Dual Panel1Nampa appala’ doang Hana, angkana, "Napakarannui Batara atingku; gau’Na napakasannangi nyawaku. Mate’nei kusa’ring ancau-caui musungku, nasaba’ le’ba’ tojeng-tojengku Natulung Allata’ala.
2Tena matangkasa’ sangkamma Batara! Iaji bawang akkulle a’jari pa’la’lang.
3Pammarimi bicara kosonga! Pa’le’ba’mi bicara borroa! Nasaba’ anjo Batara, Allata’ala Kaminang mapahang; Ia angngadeli sikontu panggaukanna taua.
4Tepo’mi panana turewaya, mingka pila’ kassa’mi tau lammaya.
5Tubassoroka riolo lanri kala’bianna ri kanre-kanreang, anne kamma a’jari tungnganre gaji poro untu’ anggappa kanre. Tucipuruka riolo, anne kamma sukku’mi, angganna’mi ri kanre. Tutamananga, anne kamma lompomi pa’mai’na, tujumi ana’ le’ba’ nalassukang! Mingka amma’ jaia ana’na, nibokoi, niboli’ ta’ronang-ronang.
6Batara appamate, Ia todong appatallasa’. Mange ri lino tumatea Napanaung rupataua. Na Ia todong angngangkaki taua battu anjoreng.
7Nia’ tau Napa’jari kasi-asi dudu, nia’ todong Napa’jari kalumanynyang. Nia’ tau Napakatuna, nia’ todong Napakatinggi.
8Battu ri pa’risi’ Naangka’ tu tenaya apa-apanna, battu ri sessa Nalappassang tu tunaya. Nipa’jari ke’nanga aganna tu mala’birika, na Nasare empoang kalompoang. Pa’lapara’na buttaya Batara pata, irateanganna Nabangung linoa.
9Tutamamminraya tuli amangi lalang ri la’lanNa Batara. Mingka tuja’dalaka jappo’ ancuruki lalang ri sassang makappuka. Kagassingang kale takkulle nipattoang, kagassingang rupatau takkulle angngerang pammetang.
10Musu-musunNa Batara ancu’-ancuruki, mallaki ke’nanga; a’gunturuki battu ri langika. Batara angngadeli sikontu anne linoa, na Nasare koasa mala’biri’ ri karaeng Nipilea."
11Nampa ammotere’mo Elkana siagang kaluargana mange ri Rama. Mingka Samuel, anjo anaka, ammantammi ri Silo siagang allayani Batara nipimping ri Imang Eli.
12Ia ana’-ana’na Eli ja’dala’ sikali. Tena najampangi ke’nanga Batara.
13Siagang salaku imang appaero’-eroki appanggaukang ke’nanga mae ri bansa Israel. Ebara’na punna nia’ tau ero’ assare koro’bang, battui pambantu imanga angngerang garpu tallua giginna. Lalang nipalluna anjo dagenga,
14napato’doki anjo garpua antama’ ri panci tampa’na anjo dageng nipallua, nampa manna apa nabesoka assulu’ siagang anjo garpua, a’jari minjo imang pata. Sikontu tu Israel battua mae ri Silo untu’ assare koro’bang nipakamma ngaseng minjo.
15Ba’lalo masarroi battu anjo pambantua ri tenanapa nanisa’laki jannana untu’ nitunu, na nakana ri anjo tau eroka assare koro’bang, "Sareangi imanga anjo dageng mataya ija, sollanna natunui; taerokai antarimai dageng nipallua."
16Punna appiali anjo taua angkana, "Bajikangang nipinawangi paratoranga, na nitunu rolong anjo jannaya; le’bappi anjo akkullemi nualle situru’ pangngainu," lanakanamo anjo pambantua, "Tena, kamma-kamma anne musti nusare memamma’. Punna tena, lakualle passai."
17Kammaminjo antekamma doraka lompona anjo ruaya ana’na Eli ri dallekanNa Batara, lanri nabawang-bawanganna passare koro’banga untu’ Batara.
18Lalanna anjo wattua, anjo Samuel ana’-anaka ija nalayani turusmi Batara. Ammakemi baju attantu, iamintu battu ri kaeng lenang nipare’, sangkamma baju passambayanna sikamma imanga.
19Taung-taungi amma’na appare’ juba ca’di nampa nasareang Samuel punna battu anjo bainea siagang bura’nenna assare koro’bang taungang.
20Nabarakkakimi Eli anjo Elkana siagang bainenna, na nakana ri Elkana, "Tapporo Nasare laloko pole ana’-ana’ battu ri anne bainennu, untu’ a’jari sambe ri ana’ nupassareanga mae ri Batara." Le’baki anjo ammotere’mi ke’nanga mange ri Rama.
21Nibarakkakimi Hana ri Allata’ala, sa’genna allassukang pole tallu ana’ bura’ne siagang rua ana’ baine. Na Samuel pila’ a’bakka’ tommi lompona lalang allayanina ri Allata’ala.
22Eli sanna’ dudumi toana. Tena ammarina allangngere’ tau a’jamma’ battu ri panggaukanna ana’-ana’na mae ri tu Israel. Naasseng tongi Eli angkanaya anjo ana’-ana’na sikatinroangi siagang sikamma bai’-baine tugasaka ri dallekanna pakke’bu’ Kema KahaderanNa Batara.
23Lanri kammana anjo nakanamo ri ana’-ana’na, "Kutarimami laporanga battu ri sikontu ummaka ri passala’na panggaukang ja’dala’nu ngaseng. Angngapa nanupanggaukang kamma anjo?
24Teako appakammai pole anjo na’. Teai sipato’ kodina anjo nabicaraya umma’Na Batara ri passala’ panggaukannu.
25Punna kasalang taua mae ri rupataua, akkullei nialleang ri Allata’ala. Mingka punna doraka taua mae ri Batara, inai akkulle antulungi?" Mingka tajampangiai ke’nanga anjo pappakainga’na Eli, manggena ke’nanga, nasaba’ le’ba’mi Napattantu Batara untu’ ambunoi ke’nanga.
26Na Samuel, anjo anaka, pila’ lompomi siagang pila’ ningaimi, baji ri Batara, kammayatompa ri sikontu taua.
27Ri se’reang allo, nia’mo se’re na’bi battu mae ri Eli na napabattu pappasang battua ri Batara, nakana, "Ri wattunna boe-boenu iamintu Harun siagang kaluargana a’jari ata ri karaeng Mesir, Kupa’nyatami KalengKu mae ri Harun.
28Battu ri sikontu suku niaka ri Israel, le’ba’mi Kupile kaluargana untu’ ajari imangKu, untu’ allayani ri tampa’ pakkoro’bangnganga, attunu dupa, siagang ammake baju efod punna a’bicarai siagang iNakke. Siagang le’ba’mi Kusare ha’ ke’nanga siagang turunganna untu’ angngalle sipa’gang battu ri koro’bang nitunua ri tampa’ pakkoro’bangnganga.
29Jari angngapa nungngoa ija anciniki koro’bang-koro’bang napassareanga bansaKu mae ri Nakke situru’ Kuparentakanga? Angngapako Eli, nala’bi nupakala’biri’ ana’-ana’nu kala iNakke, siagang angngapa nanubalang parekang ke’nanga ampakaco’moki kalenna battu ri bageang kaminang bajika ri sikontu apa napassareanga bansaKu mae ri Nakke?
30INakke, Karaeng Allata’alana Israel, riolo le’ba’Ma’ a’janji angkanaya kaluarganu siagang turungannu la’jari palayang mae ri Nakke, salaku imang sa’genna satunggu-tungguna. Mingka kamma-kamma anne tenamo naKuero’ ri anjo kammaya! Nasaba’ inai-nai ampakala’biriKa’ iami laKupakala’biri’, na inai-nai anghina’ iami laKuhina.
31Pilangngeri angkanaya, lania’ sallang wattunna naKubuno sikontu tau rungkaya lalang kaluarganu siagang bija-bijannu, sa’genna tena manna sitau bura’ne lalang ri kaluarganu lala’bu umuru’na.
32Lasi’nako siagang langngiri matako anciniki sikontu barakka’ laKupassareanga mae tu maraenga ri Israel, na lalang ri kaluarganu lamate rungka ngasengi.
33Mingka sitau battu ri turungannu, laKulappassangi attallasa’ na nalayaniA’ salaku imang. Mingka la’jari butai, na tappu’ panrannuang lalang tallasa’na. Sikontu turungannu maraenganga laKubuno ngasengi.
34Na la’jaria pammatei angkanaya ma’nassa lakajariang tojengi yangasenna anjo Kupaua, anjo ruaya ana’nu, iamintu Hofni siagang Pinehas lamatei lalang siallo.
35Nampa laKupilei imang tamamminraya mae ri Nakke, siagang eroka anggaukangi apa Kuparentakanga mae ri ia. LaKusarei turungang tuli latugasaka salaku imang ri dallekanna sikamma karaeng laKupilea.
36Massing-massing turungannu attallasaka ija, lamangei ri anjo imanga untu’ appala’ doe’ siagang kanre. Lanapalaki angkana: Kipa’bianga’ ambantui sikamma imanga, sollanna kukkulle anggappa kanre manna nasisoanja."