Dual Panel1E bakto nangale’e jareya sengko’ pas labu tajarungngep ka tana. Sengko’ pas ngedhing sowara se adhabu kantha reya, "He, manossa se ta’ langgeng, mara manjeng. Sengko’ acaca’a ka ba’na."
2E bakto sengko’ ngedhing sowara jareya, Errohna Allah maso’ ka dhalem sengko’; sengko’ pas epajaga. Saellana jareya sengko’ pas ngedhing pole sowara gella’, dhabuna,
3"He, manossa se ta’ langgeng, bi’ Sengko’ ba’na eotosa ka reng-oreng Isra’il se aberonta’ ka Sengko’ rowa. Reng-oreng jareya daddi tokang aberonta’ akantha para bangatowana.
4Reng-oreng jareya cengkal ban ta’ endha’ ngormat ka Sengko’. Bi’ Sengko’ ba’na eotosa ka reng-oreng jareya kaangguy manapa’ apa se ekoca’agi Sengko’, Pangeran, ALLAH Se Mahatenggi ka reng-oreng jareya,
5ta’ tao apa reng-oreng jareya endha’ ngedhingngagi otaba enja’; se parlo, reng-oreng jareya kodu tao ja’ badha nabbi e nga’-tengnga’anna aba’na."
6Tape ba’na, manossa se ta’ langgeng, ba’na ta’ osa tako’ ka reng-oreng pamberonta’ jareya, otabana ka apa’a bai se ekoca’agi reng-oreng jareya. Ba’na bakal elabana ban eya’-seya’a bi’ reng-oreng jareya, sampe’ ba’na katon odhi’ e kennengnganna kalajengking. Tape, ba’na ta’ osa tako’.
7Kabala sakabbinna Tang pessen ka reng-oreng jareya, ta’ parduli reng-oreng jareya endha’ ngedhingngagi otabana enja’. Kaenga’e, reng-oreng jareya pamberonta’.
8He, manossa se ta’ langgeng, edhingngagi apa se ekoca’agiya Sengko’ ka ba’na reya. Ja’ noro’ aberonta’ keya. Bukka’ colo’na, kakan apa se ebagi Sengko’ ka ba’na.
9Saellana jareya sengko’ nangale’e badha tanang se ejuluwagi ka sengko’. E dhalem tanang jareya badha ketab gulungan,
10se badha tolesanna e adha’ ban e budhina. Gulungan jareya pas ebukka’; e jadhiya badha tolesanna se aesse tangesan ban serrona oreng.