Dual Panel1Ri wattu tenanapa karaenna tu Israel, nia’ se’re tu Lewi ammantang ri padalamang, ri daera pa’bulukanna Efraim. Angngallei sitau baine piara battu ri Betlehem Yehuda.
2Mingka ri boko, larroi anjo baine piarana, sa’genna ammotere’ mange ri balla’na manggena ri Betlehem. Narapiki patambulang sallona ammantang anjo bainea anjoreng,
3a’lampami anjo tu Lewia ampinawangi untu’ anynyonyoki sollanna ammotere’ mae ri ia. A’lampana, angngerangi sitau suro siagang ruang kayu keledai. Battui mange anjoreng, nierammi ri bainenna mange ri manggena. Nicini’na ri manggena anjo bainea, niruppaimi siagang rannu pa’mai’na,
4na napala’ dudumo sollanna tenamo nammotere’ rolong. Lanri kammana, ammantammi tallu allo tallu bangngi sipa’bangngiang anjo baine piarana.
5Ri makaappa’na alloa, ambangung bari’basa’ dudumi ke’nanga apparuru untu’ a’lampa. Mingka nakanamo manggena anjo bainea mae ri anjo tu Lewia, "Angnganreko rolong sollannu gassing. Sinampeppa nu’lampa."
6Jari ammempomi anjo tu Lewia nampa angnganre siagang angnginung siagang manggena anjo bainea. Mingka ammentenna ero’ a’lampa, ninyonyo’mi ri manggena anjo bainea sollanna tena na’lampa. Nakana, "Assanang-sannammako rolong siagang a’bangngi mako anrinni." Jari ammantammi anjo tu Lewia sipattang pole.
7(19:6)
8Ri makalimana alloa, bari’basa’ dudu, ri ero’namo a’lampa, nakanamo pole manggena anjo bainea, "Maeko kingnganre rolong; sinampeppi nu’lampa." Jari angnganremi ke’nanga sipa’rua na sanna’ sallona angnganre sa’genna sa’ra’mo alloa.
9Nampa, ri wattu ero’namo a’lampa anjo tu Lewia siagang baine piarana kammayatompa surona, nakanamo anjo manggea, "Sa’ra’mi alloa, tasalloami nasassang. Bajikangngang a’bangngi mako anrinni nuassannang-sannang. Ammukopi numbangung bari’basa’ nunampa a’lampa ammotere’."
10Mingka taerokami anjo tu Lewia a’bangngi anjoreng. A’lampami siagang baine piarana kammayatompa surona siagang ruang kayu keledai teke’na. Ri wattunna lasa’ra’mo alloa, anrapi’mi ke’nanga mange ri ampi’na Yebus (iamintu Yerusalem). Nampa nakanamo anjo suroa mae ri karaenna, "Karaeng, umba kissengkamo nakia’bangngi anrinni ri kotana tu Yebus."
11(19:10)
12Mingka appialimi karaenna angkana, "Tena! Tena kilammantang ri tampa’ teai tu Israel pandudu’na. Umba nanipatulusu’ lampata sike’de’ nampa anjoreng paki’ ri Gibea yareka Rama a’bangngi."
13(19:12)
14Jari a’jappa tulusu’mi ke’nanga na tammaria ri Yebus. Labumi alloa ri wattunna battu ke’nanga mange ri Gibea, ri daerana suku Benyamin.
15Assengkai ke’nanga anjoreng untu’ a’bangngi, na’lampamo ke’nanga antama ri kotaya nampa mange ammempo ri lapanganga. Mingka tena manna sitau angkioki ke’nanga mange a’bangngi ri balla’na.
16Lalang ammempona ke’nanga ri lapanganna kotaya, nia’mo battu se’re tau toa beru ammotereka battu ri kokonna anjama. Anjo taua sitojenna tau battu ri daera pa’bulukanna Efraim, mingka kamma-kamma anne ammantammi ri Gibea. (Pandudu’ maraenga ri Gibea iamintu tu Benyamin).
17Ri wattu nacini’na anjo tau toaya anjo tu Lewia nia’ ri lapanganga, akkutanammi angkana, "Battu kemaeko sari’battang, siagang la’lampa kemaeko?"
18Appialimi anjo tu Lewia angkana, "Battua’ ri Betlehem ri Yehuda na kusitabang lalang lampaku ammotere’ mange ri ballakku ri padalamanna pa’bulukang Efraim. Inakke tau battu anjorenga’. Tena manna sitau pandudu’na anne kotaya ero’ antarimai ikambe untu’ a’bangngi ri balla’na.
19Tenaja apa-apa maraeng naparallukang ikambe, lanri ganna’ji bokonna ikambe. Nia’ja rarame siagang kanre untu’ keledaina ikambe; nia’ tonja roti siagang anggoro’ untu’ inakke siagang anne bainengku na suroku."
20Nakanamo anjo tau toaya, "Teako batai, sinampe’ nakutulungko. Tea’ mako a’bangngi ri lapanganga anne."
21Nampa naerang ke’nanga mae ri balla’na na nasare kanre keledaina ke’nanga. Na le’ba’na anjo sikamma toananna ambissai bangkenna, nasaremi ke’nanga kanre.
22Lalang assannang-sannanna ke’nanga, sikali nilipummi anjo ballaka ri tau banna’na anjo kotaya. Napagarumbanga tojemmi ke’nanga pakke’bu’na anjo ballaka na nakana ri anjo tau toaya, "Passareangi anjo bura’ne nueranga mae ri balla’nu mae ri kambe. Eroki ikambe ampakei!"
23Assulu’mi anjo tau toaya na nakana ri ke’nanga, "Teako, sari’battang! Kupalaki, teako a’gau’ kodi yareka a’gau’ tenaya nasiratang kammanjo, nasaba’ anne taua toanangku.
24Baine piaranamo kusareangko siagang ana’ tulolongku. Akkullei nupassukku’ ero’nu mae ri ke’nanga. Mingka, teako a’gau’ kodi mae ri anjo toanangku!"
25Mingka lanri terasa’ duduna pattujunna anjo sikamma tau bannaka, nasorongammi assulu’ baine piarana anjo tu Lewia mae ri ke’nanga. Nampa napassamo nagau’ sala ke’nanga anjo bainea, tenammarina sa’genna bari’basa’.
26Ri wattu subuna ammotere’mi anjo bainea, mingka narapi’na dallekang pakke’bu’ balla’na anjo tau toaya, balla’ pa’bangngianna bura’nenna, tenamo nangngu’rangi. Sa’genna ammumba alloa tuli nia’na anjoreng.
27Anjo bari’basaka, ri wattu ambangunna bura’nenna na nasungke pakke’buka untu’ a’lampa, nagappami anjo baine piarana attinro ri dallekang balla’, anna’gala’ limanna ri pakke’buka.
28Nakanamo ri ia, "Ambangummako, umba ki’lampa." Mingka tappialiami anjo bainea lanri matemi. Nampa naangka’mo anjo bainea na napanai’ ri keledaina, nampa a’lampa ammotere’ mae ri balla’na.
29Anrapiki mae ri balla’, antama’mi nampa angngalle lading na nakere’-kere’ anjo maya’na baine piarana napa’jari sampulo anrua kere’. Le’baki anjo nakirimmi anjo kerek-kerekanga mae ri sampuloa anrua suku bansa Israel, massing tassikereki.
30Sikontu tau ancinikai anjo passalaka massing angkanami, "Tena le’bakapi kajariang anne kammaya baku’ assulu’na umma’ Israel battu ri Mesir sanggenna anne alloa. Takkulleaki’ ammantang a’mereki. Musti sipa’bicaraki’ untu’ appattujuang!"