Alkitab Mobile SABDA
[VER] : [MAKASAR]     [PL]  [PB] 
 <<  Kejadian 17 >> 

1Ri wattunna salapampulo assalapang taung umuru’na Abram, Napappicinikammi KalenNa Batara mae ri ia na Nakana, "INakkemi Allata’ala Kaminang Koasaya. Turuki laloA’ siagang tuli gaukangi erokKu.

2LappareKa’ parjanjiang siagang ikau siagang laKusareko turungang jai."

3Su’ju’mi Abram, nampa Nakanamo Allata’ala,

4"Iaminne parjanjiang Kupareka siagang ikau: A’janjiA’ angkanaya laKupa’jariko boe-boena jaia bansa. Lanri kammana teaimi Abram arennu, mingka Abraham.

5(17:4)

6LaKusareko jai ana’ cucu, siagang nia’ battu ri ke’nanga la’jari karaeng sallang. Lasannaki jaina turungannu, sa’genna la’jari bansa-bansa ke’nanga.

7LaKurupai janjingKu mae ri kau siagang mae ri turungannu sa’genna a’lapi’-lapisi’, siagang anjo parjanjianga lamannannungangi. INakke la’jari Allata’alanu siagang Allata’alana turungannu.

8LaKupassareangi mae ri kau siagang mae ri turungannu, anne butta nupammantangia kamma-kamma anne salaku tubattu-battu. Sikontu butta Kanaan lanapatangi ana’ cucunna sa’genna satunggu-tungguna, siagang iNakke la’jari Allata’alana ke’nanga."

9Nakanamo pole Allata’ala mae ri Abraham, "Ikau pole musti majarre’ tongko’ anta’galaki anne parjanjianga, baji’ naikau kammayatompa sikontu lapisi’na turungannu.

10Ikau siagang sikontu turungannu bura’nea musti nisunna’ ngasengko.

11Appakkaramula ri kamma-kammaya anne musti nusunnaki ana’ lolo bura’nea punna narapi’mo sagantuju allo umuru’na, kammayatompa sikontu ata lassuka lalang ri balla’nu yareka balla’ nuballia. Iaminjo sunnaka la’jari pammatei ri parjanjiangKu siagang ikau.

12(17:11)

13Sikontu taua musti nisunnaki, siagang iaminjo la’jari pammatei ma’nassana, angkanaya anne parjanjiangKu siagang ikau iamintu parjanjiang sa’genna satunggu-tungguna.

14Sikamma bura’-bura’ne tenaya nisunnaki tenamo nalanibilang anggota ummakKu, lanri tenana nanna’gala’ mae ri anjo parjanjianga."

15Nampa Nakanamo Allata’ala mae ri Abraham, "Tea’ mako arengi pole Sarai bainennu, passangalinna appakkaramula kamma-kamma anne aremmi Sara.

16LaKubarakkaki anjo bainennu siagang lanalassukangi sitau ana’ bura’ne ia laKupassareanga mae ri kau. LaKubarakkaki Sara, siagang iami la’jari anronna sikontu bansa-bansaya. Battu ri turunganna lania’ siapa are jaina la’jari karaeng."

17Nampa su’ju’mo Abraham. Mingka ammakkala’mi napikkiri’na angkanaya, "Antekamma batena se’rea bura’ne narapikamo sibilangngang taung umuru’na lakkulle anggappa ana’? Antekamma batena lakkulle Sara allassukang ana’ ri umuru’ salapang puloa taung?"

18Nakanamo ri Allata’ala, "Bajikangngang Ismaelmo a’jari warisi’na turungangku."

19Mingka Nakanamo Allata’ala, "Tena. Anjo bainennu Sara lamanaki sitau ana’ bura’ne na lanuareng Ishak. LaKuta’gala’ majarreki parjanjiangKu siagang anjo anaka siagang sikontu turunganna sa’genna satunggu-tungguna. Anjo Parjanjianga sa’gennai satunggu-tungguna.

20Mingka laKuturukiangko pappala’nu ri sesena Ismael. Lanri kammana nalaKubarakkaki Ishak siagang laKusarei turungang majai. Iami la’jari boe-boena sampuloa anrua kapala suku, siagang laKupa’jari turunganna se’reang bansa lompo.

21Mingka parjanjiangKu siagang Ishak laKusikko’ majarreki. Ia ana’nu lanilassukanga ri Sara, ri taung ri dallekang kira-kira ri wattu kammaya anne."

22Le’baki akkana kamma, a’lampami Allata’ala ambokoi Abraham.

23Anjo memang alloa, naturukimi Abraham parentaNa Allata’ala, na nasunna’mo anjo ana’na iamintu Ismael, kammayatompa sikontu ana’ bura’ne niaka lalang balla’na, siagang sikamma ata lassuka lalang balla’na yareka balla’ naballia.

24Salapampulo assalapang taung umuru’na Abraham ri wattunna nisunna’,

25na umuru’na Ismael ana’na, sampulo antallu taung.

26Assama ngasengi anjo alloa nisunna’ ke’nanga,

27kammayatompa sikontu atanna Abraham.


  Share Facebook  |  Share Twitter

 <<  Kejadian 17 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel