Dual Panel1Nakabirisi Batara tau ammakea timbangang jekkong, mingka sannangi nyawaNa mae ri tau ammakea timbangang annaba.
2Tau borroa lanihinai; tau tuna pa’maika cara’deki.
3Tau bajika nirenrengi ri kalambusanga; tau paballe-ballea lanipanraki ri balle-ballena.
4Punna nadallekang kamateanga, tenamo matu-matunna barang-baranna; lasalamaki tallasa’nu punna te’ne pa’maikko.
5Oloanna tau bajika nilapparri ri kalambusang, mingka tau ja’dalaka naerangi kalenna mae ri kapanrakanga.
6Tau lambusuka salamaki lanri te’nena pa’mai’na; tau tenaya nakkulle nipatappa’, ta’loposoki lanri kangoanna.
7Punna mate tau ja’dalaka, mate tommi panrannuanna; manrannuanga ri kale, tena matu-matunna.
8Tau bajika nipalili battu ri kasukkarranga; tau ja’dalaka anggappai salibanra.
9Pa’bicaranna tau ja’dalaka ammanraki; kacara’dekanna tau bajika lappasalamaki.
10Accayai kotaya punna anggappa dalle’ tau lambusuka; akkio’ rannui ra’yaka punna mate tau ja’dalaka.
11Pangngellainna tau lambusuka ampakaga’gai kotaya; kana-kananna tau ja’dalaka ammanraki.
12Anghinai tau maraenga, iami panggaukang dongo’; tau bajika akkala’na tena nalakkana-kana.
13Tau appa’la’banga kabara’ anging takkulleai anna’gala’ rahasia, mingka tau nipatappaka akkullei narahasiakang parkaraya.
14Lapanraki bansaya punna tena ampimpingi; pila’ jai tumappakainga’, pila’ akkullei nirannuang kasalamakkanga.
15A’janjia lambayarrangi inranna tau maraenga lappabattui bala; bajikangngangi tenaya nipantamaki kalea ri anjo passalaka, sollanna niamang.
16Baine bajika akkala’na lanipakalompoi; tau pallaka lappasse’rei kakalumanynyangngang.
17Tau baji’ pa’maika napakaupaki kalenna; tau pallaka napakarugi kalenna.
18Kaupakkanna tau ja’dalaka iamintu kaupakkang takontutojeng, kaupakkanna tau a’gau’ bajika iami kaupakkang sitojennaya.
19Inai talanrea a’gau’ baji’, lamate’nei tallasa’na; inai ero’ dudu a’gau’ ja’dala’ lamangei ri kamateang.
20Nakabirisi Batara tau ja’dalaka pa’mai’na, mingka Nakamaseangi tau tenaya callanna tallasa’na.
21Tau ja’dalaka mattantu langgappai hukkungang; tau bajika lasalamaki.
22Kaga’ganna baine tenaya nabaji’ akkala’na sanrapangi cincing bulaeng ri ka’murunna bawia.
23Kaerokanna tau bajika langngerangi kabajikang, mingka akkullea narannuang tau ja’dalaka iamintu pangngalarroi bawang.
24Nia’ tau nangai assare, mingka pila’ kalumanynyangi, nia’ tau gi’giliki, mingka pila’ kasi-asi puppusuki.
25Tau jaia passarena, lakala’biangi, tau nangai annulung lanitulung tongi.
26Inai appatambung apa-apa lanitunrai ri taua, mingka inai ambalukangi langgappai pammuji.
27Inai rajeng a’gau’ baji’ laningai ri taua; mingka inai a’boya kaja’dallang, lanitujui ri kasukkarrang.
28Inai ampattoangi barang-baranna, larunangi sanrapang leko’ toa; tau bajika la’bakkaki sanrapang cu’la’ loloa.
29Tau ampakasusayai pakkalabinianna, latappelaki sikontu apa-apanna. Tau toloa lanalayani tau cara’deka.
30Tau bajika lanikatutui tallasa’na; tau cara’deka lakatambangi tau amminawanga ri ia.
31Punna lannarima todong pa’balasa’ tau bajika ri anne linoa, mattantumi langgappana hukkungang tau ja’dalaka siagang tau dorakaya.