Allah, aberkadi bangsa Isra’il, dhabuna:
2"PANGERAN rabu dhari Gunong Sinay; akantha are moncar e attassa kottha Edom nyonare ommadda dhari Gunong Paran. Eerengngagi malaekat sapolo ebu, e kanganna badha apoyya se rabbang.
3PANGERAN reya taresna ka ommadda ajaga tor masalamet oreng se ngabdi ka Salerana. Mara asojud e padana ban ngestowagi papakonna.
4Toro’ hokom paparengnga Mosa, papondhinna bangsa reya se paleng aji.
5E bakto Isra’il akompol ban para pamimpinna, PANGERAN daddi rato marenta ommadda."
6Parkara suku Ruben Mosa adhabu kantha reya: "Mandar suku Ruben ta’ sampe’a mosna, maske bannya’na ta’ saapa."
7Parkara suku Yehuda dhabuna kantha reya: "GUSTE, peyarsa’agi serrona suku Yehuda; pakompollagi pole sareng bangsana. Tolonge e dhalem perrang, banto e dhalem ngadhebbi mosona."
8Parkara suku Lewi dhabuna kantha reya: "Kalaban Urim ban Tumim dhabuwagi karsaepon Junandalem, kalaban parantara’annepon oreng Lewi, abdiepon Junandalem se esto. Neng e Masa oreng Lewi sareng Junandalem eoji, neng e somber Meriba nyata esto kabbi.
9Oreng Lewi ka Junandalem ce’ estona, ngongkole kaestowanna ka oreng towana sareng ka la-balana. Papakonna Junandalem eestowagi, parjanjiyannepon Junandalem eteptebbi.
10Oreng Lewi ngajari ommattepon Junandalem sopaja padha’a ta’at ka hokommepon Junandalem, sareng ngatorragi kurban e mezbaepon Junandalem.
11GUSTE, tolonge suku gapaneka me’ olle kowat, moga Junandalem kasokana ka sadajana lalakonna. Paancorragi so-mosona sopaja ta’ bisa’a jaga pole saterrossa."
12Parkara suku Benyamin dhabuna kantha reya: "Areya’ suku se ekataresnae PANGERAN; se esarengnge salanjangnga, ejaga e baja malem ban e bakto seyang."
13Parkara suku Yusup dhabuna kantha reya: "Moga tanana eberkadana bi’ PANGERAN, eparenge ojan ban aeng dhari dhalem bume.
14Moga e sabban sem-moseman tanana possa’a ban wa’-buwa’an, wa’-buwa’an se paleng nyaman se massa’ e bungkana.
15Mo’-gumo’na se la badha dhari jaman kona moga possa’a ban hasella tana se man-nyaman.
16Moga tanana epabannya’a hasella se bagus, ban eberkadi bi’ kabecce’anna PANGERAN se abu-dhabu dhari ombut se rabbang. Moga berkat jareya torona ka na’ potona Yusup, sabab Yusup reya pamimpin e antarana tan-taretanna.
17Yusup kowadda padha ban bantheng, ban tandhu’na sape alas lake’. Tandhu’na iya areya Manasye se abun-ebun ban Efraim se apolowan ebu. Sa-bangsa laen esodhuk esothok sampe’ ka konco’na bume."
18Parkara suku Zebulon ban Isakhar dhabuna kantha reya: "Moga Zebulon ma’mora odhi’na lantaran parjalanan-parjalananna, ban Isakhar sennengnga e bengkona.
19Se kadhuwa jareya ngonjang reng-oreng manca ka nong-gunongnga ban ngatorragi kurban se bendher e dhissa’. Se kadhuwa jareya sogi ollena dhari tase’ ban dhari beddhi e salanjangnga paseser."
20Parkara suku Gad dhabuna kantha reya: "Molja’agi Allah se nambai baba kakobasa’anna Gad. Gad nyendhemme akantha macan se nyebbida lengngen otaba kole’na cethak.
21Tana se paleng becce’ ekala’ dibi’, bagiyanna pamimpin ebagi ka suku jareya. Hokom ban papakonna PANGERAN eestowagi kabbi e bakto pamimpin Isra’il teppa’na akompol e jadhiya".
22Parkara suku Dan dhabuna kantha reya: "Dan reya akantha macan se gi’ ngodha, se alonca’ ka lowar dhari Basan."
23Parkara suku Naftali dhabuna kantha reya: "Naftali eparenge berkat ban kataresna’anna PANGERAN se ta’ sakera-kera; baba kakobasa’anna molae dhari Talaga Galilea sampe’ ka lao’."
24Parkara suku Asyer dhabuna kantha reya: "Asyer eberkadi alebbiyan dhari ku-suku laenna, Asyer ekataresnae tan-taretanna, bungkana jaitun tombu landhu e tanana.
25Moga tha-kotthana epakokowa ban bang-labang besse sarta dimbaga, sopaja odhi’na taremtem salanjangnga."
26"E, Isra’il! Tadha’ la’-alla’an se padha ban Allahna ba’na, se lebat e langnge’ e dhalem kamolja’anna, narabas ondhem nolongana ba’na.
27Allah salanjangnga se ajaga ba’na, lengngenna se langgeng daddi panyandharanna ba’na. Mosona ba’na eojuk kabbi, me’ olle ta’ lang-ngalange jalanna ba’na, ban ba’na epakon matompes mosona sampe’ tadha’ karena.
28Daddi toronanna Yakub bakal taremtemma odhi’na e nagara se ta’ kakorangan gandum ban aeng anggur, ban dhari langnge’ toron ebbun se agili ka bumena.
29Isra’il, pojur onggu ba’na reya! Tadha’ bangsa laen se etolonge PANGERAN akantha ba’na. PANGERAN dibi’ se daddi peddhang ban tamengnga ba’na, se nolonge ba’na ban apareng kamennangan. So-mosona ba’na bakal dhatengnga nyo’on kabellasan, tape bi’ ba’na padha eda’-didda’".