Dual Panel1Narapiki tallun taung Karaeng Yoyakim ammarenta ri Yehuda, battumi Nebukadnezar, iamintu karaeng Babel, ambunduki siagang angkurungi kota Yerusalem.
2Nisaremi pangngellai ri Batara untu’ ambetai Karaeng Yoyakim, kammayatompa anrampasaki siapa are jaina barang-barang tinggia anggaranna ri Balla’Na Batara. Sikamma tau nitahanga, naerangi mange ri balla’ rewatana ri Babel, nampa sikamma barang-barang tinggia anggaranna narampasaka, naboliki lalang ri gudang-gudanna anjo balla’ rewataya.
3Nampa naparentakangi karaenga mae ri Aspenas, iamintu kapala ruma tanggana balla’ karaenga, untu’ ammilei siapa are turungka battu ri anjo bansa Israel nitahanga, iamintu ana’-ana’ karaenga yareka bija karaenga.
4Anjo ke’nanga musti turungka tena caca’na. Musti tau gammara’, tinggi sikolana, cara’deki, jai pangngassenganna, kammayatompa siratangi untu’ anggaukangi tugasaka lalang ri balla’ karaenga. Musti naajaraki Aspenas anjo ke’nanga ammaca siagang annulisi’ lalang bicara Babel.
5Napattantu tongi karaenga angkanaya anjo kanrea siagang je’ne’ inung nipassareanga mae ri ke’nanga musti sangkammai siagang nipassareanga mae ri anggota kaluargana karaenga. Punna le’ba’mi ke’nanga nilati lalang tallun taung, musti mangei ke’nanga andallekang ri karaenga untu’ anggaukangi tugasaka ri balla’ karaenga.
6Ri sikamma anjo turungkaya nia’ tommi Daniel, Hananya, Misael siagang Azarya, kabusu’na ke’nanga battu ri suku Yehuda.
7Kapala ruma tanggana balla’ karaenga nasambeimi arenna ke’nanga a’jari: Beltsazar, Sadrakh, Mesakh siagang Abednego.
8Lanri pannulunNa Allata’ala, anjo Daniel sanna’ nisayanna siagang nikamaseanna ri Aspenas. Napattantui ri nyawana Daniel angkanaya tena nalanara’massi kalenna iamintu angnganre yareka angnginung anggoro’ battu ri balla’ karaenga; lanri kammana anjo napala’mi ri Aspenas sollanna nisare kanre maraeng.
9(1:8)
10Lanri malla’na ri karaenga, nakanamo Aspenas, "Kalenna karaenga le’ba’ ampattantui kanrenu siagang je’ne’ inunnu; jari turu’ ri panggappana, punna kurang gassingangngangko nicini’ nasikamma turungka maraenga, mattantu inakke lanabuno."
11Nampa natangara’ baji’mo Daniel anjo passalaka siagang pangawala’ nisarea tugasa’ ri Aspenas untu’ angngurusuki Daniel siagang tallua aganna. Nakana Daniel,
12"So’rimi ikambe lalang sampulo allo; gangang-gangammo bawang siagang je’ne’ sareangi ikambe untu’ kanre siagang je’ne’ inung.
13Punna le’baki sampulo allo, pasicini’mi rupanna ikambe siagang rupanna sikamma anjo turungka angnganrea kanre le’baka napattantu karaenga, nampa nutappuki situru’ paccini’nu sallang."
14Situjumi anjo pangawalaka, nampa naso’rimo ke’nanga lalang sampulo allo.
15Le’baki anjo wattu sampulo alloa, kabateammi nicini’ angkanaya anjo ke’nanga la’bi bajikangngangi siagang la’bi gassingangngangi nasikontu anjo turungka anggappaya kanre battu ri mejanna karaenga.
16Appakkaramula anjo wattua, anjo pangawalaka tenamo napatalangi ke’nanga kanre siagang je’ne’ inung napattantua karaenga, passangalinna gangang-ganganji siagang je’ne’ inung biasaji bawang.
17Allata’ala Nasarei anjo appaka turungka iamintu pangngassengang siagang kacara’dekang lalang a’rupa-rupa pangngassengang bicara siagang pangngassengang maraengannaya. Pantaranganna anjo Daniel Nasare tongi kacara’dekang untu’ ampakasingaraki battuanna pappiso’naya siagang paccinika.
18Ri kala’busanna anjo wattu tallun taung le’baka napattantu karaenga untu’ angngajaraki ke’nanga, naerammi Aspenas sikontu anjo turungkaya mange andallekang ri Karaeng Nebukadnezar.
19Le’baki naagang karaenga a’bicara ke’nanga, naassemmi karaenga angkanaya Daniel, Hananya, Misael siagang Azarya, la’bi cara’dekangngangi lalang a’rupa-rupa passala’ naanjo turungka maraengannaya. Jari appakkaramulami ke’nanga tugasa’ lalang ri balla’ karaenga.
20Sampang nia’ napabattu karaenga passala’, iamintu parallua nipakasingara’ siagang nitangara’, naassemmi karaenga angkanaya panggappana siagang pappitangara’na anjo appaka turungka a’lappi sampuloi baji’na nasikamma panggappana siagang pappitangara’na sikontu pacinika siagang sanro cara’deka ri sikontu kakaraenganna.
21Tulusu’ tugasa’na Daniel ri balla’ karaenga sa’genna battu Karaeng Koresy battu ri Persia ambetai tu Babel.