Dual Panel1"Apparekko Kema untu’ iNakke; ia nupareka iamintu sampulo polong kaeng lenang alusu’, nitannungi siagang wol gauka tanja’na, lame butung, siagang eja. Sulangi anjo kaenga siagang gambara’ malaeka’ akka’nyi’.
2Tunggala’ tassipolonga sangkamma ngasengi ukkuranna; la’buna sampulo anrua metere’ siagang sangkara’na rua metere’.
3Limam polong kaeng musti nisambungi a’jari se’re layara’, limam polong pole nipare’ kamma tongi anjo,
4Apparekko panggentungang battu ri kaeng gau’ ri birinna anjo ruaya layara’
5ta’limampulo pa’gentungang massing tasse’rea layara’.
6Apparekko limampulo pa’gentungang bulaeng untu’ ansambungi anjo ruaya layara’.
7Untu’ pattongko’na anjo Kemaya apparekko sampulo asse’re polong kaeng battu ri bulu bembe.
8Tunggala’ tassipolonga kaeng musti sangkammai ukkuranna; la’buna sampulo antallu metere’, na sangkara’na rua metere’.
9Limam polong musti nisambungi a’jari se’re layara’, nampa annang polong maraenganga musti nipare’ kamma tongi anjo. Sambungang makaannanga musti nilappa’ ruai untu’ antongkoki bageang dallekanna Kemaya.
10Patabai anjo limampuloa pa’gentungang mae ri birinna anjo layara’ makase’rea siagang limampuloa pa’gentungang maraenganga ri birinna layara’ makaruaya.
11Apparekko limampulo pa’gentungang battu ri tambaga nampa nupakai’ mae ri pa’gentunganga sollanna akkulle anjo ruaya layara’ a’jari se’re, anjari pattongko’ Kema.
12Bageruanna anjo kaeng alla’bia iami untu’ antongkoki bageang ri bokona Kemaya.
13La’binna kaenga iamintu limampulo sentimetere’ sangkara’na silla’bua anjo Kemaya musti nipakei untu’ antongkoki sa’rinna anjo Kemaya.
14Apparekko rua pattongko’ untu’ bageang pantara’na anjo Kemaya, se’re battu ri kukkulu’ gimbala’ laki nisarea cura’ eja na se’rea pole battu ri kukkulu’ alusu’.
15Papparekangi rangka-rangka anjo Kemaya, ammenteng lambusuka nai’ battu ri kayu akasia.
16Tungga’-tunggala’ anjo rangkaya tinggina appa’ metere’ siagang sangkara’na 66 sentimetere’.
17Tasse’re-se’rea rangka nia’ patto’ tassipasang, sa’genna akkulle nipasisambung anjo rangka-rangkaya battu ri se’rea mae ri maraenganga.
18Untu’ bageang timboro’na Kemaya apparekko ruampulo rangka,
19siagang patampulo pa’lapa’na battu ri pera’, ta’rua irawanganna tunggala’ tasse’rea rangka untu’ ruaya patto’na.
20Untu’ bageang wara’na anjo Kemaya apparekko ruampulo rangka
21siagang patampulo pa’lapa’na battu ri pera’, rua irawanganna tasse’rea rangka.
22Untu’ bageang bokona Kemaya biring laukanga, apparekko annang rangka,
23siagang rua rangka untu’ sikamma panyingkulu’na.
24Rangka-rangkana anjo bageang panyingkuluka musti nipasisambungi mae ri bageang bangkenna tulusu’ nai’ sa’genna bageang iratena. Anjo ruaya rangka appareka panyingkulu’na, musti nipare’ kamma tongi anjo.
25Jari yangasenna nia’ sagantuju rangka siagang sampulo angngannang pa’lapa’ pera’, ta’rua irawanganna tasse’rea rangka.
26Apparekko sampulo allima kayu pangngepe’ battu ri kayu akasia, lima untu’ rangka-rangka ri tasse’rea sa’rinna Kemaya,
27siagang lima untu’ sa’ri ba’leangannaya, kammayatompa lima todong untu’ sa’ri bageang bokona Kemaya, iamintu sa’ri bageang lau’na.
28Anjo kayu pangngepe’ bageang tangngaya musti nipatabai sa’genna bageruanna rangkaya tinggina, battu ri massing cappa’na anjo Kemaya.
29Anjo rangka Kemaya siagang sikamma kayu pangngepe’na musti nulapisi siagang bulaeng. Ponto-ponto untu’ pannahanna anjo kayu-kayua musti bulaeng nipare’.
30Paentengi anjo Kemaya situru’ rancana le’baka Kupicinikiangko irate ri anne buluka.
31Apparekko se’re kaeng pintu battu ri lenang alusu’, ia nitannunga siagang kaeng wol gau’, lame butung siagang eja tanja’na. Sulangi anjo kaenga siagang gambara’ malaeka’ akka’nyi’.
32Gentungi anjo kaeng pintua mae ri appa’ benteng kayu akasia nilapisika bulaeng siagang pakkai’ bulaeng, siagang patabai ri appaka pa’lapa’ pera’.
33Boliki anjo kaenga irawa ri jijiri’na pakkaika ri pattongko’na Kemaya. Ri bokona anjo kaenga musti nipadongkoki anjo Patti Parjanjiang niaka bonena lalang anjo ruaya batu. Anjo kaenga ansimbangi Kamara’ Matangkasaka battu ri Kamara’ Kaminang Matangkasaka.
34Padongkoki anjo pattongko’na Patti Parjanjianga irateanna anjo Pattina.
35Mejang passarea musti niboliki ri pantaranna Kamara’ Kaminang Matangkasaka ri bageang wara’, na bangkeng lampua ri bageang wara’ ilalang ri anjo Kemaya.
36Apparekko gordeng pakke’bu’ Kema battu ri kaeng lenang alusu’ ia nitannunga siagang wol gau’, lame butung siagang eja, na nibelo-belo siagang sulang.
37Untu’ anjo gordenga musti niparekangi lima benteng battu ri kayu akasia ia nilapisika siagang bulaeng nampa nipasisambung siagang lima pakkai’ bulaeng. Apparekko lima pa’lapa’ battu ri tambaga untu’ anjo sikamma bentenga."