Alkitab Mobile SABDA
[VER] : [MAKASAR]     [PL]  [PB] 
 <<  Bilangan 20 >> 

1Lalanna bulang se’re nabattu sikontu umma’ Israel ri parang lompo Zin nampa ammantang ri Kades. Anjorengi mate siagang nitarawang Miryam.

2Ri se’reang wattu tenamo je’ne’ ri tampa’ pakkemaanna ke’nanga. Jari battumi sikamma anjo taua allipungi Musa siagang Harun,

3nampa a’moro-moro angkana, "Bajikangngangi ebara’ angkana matei ikambe siagang sikamma sari’battanna ikambe ri dallekanNa Batara.

4Angngapa nanuerangi ikambe mae anrinni ri parang lompoa? Sollanna namate ikambe siagang olo’-olo’ piarana ikambe anrinni?

5Apa ero’nu nanuerang ikambe assulu’ battu ri butta Mesir mae anrinni ri tampa’ sessa kammaya, tenaya nakkulle nipa’lamungi apa-apa? Anrinni tena gandung, tena poko’ ara, anggoro’, siagang delima. Ba’lalo manna je’ne’ inung tena todong!"

6A’lampami Musa siagang Harun ampakabellai kalenna ri anjo taua nampa ammenteng ri ampi’na pakke’bu’ KemaNa Batara. Su’ju’mi ke’nanga, nampa battumo caya kahaderanNa Batara ansiori ke’nanga.

7Nakanamo Batara mae ri Musa,

8"Allei takkang niaka ri dallekanna Patti Parjanjianga, nampa ikau siagang Harun musti nupasse’rei sikontu ummaka. Ri dallekanna ngaseng ke’nanga, musti akkanako mae ri bulu’ batu niaka anjoreng sollanna appasulu’ je’ne’. Kammaminjo batenu ampasuluki je’neka battu lalang ri anjo bulu’ batua sollanna akkulle angnginung ra’yaka siagang olo’-olo’ piarana ke’nanga."

9Jari a’lampami Musa angngallei anjo takkanga situru’ Naparentakanga Batara.

10Napasse’remi Musa siagang Harun sikontu ummaka ri dallekanna anjo bulu’ batua. Nampa angkanami Musa, "Pilangngeri, he ikau ngaseng tau pabali-balia! Apaka musti appasuluki je’ne’ ikambe battu lalang ri anne bulu’ batua untu’ ikau ngaseng?"

11Nampa naangka’ Musa anjo takkanga na natunrung pinruang anjo bulu’ batua. Jari assolong sarrimmi je’neka battu ri anjo batua, sa’genna akkulle ngasemmo angnginung taua siagang olo’-oloka.

12Mingka nikalarroimi Musa siagang Harun ri Batara, angkana, "Lanri kurang tappa’nu sipa’rua mae ri Nakke untu’ ampa’nyatai kakoasangKu matangkasaka ri dallekanna bansa Israel, tena nalanupimping ke’nanga antama’ ri pa’rasangang Kupa’janjianga mae ri ke’nanga."

13Iaminjo timbuseng je’ne’ niarenga Meriba. Nasaba’ anjoremmi ri tampaka a’moro-moro tu Israel mae ri Batara, siagang anjoreng tommi Napappicinikang kakoasanNa Batara matangkasaka mae ri anjo bansaya.

14Nampa akkirimmo Musa siapa are tunisuro battu ri Kades untu’ mange andallekang ri karaeng Edom. Angkanami ke’nanga, "Ikambe anne tubattuki’ ri suku-suku Israel niaka ija passisambungang bijanna siagang ikatte karaeng. Kiassenji kapang kasusaang antujuai ikambe karaeng.

15Boe-boena ikambe a’lampai mange ri Mesir nampa ammantang anjoreng attaung-taung sallona. Nampa anjo boe-boena ikambe siagang kalenna ikambe nigau’ tabaji’-baji’ maki’ ri bansa Mesir,

16sa’genna akkio’ ikambe appala’ tulung ri Batara. Nalangngere’mi Batara pakkio’na ikambe nampa nia’mo se’re malaeka’ Nasuro battu. Anjo malaekaka ampimpingi ikambe assulu’ battu ri butta Mesir. Kamma-kamma anne niaki ikambe ri Kades, se’reang kota ri pa’baeng-baenna daerana karaengku.

17Napalaki ikambe mae ri karaengku, nakipa’biang ikambe ammalo ri anne pa’rasanganga. Ikambe siagang olo’-olo’na ikambe tenaja nalammengka battu ri oloanga siagang tenaja nilantama’ ri koko-kokoa yareka koko-koko anggoroka. Tenaja nalanainung ikambe je’ne’ battua ri sikamma bungunna karaengku. Poro lanjorenji ri agang lompoa a’jappa ikambe sa’genna assulu’ battu ri daerana karaengku."

18Mingka appialimi tu Edom angkana, "Tena nukkulle nipa’biang ammalo ri daerana ikambe. Punna kamma ero’nu lanumalo, tena tanibundukinu ri kambe!"

19Nakanamo anjo tu Israelka, "Anjorenji ri agang lompoa la’jappa ikambe; na punna nia’ ri kambe yareka olo’-olo’na ikambe angnginungi je’ne’nu, nabayarappi kambe. Poro ero’ji bawang ammalo ikambe."

20Nakanamo pole anjo tu Edom, "Tena nakkulle!" Nampa assulu’mo ke’nanga siagang tantara kassa’na untu’ ambunduki tu Israel.

21Jari a’gilimmi tu Israel untu’ a’boya oloang maraeng lanri tenana nipa’biangi ri tu Edom numalo ri daerana ke’nanga.

22Nabokoimi umma’ Israel Kades nampa battu mange ri Moncong Hor,

23ri pa’baeng-baenna Edom. Anjoreng Nakanamo Batara mae ri Musa siagang Harun,

24"Tena nalantama’ Harun ri pa’rasangang le’baka Kupa’janjiang mae ri bansa Israel; lamatei lanri ikau sipa’rua nubaliangi parentaKu ri ampi’na timbuseng je’ne’ Meriba.

25Erangi Harun siagang Eleazar, ana’na, nai’ ri Moncong Hor.

26La’gasi pakeanna Harun nampa nupataba mae ri Eleazar. Harun lamatei anjoreng ri tampaka."

27Nagaukammi Musa anjo apa Naparentakanga Batara. Angngambi’mi Musa, Harun siagang Eleazar ri Moncong Hor, nicini’ ri sikontu ummaka.

28Nampa nala’gasimi Musa pakeanna Harun siagang napataba mae ri Eleazar. Iratemi ri coppo’na anjo monconga mate Harun, nampa ammotere’mo naung Musa siagang Eleazar.

29Nalangngere’mi sikontu ummaka angkanaya matemi Harun; napangngalleammi wattu kasusaang ke’nanga lalang tallumpulo allo.


  Share Facebook  |  Share Twitter

 <<  Bilangan 20 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran