Dual Panel1Lanrea’ siagang erokka’ ta’langnge kukasia’ ri tallasakku, nakupasulu’ ngasemmo pa’risi’na nyawaku.
2O, Allata’ala, teaKi’ salakangia’ inakke; Kipisingarianga’ angngapa na inakke Kibaliang.
3Apa Kisawala’ punna Kijallakkanga’ kamma anne, siagang Kipela’ bate pa’jari kalenTa? Apa Kisawala’ punna Kiiyoang panggappana siagang rancanana tau ja’dalaka?
4PikkiranTa tena nasangkamma pikkiranna rupataua
5siagang umurutTa tena nasimbodo umuru’na ke’nanga.
6Punna kamma, angngapa naKiboya sikontu dosaku? Angngapa Kiondangi sikontu kasalangku?
7Sitojenna Kiassengi siagang Kipahangi, angkana tena kusala, mingka annaba’. Kiassengi angkana manna sitau tania’ akkulle ampasalamaka’ battu ri limanTa.
8Inakke anne bate pare’ limanTa’, masa’ laKipanrakia’ kamma-kamma anne?
9Kiu’rangi angkana battu ri butta pi’ nakiparekka’! Masa’ laKipa’jari limbu’buka’ ammotere’?
10Lanri pangngellainTa nakkulle manggeku ampa’jaria’ Kipakalompoa’ lalang ri battanna ammakku.
11Kipareki tubuku a’jari buku-buku siagang ura’-ura’; Kisarei bukungku dageng nampa Kiroko’ bukkuleng.
12Kisarea’ katallassang; Kikamaseanga’, Kijagai nyawaku lalang pammarakainTa.
13Mingka anne kamma kuassemmi angkana siapa sallona tamakkana-kanaKi’ anrancangi kacilakangku.
14Kijannangngia’ gassingka appareka’ kasalang sollanna tena Kiero’ ampamopporanga’.
15Punna a’gau’ doraka’, a’jari cilakami sarengku! Mingka punna tena callana panggaukangku, tuli nikana tonja’ tau a’gau’ dosa! Tena kubarani angngangkaki ulungku, lanri si’nai pa’maikku siagang tunai kusa’ring.
16Punna nia’ wassele’ bajikku, manna tena siapa, Kiondanga’ sanrapang singa. Nampa Kipappicinikang ammotere’ koasaTa, poro untu’ ampakamallaka’.
17Tuli appa’niakKi’ sa’bi untu’ ambalianga’; siagang pila’ lompomi larroTa mae ri nakke. Kipagioki sikamma pasukang beruTa untu’ ambakkaia’ siagang ambundukia’.
18Angngapa Kilappassanga’ lassu’ ri lino? Bajikangngang matema’ ri tenanapa nacinikka’ taua!
19Jari sangkamma’ kusa’ring tau tale’ba’ nilassukang, saba’ lalangija’ ri battanna ammakku kunitarawammo.
20Ah, tenamo nasallo kulamate, jari lappassamma’ kale-kalengku, sollanna akkulle kukasia’ wattungku niaka tassesa anne.
21Tasalloami ku’lampa na kutammoteramo pole, mange ri pa’rasangang sassang siagang anremeng dudua,
22pa’rasangang makkapu’, rassi bayang-bayang siagang karicuang, sangkammayaji singaraka siagang sassanga."