Dual Panel1PANGERAN adhabu, "Damsyik bakal ta’ daddiya kottha pole, tape bakal aoba’a daddi jur-gujuran.
2Tha-kottha e Siria bakal edina’agiya salanjangnga daddiya kennengnganna ebin se neng e jadhiya sanyamanna ban ta’ eagga oreng.
3Isra’il bakal kaelangana pangaobanna ban Damsyik kaelangana kamardika’anna. Karena oreng Siria se gi’ odhi’ bakal eya’-seya’a oreng akantha Isra’il. Sengko’, PANGERAN Se Mahakobasa, la ngoca’."
4Dhabuna PANGERAN, "Bakal napa’a baktona kajaja’anna Isra’il napa’ ka aherra ban kama’moranna mosna.
5Isra’il bakal padha’a ban teggal e Refa’im se gi’ buru eanye gandumma, tamennanna kare sakone’.
6Akantha bungkana jaitun se buwana epolong sampe’ tadha’, pera’ kare settong dhuwa’ e co’-konco’na ka-cangkana, bariya keya Isra’il pera’ sakone’ se bakal salamedda. Sengko’, PANGERAN, Allahna Isra’il, la ngoca’."
7E are jareya oreng bakal menta’a tolong pole ka Panceptana, Allahna Isra’il se socce.
8Oreng ta’ kera ngarep pole hasel dhari gabayanna tanangnga dibi’, iya areya ba-mezba kennengnganna ngobbar dupa ban ca-arcana Dewi Asyera.
9E are jareya, tha-kottha Isra’il se koko partahananna bakal daddiya jur-gujuran se seppe, akantha tha-kottha se edina’agi oreng Hewi ban Amori e bakto buru dhari oreng Isra’il.
10Isra’il, ba’na loppa ka Pangeran se masalamet ban ngaobi ba’na akantha gunong bato se koko. Sabaligga ba’na namenne bun-kebbun se eangguy nyemba ka ba-diba.
11Tape maske men-tamennan jareya nyelbi’ ban ngembang e bakto buru etamen, ta’ kera badha hasella. Se badha pera’ kasossa’an ban rassa sake’ se ta’ endha’ elang.
12Sa-bangsa se kowat teppa’na ramme; monyena agarudhu’ akantha omba’ se raja e tase’.
13Sa-bangsa jareya maju akantha banjir se nako’e. Tape bi’ Allah reng-oreng jareya eara, daddi laju padha buru sampe’ jau; reng-oreng jareya eserser, paburuna akantha sekkem se eabber angen e lambungnga gumo’, akantha abu se ekebbat kaleng busbus.
14E baja malem reng-oreng jareya madhateng rassa tako’ se talebat rajana, tape mon para’ lagguwa reng-oreng jareya la elang. Jareya papasthenna odhi’na reng-oreng se arampas tanana sengko’ ban ba’na.