Dual Panel1PANGERAN adhabu ka sengko’,
2"He, manossa se ta’ langgeng, basto Yerusalim. Basto ngan-kennengnganna kabakteyan e jadhiya. Parengeddi tana Isra’il
3ja’ Sengko’, PANGERAN, ngoca’ kantha reya, ‘Sengko’ reya mosona ba’na. Sengko’ ngonosa Tang peddhang ban mateyana ba’na kabbi, se jahat ban se becce’.
4Sengko’ ngangguya Tang peddhang ngadhebbana sakabbinna oreng dhari dhaja sampe’ ka lao’.
5Daddi oreng bakal taowa kabbi ja’ Sengko’, PANGERAN, ngonos Tang peddhang ban ta’ mamaso’a peddhang jareya ka barangkana pole.’"
6"He, manossa se ta’ langgeng, mara aserro e adha’na oreng Isra’il, ba’na pakaton akantha se potos pangarep.
7Mon reng-oreng jareya atanya arapa ba’na me’ aserrowan, kabala ja’ ba’na sossa polana kabar se bakal dhatengnga. Kabar jareya makettera atena reng-oreng Isra’il jareya, malempowa tanangnga, mangetterra to’odda, mapotonga samangadda. Onggu, baktona la napa’, ban jareya kabbi bakal kalakona. Sengko’ GUSTE Allah Se Mahatenggi la ngoca’."
8PANGERAN adhabu ka sengko’,
9"He, manossa se ta’ langgeng, mara ba’na aramal! Kabala ka reng-oreng ja’ Sengko’, PANGERAN, ngoca’ kantha reya, ‘Badha peddhang, peddhang se eossowe ban egangse.
10Peddhang jareya egangse me’ olle ekenneng angguy mate’e oreng, eossowe me’ olle agalirap berse. Tang ommat la ta’ kera perak pole, sabab okoman ban parengeddan ta’ eparduli kabbi.
11Peddhang jareya egangse sopaja to-sabakto ekennenga angguy, pas epassra’agi ka tokang jagal.
12He, manossa se ta’ langgeng, mara nanges sambi aera’! Sabab peddhang jareya la epasadhiya epajagala Tang ommat. Para pamimpin Isra’il ban bangsana kabbi ecocowa bi’ peddhang jareya sampe’ mate. Daddi mara bukbuk dhadhana ba’na sambi pangennes atena!
13Sabab Sengko’ parappa’na ngoji Tang ommat, mon reng-oreng jareya ta’ endha’ ngoba tengkana, jareya kabbi bakal kalakona ka aba’na.’"
14"Daddi, manossa se ta’ langgeng, mara aramal. Mara akopa’, menangka tandha ka peddhang jareya kaangguy molae ajagal. Peddhang jareya talebat nako’e.
15Peddhang jareya makene’ atena Tang bangsa sampe’ padha labu tatandhung. Sengko’ ngara kotthana Tang bangsa jareya bi’ peddhang se agalirap akantha dhap-keddhap, se la epasadhiya kaangguy mate’e oreng.
16He, peddhang se tajem, mara tatta’ ka kangan ban ka kacer, ka dhimma’a bai sakarebba ba’na.
17Sengko’ akopa’a keya, saellana jareya peggella Tang ate bakal terebba. Sengko’, PANGERAN, la ngoca’."
18PANGERAN adhabu ka sengko’, dhabuna,
19"He, manossa se ta’ langgeng, gambar lorong dhadhuwa’ se bisa elebadi rato Babil se ngeba peddhang. Lorong se dhadhuwa’ jareya konco’na kodu padha molae e nagara se padha; se settong lorong ka Raba, kottha Amon; settonganna ka Yerusalim, kottha se abinteng e Yehuda. Pasange papan panoduna jalan e kennengnganna lorong jareya acangka.
20(21:19)
21Rato Babil manjeng e seddi’anna papan petoduna jalan jareya. Sopaja taowa lorong se kemma se elebadana, rato jareya menta petodu ka la-brahalana, ngocco’ pana ban mareksa atena keban se gi’ buru ekurbannagi.
22Pana se ejumbu’ bi’ tanang kanganna atandha Yerusalim! Jareya artena rato Babil kodu nyerrang kottha Yerusalim, aera’ ngoca’agi cerrengnga paperrangan ban nyoro tantarana nyoson pakakas se magujura labang ban geddhungnga moso, nyoro masang pakakas jareya e bang-labang sakethengnga Yerusalim, tantarana esoro nombuk tana egabay geddhung pangeppongan, sarta agabay gan-sellogan partahanan.
23Pandhudhu’ Yerusalim ta’ kera parcaja ja’ nagarana eserrang moso, sabab Yerusalim la mabadha parjanjiyan ban Babil. Tape ramalan reya bakal maenga’a reng-oreng jareya ja’ aba’na bakal etangkebba polana sa-dusana.
24Sengko’, GUSTE Allah Se Mahatenggi, ngoca’ ka reng-oreng jareya, ‘Sa-dusana ba’na la etemmo ban oreng padha tao kabbi ja’ ba’na sala. Kajahadanna ba’na etangale e saneyap tengkana ba’na. Sateya la napa’ baktona ba’na eokoma, ban ba’na bi’ Sengko’ epassra’agiya ka mosona.’
25Ban ka rato Isra’il Sengko’ ngoca’, ‘He, rato se jahat ban daraka! Sa’at okomanna ba’na se dhi-budhi la para’.
26Sengko’, GUSTE Allah Se Mahatenggi la ngoca’. Bukka’ makothana ban surbanna jareya. Sateya kabadha’an la aoba. Angka’ oreng mesken, berri’i kobasa! Patoron para pangobasa dhari korsena!
27Kottha reya bi’ Sengko’ epaancora sampe’ tadha’ karena, sampe’ e man-dhimman pera’ kare jur-gujuranna. Tape jareya buru kalakona mon oreng se epele bi’ Sengko’ kaangguy ngokoma kottha reya la dhateng. Ka oreng se epele Sengko’ jareya kottha reya bi’ Sengko’ epassra’agiya.’"
28"He, manossa se ta’ langgeng, mara aramal! Kabala ka oreng Amon se ya-nyeya Isra’il rowa ja’ Sengko’, GUSTE Allah Se Mahatenggi, ngoca’ kantha reya, ‘Peddhang la epasadhiya se ajagala; peddhang jareya la egangse agalirap akantha dhap-keddhap, sopaja to-sabakto ekenneng angguy mate’e.
29Pangatonan se etangale’e ba’na rowa palsu, ban ramalan se ekoca’agi ba’na rowa lecek. Ba’na jahat ban daraka, ban sa’at kaangguy okomanna ba’na se dhi-budhina la dhapa’. Peddhang jareya natta’a le’erra ba’na.
30He, oreng Amon, maso’agi peddhangnga ba’na ka barangkana! Bi’ Sengko’ ba’na eadilana e kennengnganna ba’na ecepta’agi ban elahirragi.
31Peggella Tang ate se lap-ngolap bi’ Sengko’ eteba’agiya ka ba’na. Ban ba’na bi’ Sengko’ epassra’agiya ka reng-oreng se kejjem se la elate mateyana oreng.
32Ba’na bakal tompessa ekakan apoy. Dharana ba’na bakal ngalocora e nagarana dibi’, ban tadha’ oreng settonga se gi’ enga’ ka ba’na. Sengko’, PANGERAN la ngoca’.’"