Dual Panel1Allah adhabu, "He, manossa se ta’ langgeng, kassa’ ngala’ bata settong, saba’ e adha’na ba’na, pas gambar kottha Yerusalim e attassa bata jareya.
2Pas gambarragi pole pangepponganna kottha jareya, ban sok-soksogga, buk-tembuganna tanana, parkemahan-parkemahanna ban kas-pakakas e sakalenglengnga geddhungnga se eangguya magujur geddhung jareya.
3Ngala’ panci besse, anggep jareya menangka pagar besse; saba’ panci jareya e antarana ba’na ban kottha Yerusalim. Ba’na pas addhep ka kottha jareya. Anggep ba’na se ngeppong kottha jareya. Jareya menangka lambangnga bangsa Isra’il.
4Ba’na pas marobbu, mereng ka kacer, ban Sengko’ pas neba’agiya kasala’anna bangsa Isra’il ka ba’na. Tello ratos sangang polo are abidda ba’na kodu tedhung mereng kantha jareya ban nanggung sangsara polana kasala’anna bangsa Isra’il. Saare ba’na tedhung mereng kantha jareya menangka lambangnga okomanna bangsa Isra’il sataon.
5(4:4)
6Saellana jareya ba’na pas mereng ka kangan, pas garassa’agi okomanna kasala’anna Yehuda pa’ polo are abidda, saarena menangka lambangnga okoman sataon ka bangsa jareya.
7Pandeng pangepponganna Yerusalim. Acongngagi tanangnga ba’na sambi mergem ka kottha jareya, pas kabala Tang pessen parkara okomanna bangsa jareya.
8Bi’ Sengko’ ba’na etaleyana sampe’ ta’ ngenneng abali’ dhari kacer ka kangan otaba sabaligga sampe’ pangeppongan jareya mare.
9Sateya kassa’ ngala’ gandum, salle, kacang mera, kadhelli, jaba ban gandum se alos. Jareya campor kabbi, pas kagabay roti. Jareya se kodu ekakan ba’na saabidda tello ratos sangang polo are tedhung mereng ka kacer.
10Roti jareya kodu etha-pantha sampe’ sabban arena ba’na ngakan coma dhu ratos tello polo gram. Ta’ olle lebbi.
11Aeng enomma ba’na kodu ebatesse keya, iya reya dhu cangker saare.
12Ba’na kodu ngodhi’i apoy dhari kotoranna manossa menangka kajuna. Panggang rotina e attassa apoy jareya, pas kakan roti jareya e adha’na sakabbinna oreng."
13PANGERAN adhabu, "Kantha jareya carana oreng Isra’il pagi’ ngakana kakanan se elarang bi’ hokomma Mosa, e bakto reng-oreng jareya bi’ Sengko’ ebuwang ka ra-nagara manca."
14Tape sengko’ mator, "Adhu, Guste PANGERAN Se Mahatenggi! Ngabidi gi’ kana’ abdidalem ta’ oneng neddha babathangnga keban otaba keban re-karena mangsaepon burun alas. Abdidalem ta’ oneng neddha teddha’an se eanggep haram."
15Allah laju adhabu, "Iya mara, menangka gantena kotoranna manossa se ekagabaya apoy kaangguy manggang rotina jareya, ba’na olle ngangguy calatthongnga sape."
16Saellana jareya Pangeran adhabu pole, "He, manossa se ta’ langgeng, Sengko’ mamosna’a parsadhiya’anna kakanan e Yerusalim. Reng-oreng bakal arassa’a tako’ ban kobater, polana roti se ekakana ban aeng se eenoma kodu etaker ban ebatesse.
17Reng-oreng jareya bakal arassa’a potos pangarep polana la ta’ andhi’ roti ban aeng sakale sampe’ dhi-budhina padha mate polana sa-dusana."