Alkitab Mobile SABDA
[VER] : [MAKASAR]     [PL]  [PB] 
 <<  2 Tawarikh 34 >> 

1Nampami 8 taung umuru’na Yosia ri wattunna a’jari karaeng ri Yehuda, siagang ammarentai 31 taung sallona ri Yerusalem.

2Nagaukangi apa Nangaia Batara; naturuki panggaukanna Karaeng Daud boe-boena, siagang naturuki sikontu hukkung-hukkunNa Allata’ala.

3Narapi’namo 8 taung sallona ammarenta, ri umuru’ rungka dudua iji, appakkaramulami Yosia anynyomba mae ri Allata’ala nasombaya Karaeng Daud boe-boena. Narapiki patang taung ribokoanganna, appakkaramulami naancuru’ tampa’-tampa’ panynyombang barhalaya, patung-patung Dewi Asyera, siagang barhala-barhala maraengannaya.

4Anjo patung-patunga siagang barhala-barhalaya niancuruki sa’genna lica’ ri ana’ buana Karaeng Yosia, nampa napakioro’ limbu’bu’na irate ri jera’na tau assarea koro’bang mae ri anjo barhala-barhalaya. Tampa’-tampa’ pakkoro’bangnganna Baal siagang tampa’-tampa’ pakkoro’bangngang dupa niaka anjoreng narumbang kabusuki ke’nanga.

5Nampa natunu Yosia irate ri anjo tampa’ pakkoro’bangnganga buku-bukunna imang-imang allayania ri anjo barhala-barhalaya. Lanri kammana anjo natangkasimi tu Yehuda siagang tu Yerusalem sa’genna a’jari siratammo ammotere’ anynyomba mae ri Batara.

6Kamma tomminjo nagaukang ri kota-kota siagang daera-daera le’baka ancuru’ ri daera Manasye, Efraim, siagang Simeon, sa’genna Naftali ri bageang wara’.

7Sikontu tampa’-tampa’ pakkoro’bangngang siagang patung-patung Dewi Asyera ri sikontu Kakaraengang Bageang Waraka nirumbang ngasengi ri Yosia, nampa naancuru’ kabusu’ patung-patunna siagang tampa’-tampa’ pakkoro’bangngang dupaya. Nampa ammotere’ Yosia mange ri Yerusalem.

8Ri taung makasampulo assagantuju ammarentana Yosia, le’ba’mi nabarrasa’ sa’genna tangkasa’ panynyombang barhalaya battu ri Balla’Na Batara siagang sikontu pa’rasanganga, nia’mo tau tallu nasuro mange ampakabajiki Balla’Na Karaeng Allata’ala. Anjo tau tallua iamintu: Safan ana’na Azalya, Maaseya guburnur Yerusalem, siagang Yoah ana’na Yoahas kalase’renna pagawe tinggia.

9Sikamma tu Lewi a’jagaya ri Pakke’bu’ Balla’Na Batara, napassareangi mae ri Imang Lompo Hilkia sikamma doe’ le’baka napasse’re ke’nanga. Anjo doeka iamintu doe’ battu ri Efraim siagang Manasye, kammayatompa doe’ battu ri ra’ya’ maraengannaya ri Kakaraengang Bageang Waraka, siagang battu ri ra’ya’ Yehuda, Benyamin siagang Yerusalem.

10Nampa nipassareang anjo doeka ri Imang Lompo Hilkia mae ri anjo tau tallua le’baka nisare tugasa’ untu’ angngawasi pappakabajikianna anjo Balla’Na Batara. Nampa pole napassareang ke’nanga anjo doeka mae

11ri tukang kayua siagang tukang bangunanga untu’ ammalli batu siagang kayu untu’ ampakabajiki bageang panra’na anjo bangunanga lanri tanijampangiai ri karaeng-karaeng Yehuda.

12Anjo sikamma tau ampakabajikai anjo bangunanga sangnging tau lambusu’ tojeng-tojeng. Nipimpingi ke’nanga ri appa’ tu Lewi, iamintu: Yahat siagang Obaja battu ri passilokoang bijanna Merari, kammayatompa Zakharia siagang Mesulam battu ri passilokoang bijanna Kehat. Sikamma tu Lewi, cara’deka ngaseng akkarena musi’,

13nisarei tugasa’ angngawasi lalinganna bahang-bahanga, a’jari kapala ri a’rupa-rupaya jama-jamang, anjamai sura’-suraka, siagang anjagai pakke’buka.

14Ri wattunna nipasulu’ anjo doe’ eroka nipake ambangung battu ri pammolikanna, nagappami Imang Hilkia kitta’ HukkunNa Batara, iamintu hukkung-hukkung le’baka Napassareang Allata’ala mae ri Musa.

15Nakanamo Hilkia ri Safan, "Kugappai kitta’ HukkunNa Batara, lalang ri Balla’Na Batara," nampa napassareang anjo Kittaka mae ri Safan.

16Naallemi Safan anjo Kittaka, nampa a’lampa mange ri karaenga siagang nakana, "Sikontu apa kiparentakanga karaeng, le’ba’ kabusu’mi nigaukang.

17Le’ba’mi naalle ikambe doe’ niaka niboli’ ri Balla’Na Batara, nampa nipassareang mae ri sikamma pajamaya siagang pangawasa’-pangawasa’na."

18Nampa nasambungi pole kananna Safan angkana, "Anne kittaka napassareangi Hilkia mae ri nakke." Nampa nabacakang karaenga anjo kittaka.

19Nalangngere’na karaenga bonena anjo kittaka, nakae-kaemi pakeanna napakamma si’na pa’mai’na.

20Nampa appasulu’ parenta karaenga mae ri Hilkia, Ahikam ana’na Safan, Abdon ana’na Mikha, Safan jurutulisi’na pa’rasanganga siagang Asaya pambantuna karaenga, angkana,

21"A’lampako mange akkuta’nang ri Batara untu’ inakke siagang untu’ sikontu tu Israel siagang tu Yehuda niaka ija kamma-kamma anne ri passala’na bonena anne kittaka. Larroi Batara mae ri katte lanri tena nagaukangi boe-boeta sikamma apa niparentakanga lalang ri anne kittaka."

22Jari a’lampami Hilkia, Ahikam, Abdon, Safan siagang Asaya mange appala’ pitunju’ ri se’reang baine niarenga Hulda. Anne taua iamintu se’re na’bi niaka ammantang ri pakkampongang berua ri Yerusalem. Bura’nenna niarengi Salum ana’na Tikwa, cucunna Harhas. Jama-jamanna iamintu pangurusu’ pakeang sambayang ri Balla’Na Batara. Nalangngere’na Hulda anjo kasingarang napabattua ke’nanga,

23nasuromi ke’nanga ammotere’ mange ri karaenga nampa nasuro pabattu anne pasanga angkana, "Batara, Allata’ala nisombaya ri tu Israel Nakana,

24‘LaKuhukkungi Yerusalem siagang sikontu pandudu’na; laKutunrai sangkamma niaka tattulisi’ lalang ri anjo kitta’ le’baka nibacakang mae ri karaenga.

25Ma’bokomi ke’nanga ri Nakke siagang assaremi ke’nanga koro’bang mae ri rewata-rewata maraenga. Sikontu anjo apa nagaukanga ke’nanga napanaiki larroKu. LarroA’ mae ri Yerusalem, siagang anjo larroKu takkulleai naung.

26Mingka ri passala’na Karaeng Yosia, iaminne pasangku, Karaeng Allata’alana Israel: Ri le’ba’namo nulangngere’ apa niaka tattulisi’ lalang ri anjo kittaka,

27assesse’ lalang mako siagang nupakatunami kalennu ri dallekangKu. Le’ba’mi Kupau angkanaya laKuhukkungi Yerusalem siagang sikontu pandudu’na, mingka ri wattu nulangngere’na anjo kanangKu angngarru’ mako siagang nukae-kaemi pakeannu tanra si’nana nyawanu. Kulangngere’mi pappala’ doannu,

28lanri kammana anjo tenamo nalaKuhukkung Yerusalem lalang attallasa’nu ija. LaKupa’biangko mate siagang amang.’" Jari ammotere’mi anjo sikamma tau nisuroa mae ri karaenga siagang napabattumi anjo pasanga mae ri karaenga.

29Nakio’mi Karaeng Yosia sikontu pamimpinna tu Yehuda siagang Yerusalem,

30nampa a’lampa siagang ke’nanga mange ri Balla’Na Batara. Amminawang tommi ri ke’nanga sikamma imanga, tu Lewia siagang sikontu ra’yaka, baji’ tu kasi-asia kammayatompa tu kalumanynyanga. Ri dallekanna ngaseng ke’nanga, ri ampi’na benteng untu’ karaenga, ammentemmi karaenga nampa assa’ra lompo ambacai sikontu bonena anjo kitta’ parjanjiang le’baka nigappa lalang ri Balla’Na Batara. Nampa appare’ parjanjiang karaenga mae ri Batara angkanaya lamannuruki ke’nanga mae ri Ia siagang lattojeng-tojengi ri atinna siagang ri nyawana ke’nanga untu’ anggaukangi sikontu parentaNa siagang hukkung-hukkunNa, kammayatompa lanarupai parjanjianNa Batara siagang Umma’Na sangkamma niaka tattulisi’ lalang ri anjo kittaka.

31(34:30)

32Sikontu tu Benyamin siagang sikontu tau maraeng niaka ammantang ri Yerusalem nasuro kabusuki a’janji untu’ anturuki anjo parjanjianga. Jari naturukimi tu Yerusalem anjo paratorang-paratorang niaka lalang ri anjo parjanjianga, iamintu parjanjiang napareka ke’nanga siagang Allata’alana boe-boena ke’nanga.

33Sikamma barhala-barhala appakaringi’-ringika, niaka ri sikontu Israel, niancuru’ ngasemmi ri Karaeng Yosia. Nampa nasuro ra’yaka sollanna anynyomba mae ri Batara, Allata’alana boe-boena ke’nanga. Jari lalang attallasa’na ija Yosia, tuli majarreki tappa’na ra’yaka mae ri Batara.


  Share Facebook  |  Share Twitter

 <<  2 Tawarikh 34 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel