Alkitab Mobile SABDA
[VER] : [MAKASAR]     [PL]  [PB] 
 <<  Amsal 22 >> 

1Areng bajika lompoangngangi anggaranna na barang jaia; bajikangngangi nikamaseanga na nisarea pera’ siagang bulaeng.

2Tau kalumanynyanga siagang tu kasi-asia nia’ sangkammanna: Batara ngaseng ampa’jari ke’nanga.

3Tau cara’deka a’lili punna accini’ bahaya; tau toloa a’jappa tulusuki nampa nituju ri bala.

4Tau mappilangngeria ri Batara na napakatuna kalenna, lamate’nei, kala’biangi, siagang nipakalompoi.

5Sikkoka siagang tadoka niaki ri oloanna tau jekkonga, liliang ngasengi anjo sikammaya, punna erokko salama’.

6Ajaraki se’rea ana’ antekamma batena siratang attallasa’, na sa’genna toa tuli lakammana batena attallasa’.

7Tu kasi-asia nikoasai ri tau kalumanynyanga; tau angnginranga nikoasai ri tau assarea angnginrang.

8Tau appakioroka kajekkongang lakkattoi bala; kale’bakkanna lalanynya’mi appaero’-ero’ na appanggaukang.

9Tau baji’ pa’maika nibarakkaki ri Batara, lanri nabagei dalleka siagang tau kakuranganga.

10Bongkai tau nangaia anghina, nammari passisalanga, passimusuanga, siagang sicalla-callaya.

11Tau nangaia kalambusanga siagang te’nei bicaranna, la’jari sahaba’na karaeng.

12Lanri nisungkena balle-ballena tau jekkonga, Najagaimi Batara sollanna tuli niparakai pangngassengang tojenga.

13Lapung tau malasaka nangai ammantang ri balla’; nakana, "Nia’ singa pantara’, nakanrea’ sallang ri tangngana aganga."

14Panynyonyo’na baine salaya sangkammai sikko’; tau nikalarroia ri Batara loposoki antama’.

15Siratangi ana’-anaka anggaukangi katoloanga, mingka raukanga akkulle angngajaraki ke’nanga sollanna napinra panggaukanna.

16Inai ero’ a’jari kalumanynyang na najallakkang tu kasi-asia na nasare hadia tau nia’-niaka kale’bakkanna lasurokaui.

17Pilangngeri, lakupangngajarrangi mae ri kau pappakainga’ bajika! Parhatikangi pangngajarakku.

18Lasannangko punna nuboli’ ri pa’mai’nu anjo pangngajarangku. Na lanri kammana sadia mako punna erokko ampakei.

19Kupangngajarrangi mae ri kau kamma-kamma anne lanri kukellaiko ampatanjengi panrannuannu mae ri Batara.

20Tallumpulo pappakainga’ le’ba’ kutulisi’ untu’ ikau, iamintu pappakainga’ ammonea pangngassengang siagang pappakainga’ baji’;

21siagang lampangngajarrangi mae ri kau apa annaba tojeng-tojenga. Sallang, punna nikuta’nangko, akkullei annaba pappialinnu.

22Teako pakarugi tu kasi-asia, kalanri lammana bawang; na punna ri pangadelang teako alle passai ha’na tu tenaya pakkullena.

23Saba’, laNialleangangi ri Batara ri parkarana ke’nanga, siagang laNaallei nyawana tau anjallakkangai ke’nanga.

24Teako sileporangi siagang tau nangaia larro siagang tau lintaka bambang cera’na.

25Sallang lanuturuki, nampa takkullea nupela’ anjo kabiasanga.

26Teako a’janji untu’ antanggongi inranna tau maraenga.

27Punna sallang tanukullea allappassi, manna katinroannu lanialleang jako.

28Tea sikaliko appalessoki pa’baeng-baeng butta, ia le’bakamo napattantu boe-boenu.

29Le’bakko anciniki tau cara’deka anggaukangi jama-jamanna? Anjo taua lanisarei jama-jamang ri balla’ lompona sikamma karaenga, teai balla’ biasaya.


  Share Facebook  |  Share Twitter

 <<  Amsal 22 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran