Dual Panel1Umba kimakkelong mae ri Batara, akkio’ rannu mae ri Tumappasalamatta!
2Umba kimandallekang ri Ia siagang kelong kasukkurang, akkio’ rannu ri Ia siagang lagu pammuji.
3Saba’ Batarami Allata’ala malompo, Karaeng malompo rateanganna sikontu rewataya.
4Ia angkoasai bageang-bageang kaminang lantanna buttaya, coppo’-coppo’na monconga Ia todong pata.
5Ia angkoasai tamparanga, saba’ Ia ampareki, bontoa pole bate pare’Na todong.
6Umba kisu’ju’ anynyomba mae ri Ia, akkulantu’ ri dallekanNa Batara, Tumapparetta.
7Saba’ Iami Allata’alata, ikatte umma’ niparakaiNa, sanrapang gimbala’ Nakalawakia. Anne alloa pilangngerimi sa’ranNa angkana:
8"Teako terassi ulunnu sangkamma boe-boenu ri Meriba, sangkamma wattunna ri Masa ke’nanga, ri parang lompoa.
9Anjoreng naso’riA’ ke’nanga, manna mamo nacini’mo apa le’baka Kugaukang.
10Patampulo taungA’ ero’ ta’langnge anciniki ke’nanga; Kukana: Tamaka tamattantuna nyawana anjo bansaya! Tanajampangiai ke’nanga parenta-parentaKu.
11Jari assumpaMa’ lalang larroKu, angkana talantamakkai ke’nanga ri anjo pa’rasanganga untu’ anggappa pammari-mariang siagang iNakke."