Alkitab Mobile SABDA
[VER] : [MAKASAR]     [PL]  [PB] 
 <<  Ayub 7 >> 

1Rupataua sangkammai tau nipassa barjuang; susai katallassanna sangkamma tau angnganre gaji;

2sanrapangi ata nakkuka ri pa’la’langang; sanrapangi pajama attayanga sambe poso.

3Pila’ mange bulang tallasakku tattantuai natujua; pila’ mange bangngi rassi atingku siagang kasi’nang.

4Punna mangea’ tinro, kamma ta’beso’ la’bui bangngia; nakkuka’ ri allo, takkullea’ sannang anra’ba.

5Rassi kalengku gallang-gallang siagang rakki’ cera’; a’bokka’ bukkulengku appasulu’ nana.

6Tallasa’ tamanrannuangku larimi mae ri kala’busanna, sarringngangngang nalarina sikoci masinana tau anjaika.

7U’rangi, o, Allata’ala, tallasakku poro pa’maikang nappasa’ji; tappelaki kate’neangku, tena sikali bate-batena.

8Anne kamma Kicini’ma’, mingka tasalloami. Punna Kiboya’ sinampe’, tenama’.

9Sanrapang rammang ta’bayang nampa lanynya’, taua lamate tongi, talammoterai. Sikontu tau le’baka angngassengi anjo taua, takkaluppami mae ri ia, tenamo angngu’rangi.

10(7:9)

11Lanri kammana anjo takkullea’ a’mereki! Takkulleai kuboli’ pa’risikku siagang pacceku. Musti kusungkei bawaku, siagang kupasulu’ bone atingku.

12Angngapa na inakke anne tuli Kijannangngi siagang Kijagai? Apaka inakke anne Kikana’ naga tamparang angngeranga bahaya?

13Anra’ba-ra’ba’ siagang erokka’ ammari-mari ri posoku; a’boya’ karingangngang untu’ kalussakkang pa’maikku.

14Mingka Kipakamallaka’ lalang so’na; appabattuKi’ so’na kodi siagang pikkirang takamma-kamma.

15Sa’genna kungaiangngang niaccekanga kunampa mate kala attallasaka lalang anne kapa’risanga ri kalengku.

16Mangngamma’ siagang lanrema’ attallasa’; erokka’ mate! Lappassamma’ mange, saba’ tenamo anggarangku attallasa’.

17Angngapa naparallu kamma rupataua mae ri Katte? Angngapa natuli Kiparhatikang kamma panggaukanna?

18Tunggala’ bari’basa’ tuli Kisalidiki, siagang tunggala’ wattu tuli Kiuji.

19Angngapapi naKiallei rupanTa battu ri nakke, sollanna akkulle kua’lu’ ilorokku?

20He Pajagaku, apaka rugiKi’ lanri dosaku? Angngapa na inakke Kipare’ pallio-lio ri panaTa? Battala’ sikalika dosaku antujuKi’?

21Tenaka naKikkulle ampamopporangi dosaku? Tenaka oloTa ampamopporangi salangku? Sinampe’ mami nakunra’bamo lalang ri kuburanga, na punna Kiboya’ sallang, tenamo naKigappa’."


  Share Facebook  |  Share Twitter

 <<  Ayub 7 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran