Dual Panel1Nakanamo Batara ri Musa, "LaKupa’jariko sanrapang Allata’ala ri dallekanna karaenga, siagang sari’battannu Harun la’bicara mae ri ia salaku na’binu.
2Pauangi Harun sikontu apa Kuparentakanga mae ri kau. Suroi Harun ampaui mae ri karaenga angkanaya musti nakellai tu Israel ambokoi pa’rasangang Mesir.
3Mingka laKupa’jari anjo karaenga terasa’ pa’mai’na. Tena nalanajampangiko, manna pole kuppabattu jai bala ri Mesir.
4Lanri kammana anjo laKuhukkungi Mesir siagang hukkungang-hukkungang battala’, nampa Kuerang sikontu bansa Israel, ummakKu, assulu’ battu ri anjo pa’rasanganga.
5Jari lanaassemmi tu Mesir angkanaya iNakkemi anne Batara, ri wattunna Kuhukkung ke’nanga siagang Kuerang tu Israel assulu’ battu ri pa’rasanganna ke’nanga."
6Nagaukammi Musa siagang Harun anjo apa Naparentakanga Batara.
7Anjo wattua 80 taung umuru’na Musa na Harun 83 taung umuru’na, na’lampa ke’nanga mange andallekang ri Karaeng Mesir.
8Nakana Batara mae ri Musa siagang Harun,
9"Punna nasuroko karaenga appa’nia’ gau’ malompo untu’ a’jari butti, suroi Harun angngallei takkanna nampa nabuang naung ri buttaya ri dallekanna karaenga. Latappinrai anjo takkanga a’jari ulara’."
10Jari a’lampami Musa siagang Harun andallekang ri karaenga siagang nagaukammi anjo apa Naparentakanga Allata’ala. Nabuangi Harun takkanna ri buttaya ri dallekanna karaenga siagang sikamma pagawena, nampa a’jari ulara’mo anjo takkanga.
11Lanri kammana nasuro kio’ tommi karaenga sikamma taunna niaka pangngissenganna siagang cara’deka a’bale’-bale’ mata, nampa nagaukang todong kammaya siagang pangngissenganna ke’nanga.
12Napasambilai takkanna ke’nanga ri buttaya natappinramo anjo takkanga a’jari ulara’. Mingka nia’lu’mi ri takkanna Harun anjo sikamma takkanna ke’nanga.
13Mingka manna nakamma tuli kapala batuna karaenga taeroka anjampangi kana-kananna Musa siagang Harun, sangkamma le’baka Nakana Batara.
14Nampa Nakana Batara ri Musa, "Anjo karaenga sanna’ kapala batuna; taerokai napassareang a’lampa bansa Israel.
15Lanri kammana, a’lampamako angngagangi sibuntulu’ ammuko bari’basa’, ri wattunna naung ri Binanga Nil. Erangi anjo takkang akkullea tappinra a’jari ulara’, nampa nutayang kabattuanna ri biring binangaya.
16Pauangi anjo karaenga angkana: Batara, Allata’alana tu Ibrania, Nasuroa’ ampabattui mae ri katte, sollanna kilappassang a’lampa umma’Na mange untu’ anggaukangi ibadana mae ri Ia ri parang lompoa. Mingka sa’genna kamma-kamma anne tena kiero’ appilangngeri.
17Lanri kammana anjo, kammaminne kananNa Batara, ‘Battu ri apa Kugaukanga sallang, lanuassemmi angkanaya iNakkemi Batara.’ Anne takkanga laKupake antunrungi rateanna je’neka ri binangaya, nampa tappinra je’ne’na a’jari cera’.
18Lamate ngasengi jukuka, siagang anne binangaya la’rasa bottoki, sa’genna takkullea bansa Mesir angnginungi je’ne’na."
19Nakana Batara ri Musa, "Suroi Harun angngallei takkanna nampa nupajonjo mae ri tompo’na sikontu binangaya, sikamma solonganga siagang sikamma kollanga ri Mesir. La’jari ceraki je’ne’na, siagang lania’ cera’ ri sikontu pa’rasanganga, ba’lalo manna lalang ri sikamma dorong kayua siagang sikamma katoang batua."
20Nagaukammi Musa siagang Harun anjo apa Naparentakanga Batara. Ri dallekanna karaenga siagang sikamma pagawena, naangka’mi Harun takkanna siagang natunrummi je’ne’na Binanga Nil, sa’genna tappinramo a’jari cera’ je’ne’na.
21Mate ngasemmi sikamma juku’ niaka lalang ri anjo binangaya. Sanna’ botto’na rasanna, sa’genna takkulleamo tu Mesir angnginungi anjo je’neka. Nia’mo cera’ ri sikontu butta Mesir.
22Mingka nagaukang tommi kammaya anjo sikamma tucara’de’na tu Mesir, iamintu napakei pangngissenganna ke’nanga. Jari tuli kapala batuna karaenga. Kamma le’baka Napau Batara, taerokai karaenga ampilangngeri Musa siagang Harun.
23Ba’lalo ammotere’mi mange ri balla’ karaenga natena sikali najampangi manna sike’de’ anjo apa kajarianga.
24Angngeke ngasemmi bungung sikontu tu Mesir ri birinna binangaya untu’ a’boya je’ne’ inung, lanri takkullena niinung je’ne’na anjo binangaya.
25Tuju allo allalona le’ba’na Natunra Batara anjo Binanga Nil.