Dual Panel1Jari untu’ makapinruannami karaenga siagang Haman sipangnganreang siagang sipangnginungang siagang Ester.
2Lalang angnginunna anggoro’, akkuta’nammi pole karaenga ri Ester angkana, "Jari kamma-kamma anne ratuku, apa nukaeroki? Paumi! Mattantu lakusareangko, manna bageruanna kakaraengangku nupala’"
3Appialimi Ester angkana, "Punna kikaerokangi karaeng, napalaki atanta sollanna nipa’biang atanta siagang bansana atanta attallasa’.
4Nasaba’ le’ba’mi anne atanta siagang bansana atanta nibalukang untu’ nibuno. Ebara’ angkana nibalukangi anne ikambe poro untu’ nipa’jari ata, tenaja nalakkana-kana atanta siagang tenaja nalanasusai karaengku. Mingka kamma-kamma anne laniancuru’mi siagang laniputtami anne ikambe!"
5Jari akkuta’nammi Karaeng Ahasyweros ri Ratu Ester angkana, "Inai barani appanggaukang kamma anjo? Kemae taunna?"
6Appialimi Ester angkana, "Iaminne Haman ja’dala’ siagang musu ansessayai ikambe!" Sanna’mi malla’na Haman anciniki karaenga siagang ratua.
7Teaimi sipato’ larrona karaenga. Ammentemmi nampa nabokoi mejanga nampa tulusu’ assulu’, ri koko balla’ karaenga. Naassemmi Haman angkana natappukimi karaenga untu’ anghukkungi. Jari ammantammi siagang Ester untu’ ampalaki ri Ester sollanna nipalili ri anjo balaya.
8Tappu’ minasami Haman, nampa nabuang kalenna ri katinroanna Ester, untu’ appala’ popporo’. Mingka sitabang le’baki anjo wattua ammotere’mi karaenga battu ri koko balla’ karaenga. Nacini’na Haman appakamma anjo, ammarammi karaenga nakana, "Apa? Barani ijako pole anggau’ salai bainengku anrinni, ri dallekangku siagang balla’ kakaraengang kalengku?" Tasalloai le’ba’na akkana kamma karaenga, battumi sikamma palayang balla’ karaenga ambomboki ulunna Haman.
9Nampa nakanamo Harbona, iamintu kalase’renna anjo palayanga, "O, karaeng, ri ampi’ balla’na Haman nia’ tampa’ panggentungang ruampulo metere’ tinggina. Le’baki napaenteng Haman anjo panggentunganga untu’ anggentungi Mordekhai, tau le’baka ampasalamaki nyawata." Nampa naparentakammo karaenga angkana, "Gentungi Haman anjoreng ri tampa’ panggentunganga anjo!"
10Kammaminjo nanigentummo Haman ri panggentungang le’baka napare’ untu’ anggentungi Mordekhai. Le’bappi anjo nampa naung larrona karaenga.