Dual Panel1Kabar parkara kamennangan-kamennanganna Isra’il balattra sampe’ ka sakabbinna rato e bara’na Songay Yordan — e pagunongan, e babana pagunongan, ban e tenggangan salanjangnga paseser Tase’ Tengnga sampe’ gan Gunong Libanon e bagiyan dhaja; iya areya to-rato Het, Amori, Kana’an, Feris, Hewi ban Yebus.
2To-rato jareya padha amopakat asakongkel merrangana Yusak ban ommat Isra’il.
3Tape reng-oreng Gibeyon dhari bangsa Hewi la padha ngedhing parkara pa-apa se elampa’agi Yusak ka Yerikho ban Ai.
4Reng-oreng jareya pas motossagi nepowa Yusak. Reng-oreng jareya laju ngala’ mar-hemarra pas ebuwa’i rong-karong se laju, thong-kanthongnga anggur se juba’ se ekagabay dhari kole’. Menangka sangona reng-oreng jareya ngeba roti se la kerreng ban ambung.
5Kalambina dha-beddha, sapatuna la laju ban abel-tambel.
6Kalaban kabadha’an se kantha jareya reng-oreng jareya entar ka Yusak e parkemahanna e Gilgal, pas mator ka Yusak ban ka reng-oreng Isra’il, "Kaula dhari nagara se jau, mabadha’a parjanjiyan sareng panjennengngan."
7Tape reng-oreng Isra’il ngoca’, "Egabaya ponapa kaula me’ mabadha’a parjanjiyan ban sampeyan? Olle daddi sampeyan asalla dhari ma’-semma’na ka’anja."
8Ca’na reng-oreng Gibeyon gella’, "Maske epakona ponapa saos sareng panjennengngan, abdina poron." "Sampeyan paneka pasera? Dhari nagara ka’imma asalla?" dhabuna Yusak ka reng-oreng jareya.
9Saodda reng-oreng jareya, "Abdina dhari nagara se ce’ jauna, Towan, sabab abdina mereng parkara GUSTE Allah se esemba panjennengngan sadaja. Abdina mereng sadaja se elampa’agi Salerana e Messer,
10sareng sadaja se elampa’agi Salerana ka rato Amori se kadhuwa e temorra Songay Yordan, enggi paneka Sihon rato Hesybon sareng Og rato Basan se alenggi e Asytarot.
11Abdina sakanca paneka epakon para pamimpin sareng sadajana oreng e nagara abdina sopaja nyadhiya’agi sango, entar manggi’i panjennengngan e ka’dhinto, sareng mator ja’ bangsa abdina atellok ka panjennengngan. Daddi abdina nyo’ona kamora’anna panjennengngan moga kasokana mabadha parjanjiyan sareng bangsa abdina.
12Ngereng oladi roti se ekasango abdina sakanca ka’dhinto. E bakto pamangkadda, roti ka’dhinto gi’ anga’. Namong samangken, ngereng oladi! Ampon kerreng sareng ambung.
13Thong-kanthongnga anggur ka’dhinto bakto eesse’e gi’ anyar, tape samangken, oladi saos! Ampon dha-beddha. Kalambi sareng sapatu abdina jugan ampon rosak lantaran parjalanan se jau ka’dhinto."
14Daddi reng-oreng Isra’il narema kakanan sakone’ dhari reng-oreng Gibeyon jareya, ban ta’ atanya ka PANGERAN parkara jareya.
15Yusak mabadha parjanjiyan parsahabadan ban reng-oreng Gibeyon jareya, ban ajanji ta’ mateyana reng-oreng jareya. Bariya keya pin-pamimpinna ommat Isra’il, asompa neptebbana parjanjiyan jareya.
16Tape o-tao, e are se kapeng tello’ saellana mabadha parjanjiyan jareya, oreng Isra’il la napa’ ka kottha Gibeyon, Kefira, Be’erot ban Kiryat-Yearim e baba kakobasa’anna reng-oreng jareya. Daddi buru etemmo ja’ kennengnganna reng-oreng jareya ta’ jau dhari Gilgal.
17(9:16)
18Tape bi’ reng-oreng Isra’il reng-oreng jareya ta’ epate’e, sabab pin-pamimpinna Isra’il la asompa ka reng-oreng jareya kalaban asmana GUSTE Allahna Isra’il. Reng-oreng Isra’il padha ango’-ngo’an ka pin-pamimpinna parkara jareya.
19Tape pin-pamimpin jareya nyaot, "Dhu baramma’a pole! Sengko’ la padha ajanji ka reng-oreng jareya, asompa kalaban asmana GUSTE Allahna Isra’il. Sateya sengko’ ban ba’na ta’ olle alako juba’ ka reng-oreng jareya.
20Sengko’ ban ba’na ta’ olle mate’e reng-oreng jareya sabab sengko’ ban ba’na la ajanji; mon janji jareya ta’ eteptebbi, tanto sengko’ ban ba’na eokom bi’ Allah.
21Daddi la dina reng-oreng jareya me’ olle odhi’ terros, tape kagabay tokang maddung kaju ban tokang mekollagi aeng kaangguy sengko’ ban ba’na kabbi." Kantha jareya panemmona pin-pamimpin gella’.
22Reng-oreng Gibeyon jareya pas edikane bi’ Yusak. Dhabuna Yusak, "Ba’na me’ co-ngoco kantha jareya, abala nagarana ce’ jauna, mangkana pera’ e dhinna’.
23Sarrena co-ngoco sengko’ kantha jareya, bi’ Allah ba’na eokoma. Bangsana ba’na bakal terrosa daddiya dunor, tokang maddung kaju ban tokang mekol aeng kaangguy Padalemman Socce."
24Saodda reng-oreng jareya, "Abdina ngalakone sapaneka polana mereng ja’ GUSTE Allah se esemba panjennengngan makon Mosa, abdiepon ka’dhissa’, marengngagi nagara ka’dhinto ka panjennengngan, sareng makon panjennengngan mate’e sadajana oreng essena nagara ka’dhinto e bakto ngobasane nagara ka’dhinto. Bangsa abdina tako’ epate’e, daddi pas ngalakone se kadi ka’dhinto.
25Samangken bangsa abdina badha e dhalem kakobasa’anna panjennengngan. Epakadi ponapa’a saos kasokanna, kadi ponapa saena menorot panjennengngan."
26Daddi Yusak pas alampa’agi kantha reya: reng-oreng jareya elindhunge ban ta’ ebagi pate’e ka reng-oreng Isra’il.
27Tape reng-oreng jareya ekagabay dunor, iya areya epamaddung kaju ban epamekol aeng kaangguy oreng Isra’il ban mezba. Sampe’ sateya reng-oreng jareya gi’ alako kantha jareya e kennengngan se bi’ PANGERAN epele epadaddi kennengnganna oreng abakte ka Salerana.