Alkitab Mobile SABDA
[VER] : [MAKASAR]     [PL]  [PB] 
 <<  Kidung Agung 8 >> 

1Ah, ebara’ angkana assari’battang tangkakki’, le’baka anynyusu ri ammakku, mattantu kubauko punna kugappako ri aganga, tena tau langhina’.

2Lakuerangko mange ri balla’na ammakku, sollanna akkullea’ nuajara’. Lakusareko angnginung anggoro’ bauka rasanna, siagang je’ne’ rappo delima.

3Lima kairinnu anriwa’ na lima kannannu anrakaka’.

4A’janjiko, he sikamma tulolonna Yerusalem, angkana talanugangguai passingaianga, sa’genna nipassukku’. Bai’-bainea:

5Inaika anjo, niaka battu ri parang lompoa ammanjeng ri tanrinna? Bainea: Kupabangungko irawanganna poko’ appele’, tampa’nu nitianangngang siagang nilassukang.

6Pa’jaria rappo ri atinnu, teako nia’ maraeng nuraka’ pantaranganna inakke; lanri anjo passingaianga sangkammai kassa’na kamateanga, na anjo napasua makoasai rapang kamateang. Rinrana rapangi rinrana pepeka a’rinra sannaka heba’na.

7Manna je’ne’ jai takkulei nabuno pepe’na passingaianga, na a’baya takkulleai naanyukkang. Punna nia’ tau ampassareangi sikontu barang-baranna untu’ amballi passingaianga, mattantu poro pa’hinaji bawang lanagappa.

8Nia’ sitau baine andi’na ikambe ca’di iji susunna. Apa musti nagaukang ikambe mae ri ia punna nia’ battu ampassuroi?

9Ebara’ angkana ia se’re tembo’, lambangungi ikambe menara pera’ irateanna. Ebara’ angkana sanrapangi pakke’bu’ lompo lanajoli kambe siagang balo’ kayu camara. Baine:

10Inakke anne rapanga’ se’re tembo’, na susungku rapang a’jari menarana. Naassengi tanringku angkana punna niakka’ ri ia lamate’nei pakkasiakku. Bura’ne:

11Nia’ koko anggoro’na Salomo ri Baal-Hamon; anjo kokoa napassareangi mae ri pajagaya. Massing a’bayaraki sisa’bu doe’ pera’ untu’ wassele’na

12nampa anggappa ruambilangngang untu’ sawala’ posona. Boli’mi anjo doeka untu’ ikau, Salomo, siagang untu’ sikamma pajaga kokonnu. Mingka koko anggorokku, kalengku pata, niaki ri dallekangku.

13He, tau ammantanga ri kokoa, eroki aganga allangngereki sa’rannu; pilangngeriamma’ anjo sa’rannu! Baine:

14Tanringku, battu mako mae rapang kijang, rapang ana’ jonga battua ri monconna Beter.


  Share Facebook  |  Share Twitter

 <<  Kidung Agung 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2023
Alkitab.SABDA.org

Android.SABDA.org
SABDA.mobi
Bantuan
Dual Panel Dual Panel

Laporan Masalah/Saran