Alkitab Mobile SABDA
[VER] : [MAKASAR]     [PL]  [PB] 
 <<  Mazmur 86 >> 

1Pappala’ doanna Daud. Kipilangngeri pappala’ doangku, o, Batara, siagang Kipiali laloa’, saba’ kasi-asia’ na kulamma.

2Kijagai tallasakku, saba’ iKatte angkamaseanga’, pasalamaki atanTa ia tappaka mae ri Katte.

3IKattemi Allata’alaku, Kikamaseanga’ o, Batara, saba’ sila’busu’ alloa’ appala’ doang mae ri Katte.

4O, Batara, Kipakarannui pa’mai’na atanTa, saba’ mae ri Katte tattuju atingku.

5IKatte bajikKi’, o, Batara, Kingai ampamopporangi taua, tau appala’ doanga mae ri Katte tuli Kikamaseangi siagang pangngamaseang alla’bi-la’bia.

6Kiparhatikang laloi pappala’ doangku, o, Batara, Kipilangngeri pakkiokku appala’ tulung.

7Ri wattungku kasukkarang appala’ doanga’ mae ri Katte, saba’ iKatte ampialia’.

8O, Batara, tena batara pantaranganna iKatte, tena akkulle anggaukangi apa Kigaukanga.

9Sikontu bansa Kipa’jaria labattu ngasengi, o, Batara, untu’ anynyomba mae ri Katte siagang mammuji ri kalompoanTa.

10Saba’ iKatte pore siagang anggaukangi gau’-gau’ appakalannasaka, iKatteji bawang Allata’ala.

11Kiajarakka’ mae ri erotTa, o, Batara, sollanna kupinawang siagang majarre’; Kiajaria’ a’jari tumappilangngeri sibatu pa’mai’.

12Appala’ sukkurukka’ mae ri Katte lalang sibatu pa’maikku o, Karaeng Allata’alaku; erokka’ mammuji ri kalompoanTa satunggu-tungguna.

13Saba’ tuli Kikamaseanga’ lalang pangngamaseang lompoTa; Kilappassammi nyawaku battu ri kali’bong kuburuka.

14O, Allata’ala, ammentengi tau borroa ero’ ambakkaia’, sipa’rappungang tau palla’ ero’ ambunoa’; tena najampangiKi’ ke’nanga.

15Mingka iKatte, o, Batara, Allata’ala mangngamaseang siagang manynyayang, sa’bara’, la’bi pangngamaseang siagang majarre’.

16Kiparhatikanga’ siagang Kikamaseanga’, Kipakajarreka’ siagang Kipasalamaka’, saba’ sangkamma ammakku, nakke manynyomba tonga’ mae ri Katte.

17Kisarea’ tanra kabajikanTa, o, Batara, sollanna a’jari siri’-siri’ tau birisika ri nakke, punna nacini’ ke’nanga angkana Kitulunga’ siagang Kisaleoria’.


  Share Facebook  |  Share Twitter

 <<  Mazmur 86 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel