Alkitab Mobile SABDA
[VER] : [MAKASAR]     [PL]  [PB] 
 <<  Amsal 25 >> 

1Anne nia’ siapa are pappakainga’ maraengang battu ri Salomo, nisalinga ri siapa are pagawena balla’ lompona Karaeng Hizkia, karaeng tu Yehuda.

2Nipakala’biriki Allata’ala lanri apa-apa Narahasiakanga; karaenga nipakalompoi lanri apa akkullea napakasingara’.

3Sanrapang tamparang lompo lantang siagang langi’ tinggia, kammaminjo pikkiranna karaenga takkulleai niselangngi.

4Tangkasi rolong peraka battu ri ra’masa’na, nampami ga’gaya nipare’ ri panrea.

5Pakabellai sikamma pappakainga’ ja’dalaka battu ri balla’ lompoa, nampami jarre’ pamarentahanga lanri kaadelang.

6Punna andallekangko ri karaeng, paralluko tuna pa’mai’, teako a’gio’ kammai tau tinggi empoannu.

7Bajikangngangi nisuroa nai’ ri tampa’ malompoanganga kala nisuroko ampassareangi anjo tampa’nu mae ri tau tinggianganga pangka’na.

8Teako akkaro-karo dudu angngerangi parkaranu mange ri pangadelang; saba’, punna kale’bakkanna a’nyatai angkana ikau sala, apapi pole akkulle nugaukang?

9Punna sisala pahangko agannu, ia tommo bawang nuagang ampa’le’baki, mingka rahasiana tau maraenga teako sungkei.

10Saba’, sallang ikau niarengko tau boncoro’ bawa siagang kodimi arennu lalang sikontu tallasa’nu.

11Tangara’ nipasuluka ri wattu coco’ sikalia sanrapangi rappo bulaeng lalang ri panne pera’.

12Pappasailena tau cara’deka mae ri tau eroka mappilangngeri, sanrapangi cincing bulaeng yareka belo-belo bulaeng.

13Tunisuro tamamminraya, napakasannangi nyawana tumassurona, sanrapang je’ne’ dinging nakasiaka pakattoa ri kokoa.

14Janji-janji tanirupaia, sanrapangi rammang siagang anging tamappaturunga bosi.

15Kasa’barrang nirurungangang ri kana-kana lamma akkullei napa’jari tappa’ tukoasaya, siagang naancuru’ sikontu angngewaya.

16Teako angnganrei bani jai dudu; gassingka napa’jari takkoakko.

17Teako a’mole-mole dudu a’manaikang ri siampi’ balla’nu, gassingka lanrei nampa nakabirisiko.

18Tuduhang nipare’-pareka akkullei angngerang kamateang, sanrapang pa’dang, palu-palu, yareka ana’ pana cidu’.

19Tappa’ ri tau a’bali’ ballang ri wattu kasusaang sanrapangi akka’lero ammake gigi a’gio’ yareka a’jappa siagang bangkeng akkeppang.

20Akkelong-kelong untu’ tau natujua susa sanrapangi assolari tau ri wattu dinging, sanrapang appatiri’ cukka ri loko’na.

21Punna cipuru’ musunnu, sarei kanre; punna turerei, sarei angnginung.

22Lanri kammana nupa’jarimi tu’guru’ siri’-siri’ na laNabarakkakiko Batara.

23Anging battu wara’ mattantu langngerangi bosi; kamma tomminjo a’bi’nyaraka carita mattantu appaumbai kalarroang.

24Bajikangngangi ammantanga ri panyingkulu’ lotenna ballaka, kala assiballaka siagang baine pa’beseranga.

25Annarimaya kabara’ baji’ battu ri pa’rasangang bella sanrapangi angnginung je’ne’ dinging ri wattu turere.

26Tau bajika, ampappibetangai kalenna mae ri tau dorakaya sanrapangi timbuseng je’ne’ pucca’ yareka bungung ra’masaka.

27Tabajikai angnganre bani jai dudu, kamma tomminjo kana appalece jai dudua.

28Tau tenaya nakkulle nalewai kalenna sanrapangi kota runrunga tembo’ pattahanganna.


  Share Facebook  |  Share Twitter

 <<  Amsal 25 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran