Dual Panel1Appialimi Zofar angkana, "He Ayub, kasi’rikanga’ napakamma kanannu, kamma-kamma anne erokka’ ampialiko linta’.
2(20:1)
3Anjo kana-kanannu anghina sikali, mingka kuassengi apa pialinna.
4Tenaka nuassengi angkana battu ri jammang riolo dudu, ri wattu appakaramulana niboli’ rupataua ri lino,
5karannuanna tau ja’dalaka poro sinampe’ji bawang, siagang kasannanganna tau dorakaya sipakkida mataji?
6Manna pole narapi’ langika kalompoanna, sa’genna nabuttu’ ulunna rammanga,
7mingka lalanynya’ tonji satunggu-tungguna, lanynya’ battu ri linoa, nahina sikali carana lanynya’. Sikamma tau le’baka angngassengi, lakkuta’nangi angkana, ‘He, kemae lampana?’
8Lalanynyaki sanrapang bayang-bayanna so’naya, lanynya’ sanrapang paccini’ ri wattu bangngia.
9Tenamo niciniki ri mata; tenami ri tampa’ pammantanganna.
10Apa nalukkaka riolo battu ri tau tenaya apa-apanna, musti nisambei ri ana’-ana’na.
11Manna narungka siagang pore, mingka poro sinampe’ji na’jari limbu’bu’ bawang.
12Tamaka te’nena kaja’dallanga lalang ri bawana! Kamma nipassayangi lania’lu’; Lanri kammana anjo naboliki rawanganna lilana, sollanna sallo nakasia’ nyamanna.
13(20:12)
14Mingka anjo kanrea tappinrai lalang ri battang, a’jari racung pai’ angngerang kamateang.
15Barang-barang nilukka’ naa’luka, tarpassa nalangngeangi; Napasuluki Allata’ala battu lalang ri battanna.
16Tau ja’dalaka langnginungi racung paerang bala, lamatei lanrinna, sanrapang tunikokko’ ri ulara’ a’racung.
17Talanakasiakkami minynya’ zaitun alla’bia, yareka dadi’ siagang bani tattumpa-tumpaya napakamma jai.
18Sikontu passawalanna musti napoterangi; talanakasiakkai wassele’ usahana.
19Saba’ najallakkangi siagang napakkasi-asi tau tenaya apa-apanna; narampasaki balla’ tenaya nabangungi.
20Lanri angngoana na tenamo passanggana, natenamo sukku’na pakkasia’na.
21Punna angnganrei napa’la’busu’ ngasengi sikamma niaka lanri kammana anjo tenamo nattahang kala’bianna.
22Ri wattu sangganamo kala’bianna, battumi pa’risika siagang susaya antujui.
23Ri wattu sibu’na ambonei battanna, sanna’mi larroNa Allata’ala nampa nihukkung.
24Punna lari alliliangi pa’dang bajaya, lanibokkaki ri pana tambaga.
25Nitabai ri pana sa’genna loko’; cappa’ pana accilla’ antarrusuki kalenna, nanikalimbu’mo ri malla’ pa’mai’na.
26Ancuru’mi sikontu barang boli’-boli’na: ia siagang sikontu kaluargana nikanre ri pepe’ taniparinraya ri rupatau.
27Nisungkei ri langi’ kaja’dallanna; ambangungi buttaya ambaliangi.
28Sikontu kakalumanynyangnganna lacappuki, lanri allumpana larroNa Allata’ala.
29Iaminjo sarenna tau kodi sipaka, sare Napattantua Allata’ala mae ri ia."