Dual Panel1Anjo wattua nia’ sitau bura’ne battu ri suku Lewi, a’bunting siagang sitau baine, paranna suku Lewi.
2Nammana’mo anjo bainea sitau ana’ bura’ne. Nacini’na angkana sanna’ ga’gana anjo anaka, nacokkomi nia’ tallum bulang sallona.
3Mingka takkulleai sallo dudu nacokko anjo anaka. Jari angngallemi amma’na se’re karanjeng nampa nalapisi’ siagang tere’ sollanna tantamaya je’neka. Le’baki anjo napantama’mi anjo ana’ loloa ri anjo karanjenga, nampa naerang mange ri Binanga Nil, nampa naboli’ ri tangnga-tangngana ruku’ tinggia ri birinna anjo binangaya.
4Daenna bainea anjo ana’ loloa niaki ammenteng tena siapa bellana battu ri anjo tampaka untu’ amparhatikangi angkana apa lakajariang mae ri anjo andi’na.
5Lalang kammana anjo nia’mi battu ana’ bainena karaenga. Naungi ri binangaya ero’ a’je’ne’, nampa dayang-dayanna a’jappa-jappai ri biring binangaya. Ti’ring nacaini’mi anjo ana’ bainena karaenga anjo karanjenga ri tangnga-tangngana rukuka; nasuromi kalase’renna atanna bainea mange angngallei anjo karanjenga.
6Ri wattunna nasungke ana’ bainena karaenga anjo karanjenga, nacini’mi anjo ana’ lolo niaka lalang, sitabang angngarru’. Tu’guru’mi pangngamaseanna anjo ana’ bainena karaenga na nakana, "Anne ana’ tu Ibrani."
7Battumi daenna anjo ana’ loloa akkuta’nang ri ana’ bainena karaenga angkana, "Erokki’ nakupa’boyangki’ sitau amma’ tu Ibrani untu’ ampasusui antu ana’ loloa karaeng?"
8Appialimi anjo ana’ bainena karaenga angkana, "Baji’mi." A’lampami anjo tuloloa angkioki amma’ kalenna.
9Nakanamo ana’ bainena karaenga ri anjo ammaka, "Erangi anne ana’ loloa, nampa nupasusuanga’. Kusarepako gaji." Jari naerammi anjo anaka nampa napasusu.
10Ri wattunna lompo-lompomo anjo anaka, nipassareammi ri amma’na mae ri ana’ bainena karaenga. Nampa nipa’jarimo anjo anaka ana’ angka’na ana’ bainena karaenga. Nakanamo anjo ana’ bainena karaenga, "Kusarei areng anne anaka Musa, lanri kuallei battu ri je’neka."
11Wattunna lompomo Musa, a’lampai mange angngagangi sicini’ tu a’julu bansana. Nacini’mi antekamma batena nipassa ke’nanga anggaukangi jama-jamang battalaka. Nacini’ tommi nia’ sitau tu Mesir ammuno sitau tu Ibrani.
12Accini’mi Musa mae ri tammulilina; na ri wattunna nacini’ angkana tenaja tau amparhatikangi, nabunomi anjo tu Mesirka, nampa nacokko maya’na lalang ri kassika.
13Ammukona bari’basa’ a’lampami pole Musa. Nampa nia’mo nacini’ rua tu Ibrani sitabang assiba’ji. Akkuta’nammi Musa ri kalase’renna, iamintu salaya, angkana, "Angngapa nanuba’ji agannu?"
14Appialimi anjo taua angkana, "Inai angngangkakko a’jari pamimping siagang haking mae ri kambe? Ero’ tongko ambuno tonga’ sangkamma anjo tu Mesirka nubunoa?" A’jari malla’mi Musa siagang napikkiriki angkana, "Ballasa’ma! Naassemmi taua anjo panggaukangku."
15Ri wattunna nalangngere’ karaenga anjo apa kajarianga, a’boyami akkala’ untu’ ambunoi Musa. Mingka larimi Musa nampa ammantang ri pa’rasangang Midian. Imang battua ri Midian, niarenga Yitro, nia’ tuju ana’ bainena. Ri se’reang allo, ri wattunna sitabang ammempo Musa ri ampi’na se’reang bungung, battumi anjo tujua ana’ tulolonna Yitro untu’ anynye’ro’ je’ne’ siagang ambonei tampa’ pangnginungang bembena siagang gimbala’na manggena ke’nanga.
16(2:15)
17Mingka nia’mo siapa are pakalawaki ambongkai anjo ana’-ana’ tuloloa. Nabattumo Musa antulungi ke’nanga siagang nasaremi je’ne’ inung olo’-olo’ piarana ke’nanga.
18Wattunna ammotere’ ke’nanga, akkuta’nammi manggena ke’nanga angkana, "Angngapa nulinta’ kamma ngaseng ammotere’ anne alloa?"
19Appialimi ke’nanga angkana, "Nia’ sitau tu Mesir antulungi ikambe ri wattunna niganggu ikambe ri pakalawaki maraenganga. Ba’lalo ia ampanynye’rokangi ikambe je’ne’, nampa nasare je’ne’ inung olo’-olo’ piarata."
20Akkuta’nammi Yitro ri ana’-ana’na angkana, "Kemaemi anjo taua kamma-kamma anne? Angngapa nanubokoi anjo taua? Mangeko angkioki nakiangnganre siagang."
21Ero’mi Musa ammantang anjoreng. Nampa napa’bunting Yitro ana’na niarenga Zipora siagang Musa.
22Ammana’mi Zipora sitau ana’ bura’ne. Naaremmi Gerson anjo anaka, lanri napikkiriki Musa angkanaya, "Inakke anne tubattu-battua’ mae anrinni."
23Attaung-taungi ribokoanganna, matemi Karaeng Mesir. Mingka tuli akkunrarenna bansa Israel lanri nipare’ atana ke’nanga; sa’genna akkio’mo ke’nanga appala’ tulung. Na anjo pakkio’na ke’nanga anrapiki mae ri Allata’ala.
24Nipilangngerimi ke’nanga ri Allata’ala, siagang Nau’rangimi parjanjianNa siagang Abraham, Ishak, na Yakub.
25Nacini’mi tu Israel nipa’jari ata, jari Natappukimi untu’ laNatulung ke’nanga.