Dual Panel1PANGERAN adhabu, "He bangsa Yehuda, dusana ba’na la eoker e atena ban e sakabbinna padduna ba-mezbana ba’na, eoker bi’ eppen besse se akonco’ enten.
2Reng-orengnga ba’na abakte e ba-mezba ban ga-canggana brahala se epaddek kaangguy Dewi Asyera e saneyap kajuwan se rampa’, e co’-konco’na gumo’,
3ban e nong-gunong e lowarra kottha. Lantaran sakabbinna kennengnganna pamojja’anna brahala se la epaddek ba’na e saantero nagara reya ban lantaran sakabbinna dusana ba’na, bi’ Sengko’ so-mosona ba’na epangangko’a sakabbinna dhi’-andhi’na ba’na ban kasogiyanna.
4Ba’na bakal tapaksa’a massra’agi tana se bi’ Sengko’ la ebagi ka ba’na, ban bi’ Sengko’ ba’na epangabdiya ka mosona e nagara se sajjegga ta’ tao ekaedhing otaba etangale’e bi’ ba’na. Ba’na epakantha’a jareya bi’ Sengko’ polana peggella Tang ate la ngalowa akantha apoy se rabbang se ta’ ekenneng pate’e."
5PANGERAN adhabu, "Mon oreng majau dhari Sengko’, Pangeranna, ban ngandellagi partolonganna manossa sarta kakowadanna dibi’na, bi’ Sengko’ oreng jareya eokoma.
6Oreng jareya akantha men-tamennan se tombu e teggal, e tana se kajal, seppe ban accen acampor buja, oreng jareya ta’ tao ngalame barang se becce’.
7Tape oreng se ngarep ban passra ka Sengko’, bi’ Sengko’ eberkadana terros.
8Oreng jareya akantha ka’-bungka’an e penggirra songay se lancar gilina, ramo’na nyalosso’ sampe’ ka aengnga. Ta’ tako’ ka mosem nemor, un-dhaunna biru terros. Maske nagara kerreng ta’ toron ojan atena ta’ ngalengsang sabab terros abuwa.
9Atena manossa ta’ ekenneng jajak, paleng salenter dhari sabarang se badha, panyakedda talebat berra’ ta’ ekenneng pabaras.
10Sengko’, PANGERAN, nalektegi atena ban ngoji batenna manossa. Saneyap oreng bi’ Sengko’ ebalessa menorot tengka pola e dhalem odhi’na, menorot lalakonna."
11Oreng se ta’ jujur e dhalem makompol arta, akantha mano’ se ngerremme tellor se banne tellorra dibi’na. Mon omorra la satengnga tobu dhi’-andhi’na bakal tadha’a karena. E bakto matena etemmo kalaban nyata ja’ aba’na talebat budhuna.
12Padalemman Socce reya padha ban tahta se ce’ moljana, e gunong se tenggi dhari dha’-adha’na.
13GUSTE, Junandalem pangarebbannepon Isra’il, ommadda; sadaja se mongkore Junandalem bakal todhusa. Reng-oreng gapaneka badhi mosna’a dhari dunnya ka’dhinto sareng entar ka dunnyana oreng mate. Sabab Junandalem somberra aeng kaodhi’an ejauwi sareng epongkore reng-oreng gapaneka.
14Guste, PANGERAN kaula, pabarassagi abdidalem sopaja abdidalem baras. Pasalamettagi abdidalem, tanto abdidalem salamet. Namong Junandalem se emolja’agi abdidalem!
15Oreng padha ngoca’ ka abdidalem, "Kemma dhabuna PANGERAN se madhatengnga okoman? Dina me’ olle epadhateng sateya!"
16Namong, GUSTE, abdidalem ta’ oneng maksa Junandalem sopaja macalaka’a reng-oreng gapaneka. Abdidalem jugan ta’ terro sopaja reng-oreng gapaneka palanga. Junandalem ngagali parkara gapaneka, GUSTE. Junandalem ngagali ponapa se ekoca’agi abdidalem.
17Junandalem ja’ daddi se nako’e ka abdidalem. Junandalem sowaka abdidalem manabi manggi kasossa’an.
18Moga-moga reng-oreng se nyerser sareng nyek-ngenyek abdidalem sareng Junandalem eparengngana malo sareng eparengngana katako’an parana. Namong abdidalem ja’ pakadi gapaneka, GUSTE. Parenge reng-oreng gapaneka balai kantos padha tompes sadajana.
19PANGERAN adhabu, "Yeremiya, kassa’ entar ka Labang Sakethengnga Ra’yat se elebadi to-rato Yehuda mon kalowar maso’a kottha. Entar keya ka sakabbinna labang saketheng laenna e Yerusalim.
20Kabala Tang pessen ka to-rato ban ka sakabbinna oreng Yehuda ban sakabbinna pandhudhu’ Yerusalim se lebat e bang-labang jareya.
21Kabala kantha reya: ‘Mon ba’na ta’ terro mateya, ja’ ngangko’ rang-barang e are Sabat, otabana ngeba maso’ rang-barang lebat e bang-labang sakethengnga Yerusalim.
22Ja’ alalakon otabana ngeba barang apa’a bai kalowar dhari bengkona ba’na e are Sabat. Are jareya kodu pamalolo kaangguy Sengko’ akantha se la eparenta’agi bi’ Sengko’ ka para bangatowana ba’na.
23Tape para bangatowana ba’na ta’ endha’ ngedhingngagi otaba agateyagi pa-apa se ekoca’agi Sengko’; padha cengkal ta’ endha’ atoro’ oca’ ban ta’ endha’ eberri’ parengeddan.
24Kabala sopaja Tang parenta reya kabbi eta’adi. Soro ja’ ko’-ngangko’ barang apa’a bai lebat e labang sakethengnga kottha e are Sabat. Are Sabat kodu epamalolo kaangguy Sengko’, ban ja’ alako apa’a bai e are jareya.
25Mon Tang parenta jareya kabbi ejalannagi kalaban gu-onggu, to-ratona ban ja-pangrajana bakal maso’a lebat e bang-labang saketheng Yerusalim ban marenta’a karaja’an akantha Daud. To-rato ban ja-pangraja jareya ban reng-oreng Yehuda sarta pandhudhu’ Yerusalim bakal nompa’a kareta ban jaran, sampe’ kottha Yerusalim daddi ce’ rammena.
26Oreng bakal padha’a dhateng dhari tha-kottha Yehuda ban dhari sa-disa e sabingkerra Yerusalim; reng-oreng jareya bakal dhatengnga dhari dhaerana Benyamin, dhari dhaera e babana mo’-gumo’, dhari dhaera pagunongan, ban dhari Yehuda bagiyan lao’. Reng-oreng jareya bakal ngeba’a ka Tang Padalemman ban-keban kurban, iya reya ban-keban obbaran ban se banne obbaran, bariya keya tor-ator gandum ban mennyan sarta tor-ator sokkoran.
27Jareya kabbi bakal kalakona mon reng-oreng jareya atoro’ ka Sengko’ ban amalolowagi are Sabat kaangguy Sengko’. Ja’ ngangko’ barang apa’a bai lebat e bang-labang sakethengnga Yerusalim e are jareya. Mon Tang parenta reya ta’ etoro’, bang-labang sakethengnga Yerusalim ban ton-karaton e Yerusalim bi’ Sengko’ eobbara epatadha’a karena ban apoy jareya ta’ kera ekenneng pate’e.’"