Dual Panel1Dhabuna Allah, "Mara neng-enneng, edhingngagi Sengko’ reya, he reng-oreng e ra-nagara se badha e jauna. Mara aya-sadhiya se ngadhebba ka pangadilan, mara maju, reppottagi parkarana. Mara pas asidhang areng-bareng, kaangguy motose sapa se sala sapa se bendher.
2Sapa se maguli pangobasa dhari temor, ban mamennang oreng jareya terros? Sapa se nolonge oreng jareya sampe’ makala sa-bangsa, ban matellok to-rato se daddi mosona? Mosona car-kalacer akantha abu ekenneng peddhangnga, asalebbudan akantha darameyan eabber angen ekenneng panana.
3Oreng jareya terros nyerser ban maju tadha’ alanganna, sokona ceppet, para’ ta’ nyeddinga ka tana.
4Sapa se ajalannagi jareya? Sapa se nantowagi jalanna sajara? Sengko’, PANGERAN, Sengko’ se dha’-adha’na, ban paggun ta’ aoba sampe’ dhi-budhina.
5Pandhudhu’na ra-nagara se jau nangale apa se bi’ Sengko’ elakone. Kabbi takerjat ban ngetter katako’en, pas akompol sarta nyander areng-bareng.
6Oreng padha saleng tolong, ban saleng makowat atena.
7Tokang kaju makowat atena tokang emmas, oreng se mapeppe’ besse ngangguy tokol ngalem oreng se nempa besse e attas langgadan. Oca’na, ‘Lalakonna sampeyan ce’ saena’; samarena laju etolonge masang pako sopaja ta’ li-guliyan.
8Tape ba’na Isra’il, ba’na Tang abdi, Tang ommat peleyan, ba’na toronanna Ibrahim, Tang kanthe’.
9Bi’ Sengko’ ba’na ekala’ dhari co’-konco’na bume, eolok dhari pan-barampan kennengngan se paleng jau. Ca’na Sengko’, ‘Ba’na Tang abdi; Sengko’ ta’ nolak Tang peleyan dibi’.’
10Ta’ osa tako’, sabab Sengko’ abarengnge ba’na, ja’ ketter, sabab Sengko’ Allahna ba’na. Bi’ Sengko’ ba’na epakowada ban etolonga, etontona bi’ Tang tanang se jaja.
11Abas, reng-oreng se peggel ka ba’na, bakal epakala’a ban bakal malowa. Reng-oreng se amosowan ban ba’na, bakal mateya tadha’ karena.
12Ba’na bakal nyareya oreng se nangtang ba’na, tape tadha’ se etemmowa. Reng-oreng se aperrang ban ba’na la padha mate tadha’ karena.
13Sabab Sengko’ PANGERAN, Allahna ba’na nonton tanangnga ba’na se kangan; ca’na Sengko’, ‘Ta’ osa tako’, Sengko’ nolongana ba’na.’"
14Dhabuna PANGERAN, "Ella ja’ tako’, Isra’il, maske ba’na kene’ ban ta’ kowat. Sengko’ PANGERAN se nolonge ba’na, Se Mahasocce, Allahna Isra’il Panyalamedda ba’na.
15Abas, ba’na bi’ Sengko’ epakantha keregan, se anyar, tajem ban agigi dhu jijir. Ba’na bakal ngerega ban maancora nong-gunong; mo’-gumo’ bi’ ba’na epadaddiya sekkem.
16Bi’ ba’na kabbi bakal etampeya, saellana jareya kabbi pas eabber angen atabuyan ekenneng kaleng busbus. Ba’na bakal aneng-sennengngana polana Sengko’, PANGERAN, ban bakal ngedirragiya Sengko’, Allahna Isra’il.
17Mon Tang bangsa se palang rowa nyare aeng, ban ce’ pelka’na sampe’ gerrunganna kerreng, Sengko’, PANGERAN, nyaodana du’ana; Allahna Isra’il ta’ kera adina’agi ommadda.
18Sengko’ magili ngay-songay e mo’-gumo’ se gundhul; somber bakal ngolbu’a dhari nga’-tengnga’anna tana lapang. Sagara beddhi bi’ Sengko’ epadaddiya talaga; aeng bakal nancella dhari tana se kerreng.
19Sagara beddhi bi’ Sengko’ epatombuwana bungkana comara Libanon, bungkana morad, akasiya ban jaitun. Ra-ara bi’ Sengko’ epadaddiya alas, alas eru, barangan ban comara.
20Daddi oreng bakal nangaleyana ban bakal taowa ja’ Sengko’, PANGERAN, se alako jareya. Oreng bakal ngabassagiya sarta pas ngarte, ja’ se madaddi jareya kabbi Allahna Isra’il."
21PANGERAN, ratona Isra’il adhabu ka ba-diba, "Mara ba’na mon aparkara’a, koca’agi apa’a bai lantaranna!
22Mara dha’ enna’, tebbak apa se bakal kadaddiyana, sopaja sengko’ kabbi tao apa daddina dhaggi’. Kabala kadaddiyan-kadaddiyan gi’ jaman lamba’, terrangngagi artena sopaja sengko’ kabbi agateyagiya.
23Koca’agi apa se kadaddiyana, sopaja sengko’ kabbi tao ja’ ba’na pajat illahi. Lakone se aguna ban se marogi, sopaja sengko’ kabbi cengngeng nangale’e.
24Saongguna, ba’na ban lalakonna reya tadha’, ban reng-oreng se mojja ba’na majitjit rassana.
25Sengko’ la majaga oreng dhari temor; bi’ Sengko’ eolok, esoro nyerrang dhari dhaja. Para pangobasa bakal enyek-enyegga akantha cellot, akantha lempong se enyek-enyek tokang polo’.
26Sapa e antarana ba’na se anobuwattagi parkara jareya, mara kabala, me’ olle sengko’ kabbi padha ngoca’ ja’ ba’na pajat teppa’? Tape e antarana ba’na tadha’ se ngabala parkara jareya, tadha’ se ngedhing ba’na acaca.
27Sengko’, PANGERAN, se dha’-adha’ kadibi’ ngabarragi jareya ka Siyon; Sengko’ ngotos oreng manapa’ kabar bagus ka Yerusalim.
28E bakto Sengko’ nyare e antarana ba-diba, tadha’ settonga se aberri’ petodu, tadha’ settonga se bisa ajawab.
29Ongguwan, ba-diba jareya tadha’ gunana, ba-diba jareya pera’ arca eccoran se ta’ bisa apa-rapa."