1Untu’ pamimping pakelong. Situru’ lagu Mut-Laben. Pammujina Daud. (9-2) Erokka’ appala’ sukkuru’ lalang sikontu atingku ri Katte Batara, nakukabarrang kalompoanna bate paretTa.
2(9-3) Erokka’ ma’rannu-rannu siagang ma’reja-reja lanri iKatte na kupuji arenTa, Batara Kaminang Tinggia.
3(9-4) A’bokoi na lari musungku ri dallekanTa; tatto’roi ke’nanga na mate.
4(9-5) Nasaba’ iKatte ammarenta, a’jari haking adele’; IKatte ampattojenga’ ri parkaraku.
5(9-6) IKatte le’ba’ anghukkungi bansa-bansaya siagang Kiposso’ sikamma tu ja’dalaka; nikaluppaimi ke’nanga sa’genna satunggu-tungguna.
6(9-7) Cappu’mi Kipa’la’busu’ musunna ikambe, Kiancuruki kota-kotana ke’nanga; tenamo tau langngu’rangi poleangi.
7(9-8) Batara ammarenta satunggu-tungguna; Napaenteng empoang kala’biranNa untu’ angngadeli linoa.
8(9-9) Adeleki ammarenta ri bansa-bansaya na lambusuki angngadeli mae ri ke’nanga.
9(9-10) Batara pa’la’langanna tu nijallakkanga, tampa’ pa’la’langanna ri wattu kasusaanga.
10(9-11) Tau mangngassenga ri Katte manrannuangi ri Katte, o Batara, tu manynyombaya ri Katte tena naKibokoi.
11(9-12) Pujimi Batara ammarentaya ri Sion! Caritai bate pare’Na mae ri bansa-bansaya!
12(9-13) Nasaba’ Nau’rangi tau pa’risika taNakaluppaiyai piraunna ke’nanga; Nahukkungi tu pallaka panggaukanna.
13(9-14) Cinikima’ anne, nisessa ri musua; kamaseanga’, o, Batara, Kilappassanga’ battu ri kamateanga,
14(9-15) sollangku mammuji ri Katte ri dallekanna pandudu’ Yerusalem. Lakkio’-kiokka’ ma’rannu-rannu lanri Kipasalamakka’.
15(9-16) Bansa-bansa tenaya naassengKi’ tu’guru’ antama’ ri kali’bong nakekea kalenna ke’nanga; nialle ri sikko’ napare’ kalenna ke’nanga.
16(9-17) Napa’nyatami KalenNa Batara lanri adele’na kaputusanNa. Loposoki tu ja’dalaka lanri panggaukang kalenna tonji.
17(9-18) Mate kale’bakkanna tu ja’dalaka, bansa-bansa tenaya najampangi Allata’ala.
18(9-19) Tena natuli nikaluppai satunggu-tungguna tu kasi-asia; tena natulusu’ tena panrannuanna tu sessaya.
19(9-20) Ammenteng maKi’, o, Batara, adelimi bansa-bansaya, teaKi’ lappassangi taua ampakaborroi kalenna.
20(9-21) Boli’mi kamma na’jari malla’ ke’nanga, o, Batara, na naasseng kalenna angkana rupatauji bawang.