Alkitab Mobile SABDA
[VER] : [MAKASAR]     [PL]  [PB] 
 <<  Daniel 10 >> 

1Ri taung makatallu pamarentahanna Karaeng Koresy ri Persia, nia’ se’re pasang nipa’nyata mae ri Daniel niarenga todong Beltsazar. Kammatojengi anjo pasanga mingka sanna’ sukkara’na nipahang. Ri wattunna naboya Daniel battuanna, anggappami kasingarang Daniel angkana apa battuanna anjo pasanga lalang se’re paccini’.

2Anjo wattua mangea’ ansa’laki kalengku ri tampa’ sinoa nia’ tallu daminggu sallona.

3Lalang anjo sikammaya sallona tena nakungnganre kanre nyamang siagang dageng; tena kungnginung anggoro’, siagang tena todong kujangkai uukku.

4Ri tanggala’ ruampulo angngappa bulang makase’re anjo taunga, sitabanga’ ammenteng ri birinna Binanga Tigris, anjo binanga lompoa.

5Acconga’ nania’ kucini’ sitau ammake pakeang lenang siagang passikko’ aya’ bulaeng ti’no’.

6Accayai kalenna sangkamma paramata, rupanna kammai kila’ singara’na, siagang matanna a’rinra-rinrai sangkamma pepe’. Paling-palinna siagang bangkenna accillaki sangkamma tambaga le’baka nikeso’, na sa’ranna kammami nilangngere’ sa’ra tau jai.

7Kale-kalengku bawang anciniki anjo paccinika. Sikamma tau niaka kuagang tanacinikai, mingka lari ke’nanga mange accokko napakamma malla’.

8Nabokoia’ anjoreng kale-kalengku, amparhatikangi anjo paccini’ appata’bangkaya. Tenamo kusa’ring kagassingangku siagang pi’lasa’ sikalimi rupangku.

9Ri wattunna kulangngere’ sa’ranna, tenamo kungngu’rangi sa’gengku tu’guru’ tattinompang ri buttaya.

10Nampa nia’mo lima anseroa’ siagang ambangumma’ appatungkulu’ ri limangku siagang kulantukku.

11Nakanamo anjo malaekaka ri nakke, "Daniel, Nikamaseangko ri Allata’ala. Ambangungko siagang ammentengko nai’ nampa pilangngeri baji’-baji’ anne kana-kanangku. Nisuroa’ anne battu mae ri kau." Ri wattunna napau anjo kammaya, ammentemma’ nakuannekkere’.

12Nampa nakana ri nakke, "Daniel, teako mallakki. Nalangngere’mi Allata’ala pappala’ doannu appakkaramula ri nutappukinna untu’ ampakatunai kalennu sollannu a’jari cara’de’. Battuma’ anne a’jari pappiali mae ri pappala’ doannu.

13Malaeka’ pajagana kakaraengang Persia naewa’ nia’ ruampulo asse’re allonna. Nampa Mikhael, kalase’renna pamimping malaekaka, battu antulunga’. Kubokoimi anjoreng, ri Persia.

14Battua’ untu’ ampipahangngiangko apa lakajarianga sallang mae ri bansanu. Anne paccinika, iamintu passala’na allo labattua sallang."

15Ri wattunna napau anjo kammaya, a’dunduma’ siagang takkullea’ akkana.

16Nampa anjo malaeka’ a’rupataua napajonjoi limanna na nasero muncengku. Kukanamo ri ia, "O karaeng, anne paccinika nasessa sikalia’ sa’genna tena sikalimo kagassingangku kusa’ring.

17Sanrapanga’ ata ammentenga ri dallekanna karaenna. Antekamma bateku la’bicara mae ri katte? Tenamo kagassingangku siagang kusawala’mi a’maika."

18Jari sikalipi pole naseroa’, sa’genna katambang ammotere’ kagassingangku.

19Nakanamo, "Nakamaseangko Allata’ala; lanri kammana anjo tea’ mako lussakki yareka tea’ mako mallakki, gassingi kalennu!" Lalang napauna anjo kammaya, pila’ gassimmi kusa’ring kalengku, nampa kukanamo, "A’bicara maki’, karaeng. Kitambaimi kagassingangku kusa’ring."

20Nampa appialimi angkana, "Nuassengi angkana apa saba’na kubattu mae ri kau? Iamintu untu’ ampauangko apa tattulisika lalang ri Kitta’ Katojenganga. Kamma-kamma anne musti ammoterekka’ mange a’bundu’ siagang malaeka’ pajagana Persia. Le’baki anjo labattui malaeka’ pajagana Yunani. Tena lantulunga’ pantaranganna malaeka’ Mikhael, iamintu malaeka’ pajagana Israel, bansanu.

21(10:20)


  Share Facebook  |  Share Twitter

 <<  Daniel 10 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2023
Alkitab.SABDA.org

Android.SABDA.org
SABDA.mobi
Bantuan
Dual Panel Dual Panel

Laporan Masalah/Saran