Dual Panel1E taon pasedana Uziya sengko’ nangale’e Pangeran alenggi e korse karaja’anna se tenggi ban molja. Jubana notobi saantero Padalemman Socce.
2Badha lok-mahlok se rabbang akantha apoy manjeng e sakalenglengnga, kabbi padha andhi’ kalembang nem-ennem. Kalembangnga se dhadhuwa’ notobi mowana, se dhadhuwa’ notobi badanna, ban dhadhuwa’na eangguy ngabber.
3Lok-mahlok jareya aera’ kantha reya: "Socce, socce, socce. Socce PANGERAN Se Mahakobasa. Bume possa’ ban kamolja’anna."
4Langganna Padalemman Socce agundhek polana sowara jareya, ban Padalemman Socce jareya dibi’ possa’ ban okos.
5Sengko’ pas ngoca’, "Palang! Sengko’ ta’ andhi’ pangarebban pole, sabab tang colo’ gedda’ ban dusa, ban sengko’ apolong ban bangsa se kantha jareya keya. Maske kantha jareya, tang mata dibi’ la nangale’e Rato, PANGERAN Se Mahakobasa!"
6Saellana jareya sala settong e antarana lok-mahlok jareya ngabber ka tang kennengngan, ngeba mardha se ekala’ ban pe’-gipe’ dhari mezba.
7Mardha jareya eseddingngagi ka tang bibir, laju ngoca’, "Mardha reya la nyedding ka bibirra ba’na. Sateya kasala’anna ba’na la epaelang ban dusana ba’na la esapora bi’ PANGERAN."
8Sengko’ pas ngedhing PANGERAN adhabu kantha reya, "Sapa se eotosa Sengko’? Sapa se ngeba’a berta dhari Sengko’ ban ba’na?" Sengko’ nyaot, "Ka’dhinto abdidalem. Ngereng otos abdidalem!"
9Pangeran laju ngotos sengko’ esoro manapa’ pessen reya ka ommat, "Maske ba’na terrosa ngedhingngagi, ba’na ta’ kera ngarte. Maske ba’na terros netene, ba’na ta’ kera tao badha kadaddiyan apa."
10Salerana laju adhabu ka sengko’, "Patopo pekkeranna reng-oreng jareya, pakopok kopengnga ban pabuta matana, me’ olle reng-oreng jareya ta’ nangale, ta’ ngedhing ban ta’ ngarte, sopaja pas padha abalik nyabis ka Sengko’, ban Sengko’ pas epabarasa."
11Sengko’ atanya, "Saponapa abittepon se epakadiya ka’dhinto, Guste?" Dhabuna, "Sampe’ tha-kottha jareya ancor kabbi ban ta’ ekennengnge oreng, ko-bengko tadha’ se ngennengnge ban tanana kosong ta’ ekenneng men-tamenne,
12pandhudhu’na tha-kottha jareya bi’ Sengko’ eojuga ka kennengngan se jau, sampe’ tana jareya seppe tadha’ orengnga.
13La’-mala’, mon dhari sapolo oreng badha settong se gi’ odhi’, se gi’ odhi’ jareya epamateya keya. Tape akantha bungkana baringen mon epoger gi’ badha bungkella, bariya keya bangsa jareya masthe gi’ badha karena se daddiya parmola’anna ommat se socce."