Dual Panel1Nakana Batara Kaminang Koasaya mae ri sikamma imanga, "Iaminne parentaKu mae ri kau ngaseng:
2Pakalompoa’ lalang panggaukannu. Punna taerokako ampilangngeri kanangKu, laKutunraiko. Sikontu apa nutarimaya salaku dalle’ latappinrai a’jari pattunra. Sikontutojenna, sikontu anjo apa bajika le’ba’mi Kutunrai, lanri tena nujampangi parenta-parentaKu.
3LaKuhukkungi ana’-ana’nu, siagang laKusapui rupannu siagang tai olo’-olo’ nukoro’bangkanga, nampa lanire’resangko mange ri pa’gompoanna tai oloka.
4Jari lanuassemmi angkanaya anne parentaya le’ba’mi Kupassuroang, sollanna anjo parjanjiangKu siagang sikamma imanga, jari-jarina Lewi, tuli tappakei.
5Lalang ri anjo parjanjianga Kupa’janjiangi mae ri ke’nanga katallassang amanga siagang salewanganga, siagang Kusuroi ke’nanga ampakalompoA’. Anjo wattua memang napakalompoA’ ke’nanga siagang mallaki ri Nakke.
6Napangngajarrangi ke’nanga katojenganga, teai salaya napangngajarrang. SijarrekiA’ siagang ke’nanga, siagang naturuki erokKu silambusu’na pa’mai’na ke’nanga. Jai tongi tau natulung ke’nanga sollanna tanagaukanga kaja’dallanga.
7Memang kawajibanna sikamma imanga untu’ ampangngajarrangi apa tojenga ri passala’na inakke, Karaeng Allata’ala Kaminang Tinggia. Iami ke’nanga musti napakkuta’nangngi ra’yaka apa kukaerokia, lanri anjo ke’nanga tunisuroKu.
8Mingka kamma-kamma anne, ikau ngaseng, sikamma imanga, ammengkamako battu ri oloang tojenga. Jai tau anggaukangi salaya lanri ajarang-ajarannu. Nupanrakimi parjanjiang Kupareka siagang ikau ngaseng.
9Na iNakke lampa’jari natunaiko umma’ Israel lanri tenana numannuruki ri erokKu, kammayatompa lanri nupasimmara’-maraenna taua ri wattunna nuajara’ ummakKu."
10Sai sangkammaji mangge nipa’juluia ngaseng? Sai sangkamma ngaseng jaki’ nipa’jari ri Allata’ala? Punna kamma, angngapa nakimassing takkaluppa ri parjanjiang Napareka Allata’ala siagang boe-boeta?
11Nadakkaimi umma’ Yehuda parjanjianNa Allata’ala siagang ke’nanga siagang nagaukammi apa appakaringi’-ringika ri Yerusalem siagang ri sikontu pa’rasanganga. Nara’massimi ke’nanga Balla’Na Batara Nakarimangngia, siagang a’nikkami ke’nanga siagang bai’-baine anynyombaya ri rewata-rewatana bansa maraenga.
12Poro sikamma anjo tau a’gau’ kammaya Nipakabellai ri Batara battu ri umma’ Israel. Poro tena lalomo namminawang ri bansata assare koro’bang-koro’bang mae ri Batara Kaminang Koasaya.
13Siagang anne pole paggaukannu maraenga. Tampa’ pakkoro’bangnganNa Batara nupirassi je’ne’ mata; angngarrukko siagang appiraungko lanri taerokami Batara antarimai koro’bang-koro’bannu.
14Akkuta’nangko angkana angngapa Nataeroka antarimai. Lanri Naassenna Batara angkanaya tena najarre’ pa’mai’nu mae ri baine nunikkaiya ri wattu rungkanu. Anjo bainea julu tallasa’nu, mingka amminrami pa’mai’nu mae ri ia, manna pole le’ba’ mako para a’janji ri dallekanNa Allata’ala latuli majarre’ mae ri ia.
15Sai Allata’ala tenaya ruanna ampa’jari se’reko tubu siagang se’re nyawa siagang anjo bainea? Apa ero’Na Batara lalang kammaya anjo? Tena maraeng sollannu anggappa ana’-ana’ untu’ a’jari umma’Na Allata’ala sitojennaya. Jari katutui kalennu, gassingka nia’ ri alla’nu tamajarreka mae ri bainenna.
16Nakana Karaeng Allata’alana Israel, "Kukabirisi nikanaya passitallakkang. Birisikka’ punna nia’ tau ri kau a’gau’ palla’ kamma anjo mae ri bainenna. Jari katutui kalennu siagang tea sikaliko amminrai pa’mai’nu mae ri bainennu."
17Nupakalanrei Allata’ala lanri bicarannu. Mingka akkuta’nangko angkana, "Antekamma batena ikambe ampakalanrei Batara?" Iamintu lalang nukanana, "Sikontu tau a’gau’ kodia nibilang bajiki ri Batara, siagang mangngellai mae ri ke’nanga." Yareka akkuta’nangko angkana, "Kemae anjo Allata’ala nikanaya adele’?"