Alkitab Mobile SABDA
[VER] : [MAKASAR]     [PL]  [PB] 
 <<  Bilangan 3 >> 

1Iaminne sikamma kaluargana Harun siagang Musa ri wattunna a’bicara Batara mae ri Musa irate ri Moncong Sinai.

2Harun nia’ appa’ ana’na bura’ne, iamintu: Nadab kaminang toaya, nampa Abihu, Eleazar siagang Itamar.

3Nilantiki ke’nanga a’jari imang siagang upacara iamintu nitiriki minynya’ tompo’ ulunna ke’nanga.

4Mingka Nadab siagang Abihu matei ri parang lompo Sinai, ri wattunna andallekang Batara siagang pepe’ tenaya nahallala’. Anjo ke’nanga ruaya massing tena ana’na. Jari lalang attallasa’na ija Harun, Eleazar siagang Itamar tugasa’ salaku imang.

5Nakana Batara mae ri Musa,

6"Suroi suku Lewi battu andallekang, nampa nujo’jo’ ke’nanga a’jari palayang-palayanna Harun.

7Sarei tugasa’ ke’nanga ri KemaKu siagang musti nalayani sikamma imanga kammayatompa sikontu ummaka siagang jama-jamanna ke’nanga ri anjo KemaKu.

8Tugasa’na ke’nanga iamintu angngurusuki sikontu pakkakasa’ KemaKu siagang anggaukangi jama-jamanga ri anjo KemaKu untu’ ansambeangi tu Israelka.

9Battua ri bansa Israel, poro suku Lewi ji bawang kusare tugasa’ a’jari palayang situlina mae ri Harun siagang jari-jarina.

10Mingka Harun siagang sikamma ana’na musti nuangkaki untu’ anggaukangi tugasa’na salaku imang; pantaranganna ke’nanga, manna pole nai ampaccoba-cobai anggaukangi anjo tugasaka musti nihukkung matei."

11Nakana Batara mae ri Musa,

12"Kamma-kamma anne Kupilei sikamma tu Lewi a’jari taungKu. Ri wattunna Kubuno sikontu ana’ bungasa’na bansa Mesir, Kusa’laki untu’ KalengKu sikontu ana’-ana’ bungasa’na tu Israel siagang sikontu olo’-olo’ piara bungasa’ lassu’na ke’nanga. Yangasenna anjo iNakke pata. Salaku sambenna ana’-ana’ bura’ne bungasa’na Israel Kuallei tu Lewi untu’ KalengKu; anjo ke’nanga la’jari taungKu ngasengi. INakkemi Batara."

13(3:12)

14Ri parang lompo Sinai Nasuroi Batara anjo Musa

15ampareki dattara’na tu Lewi situru’ golongang bijanna siagang massing kaluargana ke’nanga. Sikamma ana’-ana’ bura’ne umuru’ sibulanga sa’genna irateanganna musti nicataki arenna.

16Nampa nagaukammo Musa anjo apa Naparentakanga Batara.

17Anjo Lewi nia’ tallu ana’na bura’ne, iamintu: Gerson, Kehat siagang Merari. Iami ke’nanga boe-boena golongang bija nisa’buka situru’ arenna ke’nanga. Gerson nia’ rua ana’na bura’ne iamintu: Libni siagang Simei. Kehat nia’ appa’ ana’na bura’ne iamintu: Amram, Yizhar, Hebron siagang Uziel. Merari nia’ rua ana’na bura’ne, iamintu: Mahli siagang Musi. Iaminjo ke’nanga boe-boena sikamma kaluarga nisa’buka situru’ arenna ke’nanga.

18(3:17)

19(3:17)

20(3:17)

21Golongang bijanna Gerson iamintu Kaluarga Libni siagang Kaluarga Simei.

22Ia jaina tu bura’ne golongang bijanna Gerson umuru’ sibulanga sa’genna irateanna iamintu 7.500 tau.

23Elyasaf ana’na Lael ampimpingi anjo golongang bijaya. Na anne ke’nanga angngallei tampa’ ri bageang laukanna bageang ri bokona KemaNa Batara lalang ri pakkemaanna bansa Israel.

24(3:23)

25Lalang urusanna KemaNa Batara, iaminjo ke’nanga tanggong jawa’ mae ri Kemaya siagang pattongko’na, kaeng ri pakke’bu’ pantamanga,

26layara’ paranglakkeng angkulilingiai Kemaya siagang tampa’ pakkoro’bangnganga, siagang gordeng pakke’bu’na anjo paranglakkenga. Iami ke’nanga tanggong jawa’ ri sikontu jama-jamang mae ri anjo barang-barang sikammaya.

27Golongang bijanna Kehat iamintu kaluarga-kaluargana Amram, Yizhar, Hebron siagang Uziel.

28Ia jaina tu bura’ne umuru’ sibulanga sa’genna irateanganna anjo golongan bijaya, yangasenna iamintu 8.600 tau. Iami ke’nanga tugasa’ angngurusuki barang-barang niaka ri KemaNa Batara.

29Elisafan ana’na Uziel ampimpingi anjo golongang bijaya. Anjo ke’nanga angngallei tampa’ ri bageang timboranna KemaNa Batara.

30(3:29)

31Iami ke’nanga tanggong jawa’ mae ri Patti Parjanjiang, mejang, sikamma tampa’ pakkoro’bangnganga, sikamma pakkakasa’ napakea sikamma imanga lalang ri Kamara’ Matangkasaka, siagang gordeng passimbanna Kamara’ Matangkasaka. Iami ke’nanga tanggong jawa’ mae ri sikontu anjo barang-barang sikammaya.

32Kapalana suku Lewi iamintu Eleazar, ana’na Harun. Ia angngawasi sikamma tau tugasaka ri Kamara’ Matangkasaka.

33Golongang bija battua ri Merari iamintu Kaluarga Mahli siagang Kaluarga Musi.

34Ia jaina tu bura’ne umuru’ sibulanga sa’genna irateanganna battu ri anjo golongang bijaya iamintu 6.200 tau.

35Zuriel ana’na Abihail angkapalai anjo golongang bijaya. Anjo golonganga angngallei tampa’ ri bageang wara’na KemaNa Batara lalang ri pakkemaanga.

36Iami ke’nanga tanggong jawa’ mae ri rangka-rangkana anjo Kemaya, balo’-balo’na, benteng-bentenna, dapara’na, siagang sikontu pakkakasa’na kammayatompa sikontu jama-jamanga mae ri sikamma anjo barang-barang kammaya.

37Kammayatompa mae ri sikamma benteng-bentenga, sikamma pa’lapaka, sikamma pa’lasaka siagang otereka untu’ pantaranga ri paranglakkenga.

38Lalang ri pakkemaanga, Musa siagang Harun kammayatompa sikamma ana’na ke’nanga musti angngallei tampa’ ri dallekang KemaNa Batara, ri bageang rayana. Iami ke’nanga tanggong jawa’ mae ri upacara ibadaya untu’ bansa Israel ri Kamara’ Matangkasaka. Pantaranganna ke’nanga, manna pole inai punna napaccoba-cobai nagaukang anjo jama-jamanga musti nihukkung matei.

39Sikontu tu bura’ne niaka lalang ri suku Lewi umuru’ sibulanga sa’genna irateanganna, ia nidattaraka ri Musa situru’ massing golongang bijanna ke’nanga lanri parentaNa Batara, yangasenna nia’ 22.000 jaina tau.

40Nakana Batara mae ri Musa, "Sikontu ana’-ana’ bura’ne bungasaka ri Israel iNakke pata. Cataki areng-arenna ke’nanga, ia umuru’ sibulanga sa’genna irateanganna. Mingka untu’ sambenna ke’nanga, Kupattantumi angkanaya sikontu tu Lewi iNakke ngaseng pata! INakkemi Batara! Kammayatompa sikamma olo’-olo’ piarana tu Lewi Kupattantumi untu’ a’jari sambe mae ri sikontu olo’-olo’ bungasaka lassu’ battu ri sikamma olo’-olo’ piarana bansa Israel."

41(3:40)

42Nagaukammi Musa anjo apa Naparentakanga Batara; nacata’mi arenna sikontu ana’ bura’ne bungasaka

43ia umuru’ sibulanga sa’genna irateanganna. Yangasenna ke’nanga nia’ 22.273 jaina tau.

44Nampa Nakana Batara mae ri Musa,

45"Sa’laki tu Lewi untu’ iNakke salaku sambenna sikamma ana’ bungasa’na tu Israel; kammayatompa olo’-olo’ piarana tu Lewi salaku sambenna olo’-olo’ piarana tu Israel.

46Lanri la’biangngangi ana’ bura’ne bungasa’na tu Israel 273 jaina tau najaina tu Lewi, jari anjo la’binna musti nupasuluki.

47Untu’ tunggala’ tasse’rea ana’, musti a’bayarakko lima doe’ pera’ situru’ anggarang niaka tappake ri KemaKu;

48passareangi anjo doeka mae ri Harun siagang ana’-ana’na."

49Nagaukammi Musa anjo kammaya.

50Angngallemi 1.365 doe’ pera’,

51nampa napassareang mae ri Harun siagang ana’-ana’na.


  Share Facebook  |  Share Twitter

 <<  Bilangan 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel