Dual Panel1Iaminne kana-kana napaua Agur, ana’na Yake, battu ri Masa: "Posoa’, o, Allata’ala, posoa’! Cappu’mi kagassingangku!
2Toloa’ sanrapang olo’-olo’; tena pammahangku.
3Tena kule’ba’ appilajara’ kacara’dekang manna sike’de’ tania’ kuasseng ri passala’na Allata’ala.
4Tau kereanga le’ba’ nai’ naung ri suruga? Le’bakika angngangkang anging lalang limanna, siagang anroko’ je’ne’ lalang ri bajunna, yareka ampattantui pa’baeng-baenna linoa? Inaika anjo taua, siagang inai ana’na? Mattantu nuassengi!
5Narupai janjinNa Allata’ala. Sanrapangi pa’lapa’ batangkale mae ri sikontu tau battua a’la’lang mae ri Ia.
6Punna nutambai apa napaua, lanapasaileko siagang lanapa’nyatai angkana ikau paballe-balleko."
7"O, Allata’ala, kupalaki ri tenanapa kumate, Kisarea’ rua passalaka anne.
8Tena lalo kupaui kana-kana jekkonga siagang a’balle-ballea, siagang teaKi’ lappassangia’ a’jari kasi-asi yareka akkalumanynyang. Kisarea’ apa kuparalluanga bawang.
9Saba’, punna kalumanynyanga’, gassingka kukana sallang angkana tenamo kuparalluangKi’. Na punna kasi-asia’, gassingka a’lukkaka’ sa’genna kura’massi arenTa."
10Teako pitinai se’rea ata mae ri karaenna, gassingka nasumpako siagang nabilang salako.
11Nia’ tau assumpai manggena siagang tena napakalompoi amma’na.
12Nia’ tau nakanai kalenna tangkasa’ na sitojenna sanna’ rantasa’na.
13Nia’ tau nakanai kalenna baji’ sikali, teai sipato’ baji’na!
14Nia’ tau amboyai dalle’na sanna’ palla’na batena; sanna’ sekke’na siagang napaccoki tu kasi-asia siagang tau lammaya.
15Papaccoka rua ana’na; rua-rua niarengi "Untu’ inakke!" Nia’ appa’ passala’ tena sanggana:
16linona tau matea, baine tenaya nale’ba’ allassukang, butta kalotoro’ turerea ri bosi, na pepe’ a’lepaka mange-mange.
17Tau ancau-cauwai manggena yareka amma’na toayamo, siratangi nipasambila assulu’ sollanna nitotto’ matanna ri jangang-jangang kalaa’ siagang nikanre maya’na ri balangkoa’.
18Nia’ appa’ passala’ sukkara’ sikali kupahang:
19balangkoa’ anri’baka ri allaka, ulara’ a’loloka ri batu karanga, kappala’ assombalaka ri tangnga tamparanga, na sipasang ana’ rungka a’bayu’-bayuanga.
20Iaminne akkala’na se’rea baine a’bali’ ballanga ri bura’nenna: Le’ba’na a’gau’ sala, angnganremi nampa nalu’lu’ bawana, nampa nakana, "Tena apa-apa kugaukang!"
21Nia’ appa’ passala’ sukkara’ nitarima ri sikontu linoa:
22se’rea ata a’jari karaeng, tutolo anggappai sikontu apa nakaerokia,
23baine akkullea a’nikka na taningaia ri taua, ata baine angngalleangi empoanna karaeng bainena.
24Ri linoa anne nia’ appa’ rupanna olo’-olo’ ca’di mingka sanna’ cara’de’na, iamintu:
25Kaluara, olo’-olo’ lamma, mingka napasadiai kanrena ri timoro’na.
26Palandu’, olo’-olo’ lamma mingka napareki balla’na ri bulu’ batua.
27Katimbang, olo’-olo’ tena karaenna, mingka ta’atoroki barisanna.
28Cacca’, olo’-olo’ akkullea nijakkala’ siagang lima, mingka niaki ri balla’ lompona karaenga.
29Nia’ appa’ passala’ appakalannasaki punna niparhatikangi batena a’jappa, iamintu:
30Singa, olo’-olo’ kaminang kassaka ri sikontu olo’-oloka siagang tenaya namalla’ manna ri apa-apa mamo;
31bembe laki, jangang laki ammenteng kassaka a’jappa, na karaenga ri dallekanna ra’ya’na.
32Punna lanri kadongokannu na nutampo anrancanakangi apa-apa ja’dalaka, tutuko!
33Saba’, punna appasileokko dadi’, langgappako mantega. Punna nutunrung ka’murunna taua, assuluki cera’na. Punna appaumbako kalarroang, antamakko lalang ri pa’beseranga.