Alkitab Mobile SABDA
[VER] : [MAKASAR]     [PL]  [PB] 
 <<  Mazmur 5 >> 

1Untu’ pamimping pakelonga. Nirurungangi ri suling. Pammujina Daud. (5-2) O, Batara, Kipilangngeri kana-kanangku, Kiparhatikangi kunrarengku.

2(5-3) Kijampangi pakkiokku na Kitulunga’, o Karaengku siagang Allata’alaku.

3(5-4) Saba’ ri Kattema’ appala’ doang, o Batara, Kipilangngeri pakkiokku ri wattu bari’basa’na. Bari’basa’ nakuerang passareku nakutayang pappialinTa, o Batara.

4(5-5) IKatte Allata’ala tamangngaia ri kaja’dallang; tamakkulleai battu tuja’dalaka mae ri Katte.

5(5-6) TaKitahangngai anciniki tau tampoa, Kikabirisi tau ma’gau’ ja’dalaka.

6(5-7) Kipossoki tu nangaia a’balle-balle, Kicini’ irawai patipua siagang pabuno-bunoa.

7(5-8) Mingka lanri lompona pangngamaseanTa, kukkulle antama ri Balla’ SambayanTa. Kusu’ju mange ri Balla’ Sambayang matangkasatTa, nakusombaKi’ ri pa’mai’ mailalang.

8(5-9) O, Batara, tamaka jaina musungku! Renrenga’ untu’ anggaukangi erotTa, naKipicinikianga’ oloang mustia kuolo.

9(5-10) Saba’ kana-kananna musungku takkulleai nipatappa’; sangnging rancana ja’dala’ rassi ri atinna ke’nanga. Angngontaki kana-kana mate’nena ke’nanga, mingka atinna ke’nanga rassi apa-apa botto’.

10(5-11) Hukkungi ke’nanga, o Allata’ala, lappassammi cilaka lanri rancanana tonji. Bongkai ke’nanga lanri jaina dosana, saba’ angngewami ke’nanga mae ri Katte.

11(5-12) Poro rannu pa’mai’ ngaseng tu ma’la’langa ri Katte na tuli ma’reja-reja satunggu-tungguna. La’langi sikamma tu mangngaia ri Katte, sollanna rannu ke’nanga lanri iKatte.

12(5-13) Saba’ Kibarakkaki tu majarreka ri Katte, Kila’langi ke’nanga lalang pangngamaseanTa.


  Share Facebook  |  Share Twitter

 <<  Mazmur 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel