Dual Panel1Pammujina golongang Korah. Kelong pangngajarang. Untu’ pamimping pakelong. (44-2) O, Allata’ala, kalenna ikambe allangngereki, riwaya’ nacaritaya boe-boena ikambe ri passala’ gau’ malompo le’baka Kigaukang ri jammang riolo.
2(44-3) IKatte kalenTa ambongkai bansa-bansaya sollanna ammantang ummatTa ri pa’rasanganna ke’nanga. Bansa-bansa maraenga Kicilakai, mingka ummatTa Kilappassang a’bakka’-bakka’.
3(44-4) Anjo buttaya tena naalle passai ke’nanga siagang pa’dang; teai lanri kagassingang kalenna nammeta ke’nanga, mingka lanri koasana siagang cayana kahaderanTa, saba’ mangngellaiKi’ mae ri ummatTa.
4(44-5) IKattemi Karaengku siagang Allata’alaku, assareai pammetang ummatTa.
5(44-6) Lanri koasaTa nanabeta musunna ikambe, siagang napatundu’ ikambe tau a’bakkaya ri kambe.
6(44-7) Saba’ tena kupattoangi panaku, manna pa’dangku talanapasalamaka’.
7(44-8) Mingka iKatte ampasalamaki ikambe battu ri balinna ikambe, siagang ambetai tau birisika mae ri kambe.
8(44-9) Jari tuli lanipakalompo maKi’, ri kambe, siagang tulusu’ appala’ sukkuru’ mae ri Katte.
9(44-10) Mingka kamma-kamma anne Kibokoimi ikambe siagang Kibalang parekang nibeta ikambe tenamo Kimaju siagang ikambe lalang ri barisanna ikambe.
10(44-11) Kibalang parekangi ikambe lari battu ri musunna ikambe, nampa narampasa’ ke’nanga pa’barang-baranganna ikambe.
11(44-12) Kibalang parekangi ikambe nisamballe sanrapang gimbala’, siagang nipasisa’la’-sa’la’ ri alla’na bansa-bansaya.
12(44-13) Kibalukangi ummatTa natena siapa anggaranna, siagang tena apa-apa passawallang Kigappa.
13(44-14) Kipa’jarimi ikambe tunicau-cau ri siampi’-ampi’ balla’na ikambe nicau-caumi siagang nikakkalimi ikambe ri ke’nanga.
14(44-15) Kipa’jarimi ikambe tunipianderi ri bansa-bansaya; napammenggong ulunna ke’nanga siagang nahinai ikambe.
15(44-16) Sila’busu’ alloa’ nicalla, angkasiaki sirika siagang kapala’ rupaya,
16(44-17) lanri kulangngere’na paccau-caua siagang kana-kana pahinaya battu ri bawana musua siagang tau ammoli’ lalanga.
17(44-18) Yangasennami anjo antujui ikambe manna natenaja natakkaluppa ikambe mae ri Katte yareka angkaluppai parjanjianTa siagang ikambe.
18(44-19) Tena natakkaluppa atinna ikambe mae ri Katte; tena nadakkai ikambe parentaTa.
19(44-20) Mingka Kibokoi ikambe lalang ri sassanga; tena pakkullena ikambe ri alla’na olo’-olo’ sekkeka.
20(44-21) Ebara’ angkana tenamo nanynyomba ikambe ri Allata’ala, passangalinna appala’ doammi ri allata’ala maraeng,
21(44-22) mattantu laNaassengi Allata’ala, saba’ Naassengi rahasiana atinna ikambe.
22(44-23) Lanri iKatte natuli tattuju kamateanga mae ri kambe na nigau’ sanrapang gimbala’ lanisamballea.
23(44-24) Ambangung maKi’, o, Batara! Angngapa Kitinro? Ammenteng maKi’! TeaKi’ tollaki ikambe satunggu-tungguna.
24(44-25) Angngapa naKiaccokko, na Kikaluppai sessana siagang susana ikambe?
25(44-26) Tu’guru’mi ikambe ancuru’ ri buttaya, attinro naung ri limbu’buka lanri nibeta.
26(44-27) Ammenteng maKi’, siagang battu maKi’ antulungi ikambe, pasalamaki ikambe lanri pangngamaseanTa.