Dual Panel1Zefanya reya pottrana Kusyi. Toro’ gilirra toronanna dhari baba ka attas iya reya Kusyi, Gedalya, Amaziya ban Rato Hizkiya. Reya’ dhabu se epessennagi PANGERAN ka Zefanya e bakto Rato Yosiya pottrana Amon marenta Yehuda.
2PANGERAN adhabu, "Sengko’ mamosna’a sabarang se badha e bume:
3sakabbinna manossa ban keban, tamaso’ mano’ ban juko’. Oreng jahat bi’ Sengko’ epatompessa. Manossa epamateya kabbi, tadha’ settonga se epaodhi’a. Sengko’, PANGERAN, la ngoca’.
4Sengko’ ngokoma pandhudhu’ Yerusalim ban saantero Yehuda. Re-karena pamojja’an ka Ba’al epatadha’a dhari ngan-kennengngan jareya. Mam-imam se aladine Ba’al bakal ekaloppa’ana.
5Sapa’a bai se ongga ka ata’ parlo nyemba’a are, bulan ban tang-bintang bi’ Sengko’ epatadha’a karena. Bariya keya reng-oreng se nyemba ka Sengko’ ban asompa estowa ka Sengko’, tape asompa keya bit nyamana Diba Milkom.
6Sengko’ mateyana sakabbinna oreng se ta’ nyander ka Sengko’ otabana se ta’ menta petodu ka Sengko’, ban oreng se nyenglae Sengko’ sarta se ta’ endha’ noro’ Sengko’ pole."
7Arena PANGERAN la para’; e are jareya PANGERAN bakal matorona okoman; daddi mara neng-enneng ja’ acaca’an e ajunanna. PANGERAN teppa’na aya-sadhiya ajagala ommadda epakantha’a kurban tor-ator ban sateya la nembali so-mosona Yehuda.
8"E are panjagalan jareya," dhabuna PANGERAN, "Sengko’ ngokoma para kaom oreng agung, para pottrana rato, ban sakabbinna oreng se ngangguy tata carana oreng manca.
9Sengko’ ngokoma sakabbinna oreng se ajalannagi kabakteyan akantha oreng se ta’ kennal ka Sengko’, se co’-ngeco’ ban mate’e oreng kaangguy mossa’e bengkona lorana ban rang-barang rampasan."
10"E are jareya," kantha jareya dhabuna PANGERAN, "ba’na bakal ngedhinga tangesan e Labang Saketheng Juko’. Sowarana oreng nanges bakal ekaedhinga dhari kampong se anyar, ban monyena sabarang se gujur bakal ekaedhinga e mo’-gumo’.
11Mara nanges mon ba’na ngedhing jareya, e, reng-oreng kottha e bagiyan baba, sabab sakabbinna dagang ban oreng se maenjaman pesse la mate epate’e oreng!
12E bakto jareya Sengko’ ngala’a obur, nyaloksaga kottha Yerusalim. Sengko’ ngokoma pandhudhu’na se ta’ parduli ban se arassa cokop ban aba’na dibi’, ban se apekker ja’ Sengko’, PANGERAN, ta’ tao apa-rapa sakale.
13Dhi’-andhi’na bakal erampasa ban bengkona bakal eancora kabbi. Reng-oreng jareya bakal maddegga bengko, tape ta’ kera bisa ngennengnge; bakal agaraba kebbun anggur tape ta’ kera bisa ngenom anggurra."
14Are panghakimanna PANGERAN la para’, ongguwan, la ce’ para’na, la’-mala’ bakal duliya dhapa’. Are jareya possa’ ban kasangsara’an, sampe’ rit-parjurit se paleng parjuga sakale bakal nangesa rung-dharungan polana la ta’ andhi’ pangarebban pole!
15Are jareya are dadukan, kamalaradan ban kasossa’an, are pagujuran ban pangancoran, are papetteng ban kaoremman, are se petteng ban calemot.
16E are jareya saare benteng oreng ngedhing monyena tarompet ban soragga paperrangan se erak-orakkagi para pajuwang se nyerrang tha-kottha se abinteng ban ra-manara se tenggi.
17PANGERAN adhabu, "Sengko’ madhatengnga balai sabannya’na ka manossa, sampe’ kabbi padha’a ga’-raga’an akantha oreng buta. Manossa la agabay dusa ka Sengko’, sateya dharana bakal agiliya akantha aeng, yit-mayyidda bakal bucco’a e attassa tana."
18E are se nako’e jareya PANGERAN noduwagiya dukana, emmas ban salaka ta’ bisa masalamet manossa jareya. Bume bakal ancora kabbi, katonon ekello’ apoyya dadukanna. Nyabana oreng se badha e bume bakal ecabuda daksakala.