Dual Panel1Pakkalabinianga nibangungi ri kacara’dekanna bainea mingka niruntungi ri kadongokanna.
2Tau lambusuka mallaki siagang mappakala’biriki ri Karaeng Allata’ala; tau tenaya nalambusu’ ri tallasa’na nahina
3Lanri tampona, nangai napakatinggi kalenna tau dongoka; tau cara’deka lanila’langi ri kana-kananna tonji.
4Punna tena sapi, tena wassele’na kokoa; lanri kagassinganna sapia, lalla’bi kattoanga.
5Sa’bi lambusuka tuli napaui apa kontutojenga; sa’bi tanipatappaka tuli a’balle-ballei.
6Tau tampoa tena nala’jari cara’de’, mingka tau cara’deka gampangi appilajara’.
7Teako agangi siagang tau dongoka’; tena apa-apa lakkulle naajarrangko.
8Tau cara’deka naassengi angkana antekamma batena lappanggaukang, tau dongoka nitipui ri kadongokanna.
9Tau dongoka tena najampangi angkanaya apaka nipammopporangi dosana yareka tena; tau bajika eroki nipammopporang dosana.
10Susaya siagang rannua niaki niboli’ lalang ri pa’maika; tau maraenga takkulleai amminawang angkasiaki.
11Balla’ tau bajika tuli jarreki; balla’ tau ja’dalaka larumbangi.
12Nia’ oloang lambusuki cinikanna, mingka kale’bakkanna anjo oloanga mangei ri kamateanga.
13Ri bokona kakkalaka nia’ kapang karru’; karannuanga akkullei kasusaang kale’bakkanna.
14Tau ja’dalaka lanakattoi wassele’ kaja’dallanna, tau bajika lanakattoi rappo kabajikanna.
15Tau dongoka tappaki mae ri sikontu bicaraya, tau cara’deka tutui ri panggaukang.
16Tau bajika akkala’na tutui na bella battu ri kaja’dallanga, tau dongoka lintaki nai’ larrona, nampa amang nasa’ring.
17Tau nangaia larro dongoki panggaukanna; tau cara’deka sa’baraki sipa’na.
18Tau tenaya pangalamanna la’jari dongoki; tau cara’deka lapila’ katambangi pangngassenganna.
19Tau ja’dalaka latunduki mae ri tau lambusu’ pa’maika, untu’ appala’ sollanna nikamaseang.
20Tau kasi-asia tena ningai ba’lalo ri bela-belana; mingka tau kalumanynyanga jai sahaba’na.
21Inai-nai anghinai paranna tau, a’gau’ dosai; inai-nai baji’ pa’mai’ ri tau kasi-asia, lamate’nei.
22Inai-nai anggaukangi apa bajika, lanipatappaki na nipakala’biri’; inai-nai anrancanakangi kaja’dallanga niaki ri oloang salaya.
23Lalang sikontu usahaya nia’ passawallanna; bicara kosonga napatu’guru’ kasi-asi taua.
24Tau cara’deka nipuji lanri kacara’dekanna; tau dongoka alla’bangi niasseng kadongokanna.
25Punna nia’ sa’bi a’bicara tojeng, napasalamaki nyawaya; punna a’bicara balle-ballei, ta’gilingi ambaliangi aganna.
26Tau mappilangngeria ri Batara a’jari amangi, siagang kaluargana lania’ pa’la’langanna.
27Mappilangngeria ri Batara iami pappokokanna kate’neanga; siagang oloang untu’ alliliangi kamateanga.
28Kakalumanynyanganna karaenga iamintu ri pajaina ra’ya’na; punna tena ra’ya’na takkulleai koasa.
29Tau cara’deka talintakai larro; tau dongoka takkulleai nalewai kalenna.
30Pa’mai’ sannanga napakabajiki tubua; angngiri mataya sanrapangi garring kamateanga.
31Inai a’gau’ baji’ mae ri tu kasi-asia, napakala’biriki Allata’ala; inai anjallakkangi tau lammaya, nahinai Tumappare’na.
32Tau ja’dalaka panraki lanri kaja’dallanna, tau bajika nijagai lanri kalambusanna.
33Kacara’dekanga tuli niaki lalang ri pikkiranna tau bajika akkala’na; mingka nijallakkangi lalang ri pikkiranna tau dongoka.
34Kaadelanga siagang kabajikanga naangkaki areng baji’na bansaya, mingka dosaya ampa’jari tunai bansaya.
35Sannangi pa’mai’na karaenga mae ri pagawe cara’deka; mingka larroi mae ri pagawe tenaya nakkulle ampajappai tugasa’na.