Alkitab Mobile SABDA
[VER] : [MAKASAR]     [PL]  [PB] 
 <<  Bilangan 28 >> 

1Nasuromi Batara anjo Musa

2ampabattui mae ri bansa Israel angkanaya musti naparhatikangi siagang baji’ ke’nanga sollanna punna narapiki allo-allo le’baka nipattantu, assarei ke’nanga koro’bang-koro’bang a’rupa kanre-kanreang ampakasannangai nyawaNa Batara.

3Iaminne koro’bang mustia nipassareang mae ri Batara: Untu’ koro’bang tunggala’ allo, ruang kayu ana’ gimbala’ laki umuru’ sitaunga siagang tenaya callanna,

4sikayu untu’ passare bari’basa’, na sikayu untu’ passare karueng.

5Siagang anjo ana’ gimbalaka musti nipassareang tongi sikilo labu’ nipasileoka siagang silitere’ minynya’ zaitun kaminang bajika.

6Iaminjo koro’bang nitunu tamattappuka, appakkaramulaya nipassareang ri Moncong Sinai. Rasanna anjo passarea napakasannangi nyawaNa Batara.

7Siagang anjo ana’ gimbalaka musti nipassareang tongi silitere’ je’ne’ anggoro’ nipatirika irate ri tampa’ pakkoro’bangnganga.

8Anjo ana’ gimbala’ untu’ passare karuenga musti sangkammai carana nikoro’bangkang siagang passare bari’basaka, nirurungang je’ne’ anggoro’. Rasanna anjo koro’banga napakasannangi nyawaNa Batara.

9Punna allo Pammari-marianga musti nikoro’bangkangi ruang kayu ana’ gimbala’ lakia, umuru’ sitaunga siagang tenaya callanna, rua kilo labu’ nipasileoka minynya’ zaitun untu’ koro’bang nipatala siagang koro’bang je’ne’ anggoro’.

10Anjo koro’bang nitunua musti nipassareangi tunggala’ allo Pammari-mariang salaku tambanna koro’bang tunggala’ alloa siagang ngaseng koro’bang je’ne’ anggoro’na.

11Ri pakaramulanna tunggala’ bulanga musti nipassareangi mae ri Batara koro’bang nitunua iamintu ruang kayu sapi laki rungkaya, sikayu gimbala’ laki, tuju kayu ana’ gimbala’ laki umuru’ sitaunga, massing tenaya ngaseng callanna.

12Salaku koro’bang nipatala musti nipassareang tongi labu’ nipasileoka siagang minynya’ zaitun; tallu kilo labu’ untu’ tassikayua sapi laki; rua kilo labu’ untu’ gimbala’ lakia,

13nampa sikilo labu’ untu’ tassikayua ana’ gimbala’ laki. Anjo koro’banga iamintu koro’bang kanre-kanreang, siagang rasanna napakasannangi nyawaNa Batara.

14Siagang anjo koro’banga musti nipassareang tongi koro’bang je’ne’ anggoro’, ta’rua litere’ untu’ tassikayu sapi laki, se’re sitangnga litere’ untu’ gimbala’ laki, nampa se’re litere’ untu’ tassikayua ana’ gimbala’. Iaminjo paratoranna nikanaya koro’bang nitunua, musti nipassareanga ri tanggala’ se’re ri tunggala’ bulanga lalang sitaung.

15Salaku pannambang mae ri koro’bang tunggala’ alloa siagang je’ne’ anggoro’na, musti nipassareang tongi sikayu sapi laki untu’ koro’bang pammopporang dosa.

16Ri tanggala’ sampulo angngappa’ bulang se’re, iami Allo Paska untu’ Batara.

17Allo ammukona, tanggala’ sampulo allima, appakkaramulami Passua’-suarrang Roti Tenaya Nammake Pa’gambang; na lalang tuju allo, takkulleako angnganre roti ammakea pa’gambang.

18Ri allo makase’rena anjo passua’-suarranga, musti asse’re ngasengko untu’ anggaukangi ibadaya, siagang takkulleako anggaukangi jama-jamang battalaka.

19Passareangi mae ri Batara koro’bang nitunua iamintu ruang kayu sapi laki rungkaya, sikayu gimbala’ laki, siagang tuju kayu ana’ gimbala’ laki umuru’ tassitaunga, massing tenaya ngaseng callanna.

20Passareangi anjo koro’bang nipatala tenaya nakkulle tanipassareang, iamintu labu’ nipasileo’ minynya’ zaitun: tallu kilo labu’ untu’ tassikayua sapi laki, rua kilo untu’ gimbala’ laki,

21kammayatompa sikilo untu’ tunggala’ tassikayua ana’ gimbala’ laki.

22Passareang tongi sikayu bembe laki untu’ koro’bang pammopporang dosa. Kammaminjo caranu anggaukangi upacara pannangkasi dosana ummaka.

23Yangasenna anjo koro’banga a’jari pannamba mae ri koro’bang nitunu bari’basaka sangkamma biasa.

24Kamma tomminjo caranu musti assare koro’bang lalang tuju alloa mae ri Batara. Anjo koro’banga a’jari pannambai mae ri koro’bang nitunu tunggala’ alloa siagang koro’bang je’ne’ anggoro’na. Rasanna anjo koro’banga napakasannangi nyawaNa Batara.

25Ri allo makatujua musti asse’re ngasengko untu’ anggaukangi ibadaya siagang takkulleai nugaukang jama-jamang battalaka.

26Ri allo makase’rena Allo Lompo Pakkattoanga, allo lompo lappasa’na tappintujua tattuju allo, ri wattunna nupassareang gandung berua mae ri Batara, musti asse’re ngasengko untu’ anggaukangi ibadaya, siagang takkulleako anggaukangi jama-jamang battalaka.

27Passareangi mae ri Batara koro’bang nitunua iamintu ruang kayu sapi laki, sikayu gimbala’ laki rungkaya nampa tuju kayu ana’ gimbala’ laki umuru’ tassitaunga, massing tenaya ngaseng callanna. Rasanna anjo koro’banga napakasannangi nyawaNa Batara.

28Passareangi koro’bang tenaya nakkulle tanipassareang, iamintu labu’ nipasileoka siagang minynya’ zaitun: tallu kilo untu’ tassikayua sapi laki, rua kilo untu’ gimbala’ laki,

29nampa sikilo untu’ tassikayua ana’ gimbala’.

30Passareang tongi sikayu bembe laki untu’ koro’bang pammopporang dosa. Kammaminjo caranu anggaukangi upacara pannangkasinna dosana ummaka.

31Anjo sikamma koro’banga siagang koro’bang anggoro’na a’jari pannambai mae ri koro’bang tunggala’ alloa siagang koro’bang nipatalaya.


  Share Facebook  |  Share Twitter

 <<  Bilangan 28 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran