Dual Panel1Nalangngere’mi Sanbalat, Tobia, Gesyem, siagang musu-musunna ikambe maraenga, angkana le’ba’mi napakabaji’ ikambe anjo tembo’ kalli’na kota Yerusalem, kammayatompa angkana sikontu so’boloka le’ba’ ngasemmi nitongko’. Mingka anjo wattua tenapa nale’ba’ nipataba papang pakke’bu’na sikamma pakke’bu’ lompona kotaya.
2Jari akkirimmi undangang Sanbalat siagang Gesyem ri nakke sollangku battu angngagangi ke’nanga sibuntulu’ ri se’reang desa ri Ka’bung Ono. Mingka kuassengi angkana napa’boyanga’ akkala’ ero’ nabalai ke’nanga.
3Jari kubalasa’mi undanganna ke’nanga angkana, "Takkullea’ battu saba’ nia’ jama-jamangku parallu. Tanjariai anjo jama-jamanga punna kubokoi untu’ angngagangko sicini’."
4Sa’genna pingngappa’ ke’nanga akkiring undangang sangkammaya riolo mae ri nakke, mingka tuli kubalasa’ tongi sangkamma riolo.
5Ri makapillimana nia’mo sitau ana’ buana Sanbalat battu angngerang sura’ tassungke.
6Na ia bonena anjo suraka iamintu: "Napakkontutojengi Gesyem nia’na kaba’-kabara’ niaka nacarita bansa-bansa niaka ri tammulilina anne pa’rasanganga, angkanaya ikau siagang sikontu tu Yahudia a’rancanako ero’ apparicu, na iaminjo saba’na nanupakabaji’ tembo’ kalli’na kotaya. Napau tongi angkanaya erokko angngangkaki kalennu a’jari karaeng Yehuda.
7Nampa nia’mo siapa are na’bi nujo’jo’ untu’ allantikko ri Yerusalem. Anne kaba’-kabaraka mattantu labattuna mange ri karaenga. Lanri kammana, battu mako nampa nibicara anjo passalaka."
8Mingka kubalasa’mi anjo suraka angkana, "Sikontu anjo nupaua sangnging bicara kosong siagang bate pare’-pare’nuji bawang."
9Nacoba-cobami ke’nanga anggarattaka’ sollanna napammari ikambe anjo jama-jamanga. Appala’ doamma’ angkana, "O, Allata’ala, pakajarreki pa’maikku!"
10Kira-kira anjo todong wattua, a’lampa’ mange ri balla’na Semaya ana’na Delaya siagang cucunna Mehetabeel, lanri natabai salibanra natabattua ri nakke. Nakanamo ri nakke, "Umba ki’lampa sipa’rua accokko ri Balla’Na Batara ri Yerusalem. Nikonci ngasengi pakke’bu’na, nasaba’ nia’ tau ero’ ambunoko. Anne kutadeng bangngia nalanibunoko."
11Mingka appialima’ angkana, "Inakke anne takungaiai laria. Inakke tau biasaja’, jari takkullea’ antama’ ri Balla’Na Batara ri Yerusalem, matea’ sallang. Tena, tena nakuero’!"
12Le’baki kupikki’-pikkiri’ anjo passalaka, angngu’rangima’ angkana anjo pakkio’na Semaya teai pakkio’ battu ri Allata’ala, passangalinna battu ri Tobia siagang Sanbalat. Le’ba’mi nagaji ke’nanga Semaya untu’ ampabattui anjo kabaraka mae ri nakke.
13Pattujunna ke’nanga, iamintu sollangku malla’ nakuturuki ero’na ke’nanga sa’gengku doraka. Lanri kammana anggappami kasampatang ke’nanga untu’ ambotto’-bottoki arengku, sa’gengku a’jari carita kodi ri taua.
14Appala’ doamma’ ri Allata’ala angkana, "O, Allata’ala, Kiu’rangi anjo apa nagaukanga Tobia siagang Sanbalat. Kihukkungi ke’nanga! Kammayatompa na’bi baine niarenga Noaja siagang na’bi-na’bi maraenga eroka anggarattaka’."
15Pakabajikianna anjo tembo’ kallika iamintu 52 allonna, nampa le’ba’. Tanggala’ ruampulo allima bulang Elul nale’ba’.
16Nalangngere’na musu-musunna ikambe, ia niaka ri alla’na bansa-bansa attammulilia anjoreng, kabara’na anjo passalaka, malla’mi latu’guru’ siri’ ke’nanga. Nasaba’ sikontu taua naassengi angkanaya anjo jamanga nigaukangi lalang pannulunNa Allata’ala.
17Lalanna anjo wattua siapa are pamimping Yahudi tuli sikiringinna sura’ siagang Tobia.
18Jai tu Yahudi agangi siagang Tobia, lanri anjo Tobia mintunnai Sekhanya ana’na Arah. Nampa pole Yohanan, ana’na Tobia, a’buntingi siagang ana’ bainena Mesulam ana’na Berekhya.
19Manna natuli annulisi’ sura’ Tobia mae ri nakke untu’ anggarattaka’, mingka anjo siapa area pamimping Yahudia, tuli napaui ri dallekangku sikontu kabajikanna Tobia. Pantaranganna anjo, sikamma apa kupaua nalaporo’ ngasengi ke’nanga mae ri Tobia.